مەملەكەت باسشىسى قاسىم-جومارت توقاەۆتىڭ تاياۋدا جاريالانعان «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىن مۇقيات تىڭداپ, وندا ايتىلعان ماسەلەلەردىڭ ماڭىزدىلىعىن بايىپتادىق.
بيىلعى جولداۋ ەلىمىزدىڭ IT قاۋىمداستىعىنا قاراتا ايتىلعانداي اسەر قالدىردى. اتى ايتىپ تۇرعانداي, ونىڭ باستى ارقاۋى – جاساندى ينتەللەكتكە ارنالدى, ياعني تىڭ تەحنولوگيانىڭ ەلىمىزدىڭ دامۋىنا اسەرى جايلى ورامدى ويلار قامتىلدى. اسىرەسە وتاندىق قارجى جۇيەسىنە قاتىستى ءبىراز ماسەلە قوزعالدى. ايتالىق, پرەزيدەنت مەملەكەتتىك كىرىستەر سالاسىندا تسيفرلاندىرۋ ۇدەرىسىنە قارقىن قوسۋدى تاپسىردى. قاسىم-جومارت كەمەل ۇلى جاۋاپتى ۆەدومستۆو جاساندى ينتەللەكتتىڭ جانە باسقا دا وزىق تەحنولوگيانىڭ الەۋەتىن سالىق تولەۋشىلەردىڭ مۇددەسىنە ساي ءتيىمدى قولدانۋى كەرەك ەكەنىن ايتتى. بۇل باعىتتا ەلەكتروندىق قارجى ورتالىعى مەملەكەتتىك كىرىستەر كوميتەتىمەن بىرلەسىپ, جۇيەلى جۇمىستى اتقارىپ كەلە جاتقانىن ايتا كەتەيىن.
ونىڭ ناقتى مىسالى – سالىقتىق اكىمشىلەندىرۋدىڭ ينتەگراتسيالانعان جۇيەسى. بۇل – قازاقستانداعى سالىق پروتسەستەرىن اۆتوماتتاندىرىپ, ينتەگراتسيالانعان سالىقتىق اقپارات جۇيەسى, سالىق ەسەپتىلىگىن وڭدەۋ جۇيەسى جانە ستك سياقتى بۇرىننان كەلە جاتقان 7 پلاتفورمانى الماستىرۋدى كوزدەيتىن تسيفرلى ءونىم. وسى جوبا ارقىلى مكك بيزنەس-پروتسەستەرىن وڭتايلاندىرىپ, كورسەتىلەتىن قىزمەتتەردىڭ ساپاسىن ارتتىرۋ جوسپارلانعان. بۇعان قوسا ەلەكتروندى تۇردە, ونىڭ ىشىندە «ەلەكتروندىق ۇكىمەت» پورتالى جانە حالىققا قىزمەت كورسەتۋ ورتالىقتارى ءۇشىن ينتەگراتسيالانعان اقپاراتتىق جۇيە (حقكو ياج) ارقىلى كورسەتىلەتىن مەملەكەتتىك قىزمەتتەردى ۇلعايتۋ قاراستىرىلىپ وتىر. سونىمەن بىرگە, كولەڭكەلى ەكونوميكانى ازايتىپ, ادامي فاكتوردى تەجەپ, سالىق تولەۋشىلەردىڭ ۋاقىتى مەن قاراجاتىن ۇنەمدەۋ كوزدەلگەن.
بۇدان بولەك, جاساندى ينتەللەكت مۇمكىندىكتەرىن رەسپۋبليكالىق بيۋدجەتتى ءتيىمدى باسقارىپ, ارتىق شىعىندى بولدىرماۋ ماقساتىندا پايدالانۋدى كوزدەپ وتىرمىز. تىڭ تەحنولوگيا الۋان ءتۇرلى قىزمەتتى ۇسىناتىن ءارى ۇلگىلەردى انىقتاپ, سىن-قاتەر جايلى ەسكەرتىپ, ۇسىنىستار بەرەتىن كومەكشى رەتىندە قاراستىرىلادى. جۇيەنىڭ ارحيتەكتۋراسى مەن ۇيلەستىرۋ ماسەلەسى قارجى مينيسترلىگى جانە ەلەكتروندىق قارجى ورتالىعىنىڭ قاراۋىندا. سونداي-اق بۇعان تەحنيكالىق جانە عىلىمي باعىتتا قىزمەت ەتەتىن ارىپتەستەر قولداۋ كورسەتىپ كەلەدى. ءار ىشكى جۇيە بولجاۋ, باقىلاۋ, تالداۋ رەتىندە دەربەس دامي الاتىنداي, بىراق تۇتاستاي تسيفرلى پلاتفورمامەن ۇيلەسىم تاباتىن مودۋلدىك ارحيتەكتۋرا نەگىزگە الىنىپ وتىر. البەتتە, تىزبەكتەسەك دايىنداپ جاتقان جوبامىز جەتەرلىك. ولاردىڭ ناتيجەسى مەن پايداسىن وتانداستارىمىز الداعى ۋاقىتتا كورە جاتار. تۇيىندەيتىن بولساق, پرەزيدەنت بەلگىلەگەن ماقساتتار مەن مىندەتتەردى بىلەك سىبانا ورىنداۋعا دايىنبىز. بىرقاتار جۇمىس ىسكە اسىرىلىپ تا جاتىر. مۇنىڭ ءبارى ەلىمىزدى وركەندەتىپ, حالقىمىزدىڭ ءال-اۋقاتىن ارتتىرۋعا باعىتتالعان ناقتى قادامدار.
دياس كرامشەەۆ,
ەلەكتروندىق قارجى ورتالىعىنىڭ باسقارما توراعاسى