اقتوبەدە وتكەن «ايبىن» XI حالىقارالىق اسكەري-پاتريوتتىق جاستار جيىنىنا قاتىسىپ جۇلدەلى ورىن يەلەنگەن ۇلتتىق ۇلان اسكەرىنىڭ «جاس بۇركىت» كلۋبىنىڭ تاربيەلەنۋشىلەرى ماراپاتتالدى, دەپ حابارلايدى Egemen.kz قر ۇلتتىق ۇلانى «باتىس» وڭىرلىك قولباسشىلىعىنىڭ ءباسپاسوز قىزمەتى تاراتقان مالىمەتكە سۇيەنە وتىرىپ.
ۇلى جەڭىستىڭ 80 جىلدىعىنا جانە كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالىپ, ماۋسىم ايىندا وتكىزىلگەن ءىس-شاراعا ازەربايجان, بەلارۋس, قىرعىزستان, رەسەي جانە وزبەكستاننان كەلگەن 51 كوماندا قاتىسقان ەدى.
ولاردىڭ ىشىنەن اقتوبە قالاسىنداعى №10 مەكتەپتىڭ «جاس بۇركىت» كلۋبى جۇيرىك شىعىپ, ءۇشىنشى ورىنعا يە بولدى. وقۋشىلار شاپشاڭدىعى مەن تاپقىرلىعى, سپورتتىق سايىستارعا دايىندىعى جاعىنان ەرەكشەلەنىپ, وزىپ شىقسا دا, كانيكۋل كۇندەرىنە بايلانىستى ماراپاتتاۋ ءراسىمى كەشىكتىرىلدى. قىركۇيەكتە وقۋشىلار تۇگەل جينالعان كەزدە, «جاس بۇركىت» كلۋبىنىڭ تاربيەلەنۋشىلەرىنە ىشكى ىستەر ءمينيسترىنىڭ ورىنباسارى, ۇلتتىق ۇلان باس قولباسشىسى, سونداي-اق «باتىس» وڭىرلىك قولباسشىلىعى اتىنان العىس حاتتار مەن ەستەلىك سىيلىقتار تابىس ەتىلدى.
ماراپاتتاردى ۇلتتىق ۇلاننىڭ «باتىس» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پولكوۆنيك باقىت الازوۆ تاپسىردى. ول قۇتتىقتاۋ سوزىندە جاستاردىڭ تاباندىلىعى مەن بىرلىگى ولاردىڭ وتانسۇيگىشتىك بولمىسىن ايقىندايتىنىن اتاپ ءوتتى.
اقتوبە وبلىسى