اقش-تا بەلگىلى كونسەرۆاتيۆتى بلوگەر جانە ساياساتكەر چارلي كيرك وققا ۇشتى. ول يۋتا شتاتىنىڭ Utah Valley University ۋنيۆەرسيتەتىندە وتكەن «American Comeback Tour» اتتى ساپارى كەزىندە جارالانىپ, اۋرۋحانادا كوز جۇمدى. وقيعاعا شامامەن 3 مىڭعا جۋىق ادام كۋا بولدى, دەپ جازادى Egemen.kz.
وقيعا قالاي بولدى؟
يۋتا شتاتىنىڭ قوعامدىق قاۋىپسىزدىك دەپارتامەنتىنىڭ حابارلاۋىنشا, وق 12:20 شاماسىندا (استانا ۋاقىتىمەن 01:20) اتىلعان. الدىن الا دەرەكتەر بويىنشا, شابۋىلشى ۋنيۆەرسيتەت كامپۋسىنىڭ ىشكى الاڭىنا جاقىن ماڭداعى عيماراتتىڭ شاتىرىنان وق جاۋدىرعان.
كيرك مويىن تۇسىنان جارالانىپ, اۋرۋحاناعا اۋىر حالدە جەتكىزىلدى. دەگەنمەن كوپ ۇزاماي اقش پرەزيدەنتى دونالد ترامپ ونىڭ قازا تاپقانىن راستادى. CNN-ءنىڭ حابارلاۋىنشا, اتىس ساتىندە چارلي كيرك اۋديتوريادان تۇسكەن سۇراققا جاۋاپ بەرىپ تۇرعان.
چارلي كيرك كىم ەدى؟
1993 جىلى 14 قازاندا يللينويس شتاتىندا دۇنيەگە كەلگەن كيرك اقش-تاعى كونسەرۆاتيۆتى قوزعالىستىڭ الدىڭعى قاتارلى وكىلدەرىنىڭ ءبىرى بولدى. ول دونالد ترامپتىڭ سەرىكتەسى ءارى Make America Great Again قوزعالىسىنىڭ بەلسەندى قولداۋشىسى رەتىندە تانىلدى.
چارلي كيرك – Turning Point USA ۇيىمىنىڭ نەگىزىن قالاۋشىلاردىڭ ءبىرى. بۇل ۇيىم جاستارعا ەركىن نارىق, قارجىلىق جاۋاپكەرشىلىك جانە مەملەكەتتىڭ شەكتەلگەن ارالاسۋى يدەياسىن ناسيحاتتايدى. قازىرگى تاڭدا ۇيىمنىڭ بولىمشەلەرى اقش-تاعى 850-دەن استام كوللەدجدە جۇمىس ىستەيدى.
كيرك ءتۇرلى ۋنيۆەرسيتەتتەردە ءجيى ءسوز سويلەپ, پودكاست جۇرگىزىپ, الەۋمەتتىك جەلىلەردە ميلليونداعان اۋديتوريا جينادى. ول ۋكرايناعا بەرىلىپ جاتقان اسكەري كومەككە قارسى پىكىر ءبىلدىرىپ, يمميگراتسيا, لگبت-قوزعالىسى جانە گەندەرلىك ساياساتتى سىنادى.
BBC جازعانداي, ونىڭ قىزمەتى اسىرەسە اريزونا شتاتىندا رەسپۋبليكالىق سايلاۋشىلاردى جۇمىلدىرۋدا ماڭىزدى ءرول اتقاردى. كيرك اق ۇيگە ءجيى بارىپ, وسى جىلدىڭ قاڭتارىندا دونالد ترامپتىڭ يناۋگۋراتسياسىنا قاتىسقان.
تەرگەۋ مەن زەرتتەۋ
العاشىندا پوليتسيا كۇدىكتى رەتىندە باسقا ادامدى ۇستاعانىمەن, كەيىن ول وقيعاعا قاتىسى جوق ەكەنى انىقتالدى. فبر دەرەگىنشە, نەگىزگى كۇدىكتى قولعا ءتۇستى. قازىر فەدەرالدىق ورگاندار مەن يۋتا شتاتىنىڭ قۇقىق قورعاۋشىلارى بىرلەسىپ تەرگەۋ جۇرگىزىپ جاتىر.
قازا تاپقان بلوگەردى ەسكە الۋ شارالارى ەلدىڭ بىرنەشە وڭىرىندە ءوتتى. اريزونادا ءدىني ۇيىمدار مەن جەرگىلىكتى تۇرعىندار دۇعا وقىپ, نيۋ-يورك Yankees بەيسبول كومانداسى ويىن الدىندا ءبىر مينۋت ۇنسىزدىك جاريالادى. كونگرەسستە دە چارلي كيركتى ەسكە الۋعا ارنالعان ۇنسىزدىك ءساتى وتكىزىلەدى.
دونالد ترامپ بۇكىل ەل اۋماعىندا جەكسەنبىگە دەيىن مەملەكەتتىك جالاۋلاردى تومەن تۇسىرۋگە تاپسىرما بەردى.
«ەشكىم جاستاردى چارلي سەكىلدى ءتۇسىنىپ, ولارعا قامقور بولا العان جوق. ءبىز ونى سۇيدىك ءھام ءسۇيىپ وتەمىز», دەدى ترامپ Truth Social پاراقشاسىندا.
ال بۇرىنعى پرەزيدەنت دجو بايدەن مۇنداي قاندى وقيعالاردىڭ اقش-تا توقتاۋى قاجەتتىگىن ايتىپ, كيركتىڭ وتباسىنا كوڭىل ايتتى. يۋتا شتاتىنىڭ گۋبەرناتورى بۇل وقيعانى «ساياسي قىلمىس» دەپ باعالادى.
ەسكە سالا كەتەيىك, وتكەن جىلى دونالد ترامپتىڭ وزىنە دە قاستاندىق جاسالعان بولاتىن.