سولتۇستىك كاروليناداعى شارلوتتا قالاسىندا دەكارلوس براۋن 23 جاستاعى ۋكراينالىق بوسقىن يرينا زارۋتسكايانى پويىز ىشىندە پىشاقتاپ كەتكەن, دەپ حابارلايدى Egemen.kz New York Post باسىلىمىنا سىلتەمە جاساپ.
اقش پرەزيدەنتى دونالد ترامپ Truth Social جەلىسىندە ءۇن قاتىپ, ايىپتالۋشىعا ەڭ اۋىر جازا قولدانۋ كەرەكتىگىن مالىمدەدى. ول قىلمىسكەردىڭ «جىلدام سوت الدىندا جاۋاپ بەرىپ, تەك ءولىم جازاسىنا كەسىلۋى قاجەت» ەكەنىن ايتتى.
باس پروكۋرور پەم بوندي دە قاتاڭ مالىمدەمە جاساپ, «بۇل كەشىرىلمەس قىلمىس ءۇشىن ەڭ جوعارى جازاعا قول جەتكىزىلەتىنىن» جانە براۋننىڭ ەندى ەشقاشان ەركىندىكتە جۇرمەيتىنىن جەتكىزگەن.
تارالعان بەينەجازبادا ەر ادامنىڭ پويىزدا وتىرعان زارۋتسكاياعا پىشاققا ۇقساس زاتپەن بىرنەشە رەت سوققى جاساعانى كورىنەدى.
براۋنعا فەدەرالدىق دەڭگەيدە قوعامدىق كولىكتە ادام ولىمىنە سەبەپ بولدى دەگەن ايىپ تاعىلسا, شتات زاڭى بويىنشا ول ءبىرىنشى دارەجەلى كىسى ءولتىرۋشى رەتىندە جاۋاپقا تارتىلىپ وتىر.
قوعام اراسىندا ۇلكەن رەزونانس تۋدىرعان بۇل قىلمىس براۋننىڭ بۇرىنعى ارەكەتتەرىمەن دە بايلانىستى. ول 2007 جىلدان بەرى توناۋ, شابۋىل جانە قارۋدى زاڭسىز ۇستاعانى ءۇشىن 14 رەت قاماۋعا الىنعان. ونىڭ اناسى ۇلى شيزوفرەنيامەن اۋىراتىنىن ايتىپ, كوشەدە جۇرۋىنە جول بەرىلمەۋى كەرەك ەكەنىن جەتكىزگەن.