جالپىۇلتتىق سوتسيال-دەموكراتيالىق پارتيا (جسدپ) پرەزيدەنت قاسىم-جومارت توقاەۆتىڭ جولداۋىندا جاريالانعان باستامالارعا قاتىستى رەسمي مالىمدەمە جاسادى, دەپ جازادى Egemen.kz.
پارتيا مەملەكەت باسشىسىنىڭ تسيفرلىق تەحنولوگيالار مەن جاساندى ينتەللەكت نەگىزىندە قازاقستاندى جان-جاقتى دامىتۋ قاعيداتتارىن تولىق قولدايتىنىن اتاپ ءوتتى. اسىرەسە پرەزيدەنتتىڭ مەملەكەتتىك باسقارۋ جۇيەسىن جاڭا تەحنولوگيالىق تارتىپكە ساي قايتا قۇرىلىمداۋ تۋرالى تەزيسىنىڭ ماڭىزدىلىعى ەرەكشە كورسەتىلدى.
جسدپ مالىمدەمەسىندە پرەزيدەنتتىڭ پارلامەنت سەناتىن تاراتىپ, ءبىر پالاتالى جۇيەگە كوشۋ باستاماسى ۋاقىت تالابىنا ساي شەشىم ەكەنى ايتىلدى.
«بۇل – ءبىزدىڭ پارتيانىڭ وسىدان 20 جىل بۇرىنعى باعدارلامالىق قۇجاتىندا بەكىتىلگەن باستى قاعيدالاردىڭ ءبىرى. ۋنيتارلى مەملەكەتتە حالىق سايلايتىن, باقىلاۋ فۋنكتسيالارى بار ءبىر پالاتالى پارلامەنت قانا بولۋى ءتيىس», – دەلىنگەن قۇجاتتا.
پارتيا وسى ۋاقىتقا دەيىنگى مالىمدەمەلەرىندە, باق-تاعى جاريالانىمدارىندا جانە پرەزيدەنتكە جولداعان حاتتارىندا سەناتتى تاراتۋ ماسەلەسىن تۇراقتى كوتەرىپ كەلگەنىن ەسكە سالدى.
«سەنات زاڭ شىعارۋ ۇدەرىسىن نەگىزسىز قيىنداتىپ, ارتىق ارەكەتتەر تۋعىزادى. سوندىقتان بۇل باستامانىڭ جۇزەگە اسۋى – دەموكراتيانى كۇشەيتۋ جولىنداعى تاريحي قادام», – دەيدى جسدپ.
سونىمەن قاتار پارتيا ادىلەتتى قازاقستان مەن «ەستيتىن مەملەكەت» قاعيداتتارىن جۇزەگە اسىرۋداعى وزگە شارالارعا قولداۋ ءبىلدىردى. ونىڭ ىشىندە سايلاۋ پروتسەسىندە ادىلدىك پەن اشىقتىقتى قامتاماسىز ەتۋ, ۇلتتىق پارلامەنتتىڭ جاڭا قۇرىلىمىنا قاتىستى قوعامدىق تالقىلاۋلاردى كەڭىنەن وتكىزۋ ماڭىزدى ەكەنى اتاپ ءوتىلدى.
«2025 جىلعى جولداۋ – قازاقستان ءۇشىن ساپالى جاڭا جولدار اشاتىن باعدارلامالىق تۇجىرىمداردىڭ بىرەگەيى. مەملەكەتتىك باستامالاردى جۇزەگە اسىرۋدا قوعامدىق پىكىر ەستىلۋى ءتيىس, بۇل – باستى قاعيدا», – دەپ قورىتىندىلادى پارتيا.