توعىزقۇمالاق – قازاق ۇلتتىق مادەنيەتىنىڭ الەمدىك وركەنيەتكە قوسقان ءبىر ۇلەسى. 2020 جىلى يۋنەسكو توعىزقۇمالاق ويىنىن الەمدىك مادەني مۇرا تىزىمىنە ەنگىزدى. 2021 جىلى دۇنيەجۇزىلىك توعىزقۇمالاق فەدەراتسياسى 9 قىركۇيەكتى «توعىزقۇمالاق كۇنى» دەپ بەلگىلەدى.
توعىزقۇمالاق ەلىمىزدە عانا ەمەس, بۇكىل الەمدە قارقىندى دامىپ كەلەدى. ايتالىق, وتكەن جىلى لاتىن امەريكاسىندا توعىزقۇمالاق فەدەراتسياسى قۇرىلسا, بيىل وسىنداي ۇيىم وڭتۇستىك كورەيادا دا جۇمىسىن باستادى. ەۋروپا مەن ازيانىڭ بىرقاتار ەلى توعىزقۇمالاق ويناۋدى ەجەلدەن ادەتكە اينالدىرعان, كەيىنگى جىلدارى مۇنداي ءۇردىس افريكا ەلدەرىندە دە بايقالىپ وتىر. بۇگىنگە دەيىن جەتى الەم, التى ازيا چەمپيوناتى وتكىزىلدى.
كەشە «توعىزقۇمالاق كۇنى» اياسىندا ۇلى ابايدىڭ 180 جىلدىعىنا وراي, ەلىمىزدىڭ توعىزقۇمالاق تاقتاسى بار بارلىق وقۋ ورنىندا ساعات 09.00 مەن 21.00 ارالىعىندا ونلاين ويناۋ فلەشموبى ۇيىمداستىرىلدى. ەلورداداعى ءىس-شاراعا دۇنيەجۇزىلىك توعىزقۇمالاق سپورتى فەدەراتسياسىنىڭ پرەزيدەنتى ءاليحان بايمەنوۆ, قازاقستان توعىزقۇمالاق سپورتى فەدەراتسياسىنىڭ پرەزيدەنتى اكىم تۇرسىن, «BINOM School» مەكتەپتەر جەلىسىن باسقارۋشى كومپانيانىڭ باسشىسى شولپان قادىروۆا, فەدەراتسيا وكىلدەرى, وزگە دە ۇلتتىق سپورت قايراتكەرلەرى قاتىستى.
«توعىزقۇمالاق زامانا كوشىنەن استە تىس قالماق ەمەس. 15 جىل بۇرىن وتاندىق ماماندار Ios, Android جۇيەلەرى نەگىزىندە سمارتفونعا جۇكتەمە ازىرلەگەن ەدى. بۇدان بولەك, كانادالىق, پولشالىق, ۇلىبريتانيالىق تانىمال پلاتفورمالارعا توعىزقۇمالاق ەنگىزىلدى. قازىر بۇل الاڭداردا دا توعىزقۇمالاق كەڭ قولدانىلاتىن ويىنعا اينالعان. تاياۋدا جاس جەتكىنشەكتەر ىنتا تانىتىپ, توعىزقۇمالاقتىڭ جاساندى ينتەللەكتىدەگى باعدارلاماسىن ىسكە قوستى. سەكۋندىنا ميلليونداعان ەسەپتى ەركىن ەڭسەرەتىن جي-توعىزقۇمالاق ادام ساناسىنان دا جىلدام. ويىنشىلار مەن جاتتىقتىرۋشىلار ونىڭ ارتىقشىلىعىن, كومبيناتسياسىن, ستراتەگيالىق ويلاۋىن ويىن ورنەگىندە ۇتىمدى پايدالانىپ ءجۇر», دەدى ءا.بايمەنوۆ.
ا.بايتۇرسىن ۇلى اتىنداعى مەكتەپكە مەرەكە كۇنى 100 توعىزقۇمالاقشى توپتاستى. قاتىسۋشىلار ساعات ءتىلى 9-دان 9 مينۋتتى كورسەتكەندە قازاندىقتارعا قول سالدى. ولاردىڭ اراسىندا اتالعان مەكتەپتىڭ 2-سىنىپ وقۋشىسى, توعىزقۇمالاقتان 9 جاسقا دەيىنگى بالالار اراسىنداعى استانا قالاسىنىڭ چەمپيونى قاسىم ەرنات ۇلى دا بار.
«ماعان بەستەمشەنى ءبىرىنشى بولىپ بالاباقشاداعى ۇستازىم گۇلجاينا بيگەلدىقىزى ۇيرەتتى. مەكتەپكە العاش كەلگەنىمدە ۇستازىم اتا-اناما مەنى توعىزقۇمالاق ۇيىرمەسىنە بەرۋدى تاپسىردى. التى جاستان توعىزقۇمالاق ويناۋعا ايرىقشا دەن قويدىم. بىرنەشە قالالىق بايقاۋدا توپ جارىپ, ماۋسىم ايىندا قوستاناي قالاسىندا وتكەن رەسپۋبليكالىق توعىزقۇمالاق سايىسىنا بارىپ كەلدىم. مىقتىلار باس قوسقان بايقاۋ شەبەرلىگىمدى شىڭدادى», دەگەن قاسىم ەرنات ۇلى توعىزقۇمالاقتى عىلىمي تۇرعىدا دا زەرتتەۋگە بەل بۋىپ وتىرعانىن اتاپ ءوتتى.