جاڭا وقۋ جىلى شىعىس قازاقستان وبلىسىندا ەلەۋلى وزگەرىستەرمەن باستالدى. وڭىردە زاماناۋي ءبىلىم ينفراقۇرىلىمىن قالىپتاستىرۋعا قارقىندى ينۆەستيتسيا جاسالىپ جاتىر. جاڭا مەكتەپتەر سالىنىپ, تسيفرلىق تەحنولوگيالار ەنگىزىلدى. بۇل تۋرالى ءبىلىم باسقارماسى باسشىسىنىڭ ورىنباسارى ءاليما اقىلبەك مالىمدەدى.
«كەلەشەك مەكتەپتەرى» ۇلتتىق جوباسى اياسىندا وبلىستا 3 000 ورىنعا ارنالعان 6 زاماناۋي مەكتەپ سالىندى. بۇل ءبىلىم وشاقتارى ينكليۋزيۆتىلىك پەن تسيفرلاندىرۋ تالاپتارىنا ساي كەلەتىن سوڭعى تەحنولوگيالارمەن جابدىقتالعان. سونىمەن قاتار وسكەمەن قالاسىنداعى ەسەنبەرلين كوشەسىندە ورنالاسقان تاعى ءبىر مەكتەپ ءبىلىم باسقارماسىنىڭ بالانسىنا بەرۋگە دايىن تۇر.
بۇدان بولەك, زايسان قالاسىندا 300 ورىندىق جاڭا مەكتەپ ءبىلىم بەرۋ ينفراقۇرىلىمىن قولداۋ قورىنىڭ قاراجاتى ەسەبىنەن بوي كوتەردى. مەكتەپتىڭ ەسىگى 1-قىركۇيەكتە وقۋشىلارعا ايقارا اشىلدى.
وڭىردەگى 347 مەكتەپتىڭ بارلىعى ينتەرنەت جەلىسىنە قوسىلعان. ونىڭ ىشىندە 170 مەكتەپتە «Starlink» جۇيەسى نەگىزىندە قاناتقاقتى جوبا جۇزەگە اسىرىلىپ جاتىر. بۇل ءبىلىم پلاتفورمالارى مەن تسيفرلىق رەسۋرستارعا تۇراقتى قولجەتىمدىلىكتى قامتاماسىز ەتەتىن جاڭا شەشىم.
بارلىق مەكتەپتە بەينەباقىلاۋ مەن كىرۋدى باقىلاۋ جۇيەلەرى ورناتىلعان. سونىمەن قاتار «الەۋمەتتىك ءاميان» جوباسى ىسكە اسىرىلىپ جاتىر. ياعني اتا-انالارعا بالالاردىڭ اس ءمازىرىن قاداعالاپ, جەتكىزۋشىلەرگە ەسەپتىلىكتى اشىق جۇرگىزۋگە مۇمكىندىك بەرەتىن اپپاراتتىق-باعدارلامالىق كەشەن. جاڭا وقۋ جىلىندا مۇنداي جۇيە 108 مەكتەپتە جۇمىسىن باستايدى. ال 191 مەكتەپ «بيزنەس ءاميان» ءموبيلدى قوسىمشاسىنا قوسىلعان.
بيىل 488 ملن تەڭگەدەن استام سوماعا 40 زاماناۋي پاندىك كابينەت (حيميا, فيزيكا, بيولوگيا, STEM, روبوتتەحنيكا) ساتىپ الىندى. 2026 جىلى تاعى 35 جاڭا بۋىن كابينەتىن اشۋ جوسپارلانىپ وتىر.
2026 جىلعا قاراي وبلىستا تاعى 3 جاڭا مەكتەپ سالۋ, 12 مەكتەپتى كۇردەلى جاڭعىرتۋ كوزدەلگەن. بۇل جۇمىس شاعىن قالالار مەن اۋىلدارداعى 50 ءبىلىم مەكەمەسىن قامتيتىن بولادى. 2025 جىلى وڭىردەگى 92 ءبىلىم نىسانىن جوندەۋگە 2,7 ملرد تەڭگە ءبولىندى. قازىرگى تاڭدا ونىڭ ءبىر بولىگى اياقتالدى, قالعانى جوسپارعا ساي جالعاسادى.
شىعىس قازاقستان وبلىسى