بۇگىنگى كاسىپكەر ايەلدەر تابىس تاۋىپ قانا قويماي, جاڭا مادەني ورتا قالىپتاستىرىپ, ۇلتتىق بولمىستى زاماناۋي نارىققا بەيىمدەپ ءجۇر. ءبىرى ۇلتتىق ءداستۇردى ۇلىقتاپ, قارجى كوزىن تاپسا, ەندى ءبىرى بوس كەڭىستىكتەن ىسكەرلىك الاڭ قۇردى, ءۇشىنشىسى اسەمدىك الەمىندە ءتول رۋحتى تىرىلتەدى. ولاردى بىرىكتىرەتىن ورتاق قاسيەت – تاباندىلىق, جاڭاشىلدىق, ءوز ىسىنە دەگەن سەنىمدىلىك.
كادەنى كاسىپكە اينالدىرعان
ءداستۇرىمىزدىڭ ءبىر بولشەگى – قۇدالىق. وسى راسىمگە ارنالعان جيىنتىق ازىرلەۋدى تابىس كوزىنە اينالدىرعان استانالىق جىبەك جانعابىلوۆا ماۋسىم سايىن 5 ميلليون تەڭگەدەن اسا تازا پايدا تابادى. كاسىپكەردىڭ ايتۋىنشا, تابىسىنىڭ سىرى – ۇلتتىق ناقىشتى زاماناۋي سۇرانىسپەن ۇشتاستىرا بىلۋىندە.
– دەكرەتكە شىققانىمدا قالتامدا 86 مىڭ تەڭگە عانا بار ەدى. سونىڭ 36 مىڭ تەڭگەسىنە تىگىن ماشيناسىن, قالعان قارجىعا ماتا ساتىپ الدىم. YouTube الەۋمەتتىك جەلىسى ارقىلى ۇيرەنىپ, OLX سايتىنا ۇيدەن تاپسىرىس قابىلدايتىنىم تۋرالى حابارلاندىرۋ ورنالاستىردىم. العاشقى تاپسىرىس كيىم جوندەۋدەن باستالدى. كەيىن بالاباقشاعا ۇلتتىق كوستيۋمدەر تىگۋ ۇسىنىسى ءتۇسىپ, قازاقى ورنەككە دەن قويا باستادىم, – دەيدى ج.جانعابىلوۆا.
سۇرانىس ارتقان سوڭ 2017 جىلى قارىزعا 600 مىڭ تەڭگە الىپ, شاعىن تسەح اشقان. 35 شارشى مەتر ورىنعا ايىنا 75 مىڭ تەڭگە تولەپ, ءبىر تىگىنشى جۇمىسقا دا الىپتى. سولاي كۇنىنە 7-8 قورجىن ساتا باستاعان. باعاسى 15 مىڭ تەڭگەدەن 300 مىڭ تەڭگەگە دەيىن بارعان. الايدا 8 ايدان كەيىن قارجىلىق ەسەپتىڭ السىزدىگىنەن كاسىبى توقتاعان.
– قارجىلىق ساۋاتسىزدىق ءسۇرىندىردى. اقشا كوپ ءتۇستى, بىراق ەسەپ جۇرگىزبەدىم. جەكە قاجەتكە جۇمسادىم. ماتەريال مەن جارناماعا اقشا قالمادى. جالداۋ اقىسىن تولەي المادىم. 2017–2019 جىلدار ارالىعى اۋىر ءوتتى. وتباسىلىق تابىس ازايا باستاعاندىقتان ۇيدە تىگىن تىگۋگە قايتا ورالدىم. كاسسير بولىپ جۇمىس ىستەپ, كاسىبىمدى قاتار الىپ ءجۇردىم. ءتورت رەت تسەح اشۋعا تالپىنىپ, تورتەۋىندە دە ساتسىزدىككە ۇشىرادىم. كارانتين دە جوسپارىمدى تەجەدى. 2022 جىلعى قاراشادا 1,5 ميلليون تەڭگە ينۆەستيتسيا سالىپ, كاسىبىمدى قايتا جانداندىردىم. ەرەكشەلىك رەتىندە تابانى بار ەكسكليۋزيۆتى سەبەتتەردى ەنگىزدىم. ءار بۇيىمنىڭ ءمانىن ءتۇسىندىرىپ, Instagram ارقىلى وڭىرلەرگە شىقتىم, – دەيدى كاسىپكەر.
بۇگىندە كاسىپكەردىڭ كومانداسىندا 10 ادام بار. قورجىن باعاسى 22 مىڭنان 120 مىڭ تەڭگەگە دەيىن, تولىق قۇدالىق جيىنتىعى 150 مىڭنان 1 ملن تەڭگەگە دەيىن جەتەدى.
ماۋسىم كەزىندە اينالىم 6-7 ملن تەڭگەگە دەيىن بارادى. تۇراقتى شىعىن شامامەن – 600 مىڭ تەڭگە. ناتيجەسىندە, تازا پايدا 5 ملن تەڭگەدەن اسادى. 2022 جىلدان بەرى ۇلتتىق بۇيىم تىگۋدى ۇيرەتەتىن ونلاين كۋرس اشىپ, 2,5 مىڭ ادامدى وقىتىپ كەلەدى.
ۇلتتىق رۋحتى ۇلىقتاعان «قىز جىبەك»
ەلىمىزدەگى العاشقى ۇلتتىق ناقىشتاعى ءسان سالوندارىنىڭ ءبىرى – «قىز جىبەك». ونىڭ نەگىزىن قالاعان زاكيرا جۇماشەۆا سۇلۋلىق يندۋسترياسىنا وزگەشە لەپ اكەلدى. كاسىپكەردىڭ ايتۋىنشا, قازىرگى بيۋتي يندۋسترياسىندا كوپ نارسە ءبىر-بىرىنە ۇقساس.
– مەن ەرەكشە كاسىپ جاساعىم كەلدى. قازاق قىزىنىڭ تابيعي ادەمىلىگىن ۇلتتىق ناقىشپەن ايشىقتاۋ – باستى ماقساتىم بولدى. ماسەلەن, بىزدە سالون تابالدىرىعىن اتتاعان ساتتەن باستاپ قوناقتاردى قازاقتىڭ ءداستۇرلى كۇيى مەن ۇلتتىق دامىمەن قارسى الادى. مۇندا ۇلتتىق كود پەن زاماناۋي ەستەتيكا ۇيلەسىم تاپقان. ينتەرەردىڭ ءاربىر دەتالىنەن قازاق ايەلىنە ءتان نازىكتىك پەن تەكتىلىك ەسىپ تۇرادى. توردەگى التىن تۇستەس شاڭىراق – بەرەكە مەن بىرلىكتىڭ نىشانى. ول كەلۋشىگە ءوز شاڭىراعىنداعىداي جىلۋلىق سىيلايدى. توبەدەگى اپپاق ويۋ-ورنەكتى بەدەرلەر مەن سالتاناتتى اسپالى شامدار كەڭىستىككە حان سارايىنداي ءسان بەرەدى. التىن تۇستەس اسپالى اتكەنشەك جايلىلىق پەن ەركىندىكتىڭ بەلگىسى ىسپەتتى. ونىڭ ۇستىندەگى جۇمساق تەرى مەن ويۋلى جاستىقتار قازاقى اۋىلدىڭ ەركىن رۋحىن زاماناۋي لوفت ستيلىمەن ۇشتاستىرىپ تۇر. ءار ورىندىقتاعى ساۋكەلە بەينەسى مەن شاڭىراق استىندا بويانۋ كليەنتتى زاماناۋي حانشايىمعا اينالدىرعانداي اسەر قالدىرادى, – دەيدى كاسىپكەر.
قازىر سالوندا 25 قىزمەتكەر ەڭبەك ەتەدى. كىرىس ماۋسىمعا بايلانىستى وزگەرىپ وتىرادى, بىراق سۇرانىس جوعارى. سالوننىڭ قىزمەت كورسەتۋ اياسى كەڭ. مۇندا تىرناق كۇتىمى, شاش قيۋ, بوياۋ جانە ساندەۋ, ماكياج, قاس پەن كىرپىك قىزمەتتەرى, كوسمەتولوگيا ۇسىنىلادى. ءار قىزمەت زاماناۋي تالاپقا ساي, ساپالى ماتەريالمەن ورىندالادى. ماكياجدا قازاق قىزىنا ءتان تابيعيلىق ساقتالادى. جۇمساق قوڭىر, التىن رەڭكتەرى ءجيى قولدانىلادى. كەي وبرازداردا ويۋ-ورنەك ەلەمەنتتەرى مەن ۇلتتىق اشەكەيلەر ۇيلەستىرىلەدى. قالىڭ, جاساندى ستيلدەن گورى نازىك ءارى مانەرلى باعىت ۇسىنىلادى. قوناقتار ۇلتتىق ناقىشتاعى فوتوسەسسيا جاساۋدى دا ءجيى تاڭدايدى.
كەڭىستىكتەن – كەڭسەگە دەيىن
ەل ەكونوميكاسىنا ۇلەس قوسىپ جۇرگەن ايەل كاسىپكەرلەردىڭ ەڭبەگى ەرەكشە. سولاردىڭ ءبىرى – SmArt.Point باس ديرەكتورى اقبوتا الاگوزوۆا. ول كرەاتيۆتى كوۆوركينگتى جاي كەڭسە ەمەس, تولىققاندى ەكوجۇيە رەتىندە قالىپتاستىردى. كوۆوركينگ تابىسى كەڭىستىك قانشالىقتى تەز رەزيدەنتتەرگە تولاتىنىنا بايلانىستى. سوندىقتان بۇل سالاداعى جۇمىس يدەيادان ەمەس, ناقتى ەسەپتەن باستالادى. عيماراتتىڭ تەحنيكالىق ءاۋديتى جاسالادى. جوبالاۋ جۇرگىزىلەدى. قۇرىلىس مونتاج جۇمىسى قاداعالانادى. سەرۆيس ستاندارتتارى ەنگىزىلەدى. سونىمەن بىرگە يدەولوگيالىق قۇرامداس بولىككە ءمان بەرىلەدى.
– ەلىمىزدە بيزنەس پەن ءىت-كوماندالارعا يكەمدى كەڭىستىك جەتپەيتىنىن كوردىك. ۇزاقمەرزىمدى جالداۋ مىندەتتەمەسىنسىز تەز وسۋگە مۇمكىندىك كەرەك بولدى. سول ءۇشىن شەشىم ۇسىندىق. قازىر 150-دەن استام كومپانيا بىزدەن open-space پەن سەرۆيستىك وفيس جالدايدى. SmArt.Point ارتىقشىلىعى – ەكوجۇيەسىندە. اي سايىن 2-3 ءىس-شارا وتەدى. نەتۆوركينگ كەزدەسۋلەرى, ستارتاپ پيتچينگتەر, ساراپشىلىق سەسسيالار ۇيىمداستىرىلادى. ىشكى ءىس-شارالارعا 70-80 ادام قاتىسادى. ءىرى سەرىكتەستىك فورماتتاعى كەزدەسۋلەرگە 150-180 ادام جينالادى. رەزيدەنتتەردىڭ 70 پايىزى توقسانىنا ءبىر رەت كوميۋنيتي بەلسەندىلىگىنە قاتىسادى. 5 جىل ىشىندە 22 مىڭنان استام ءىس-شارا وتكىزدىك, – دەيدى ا.الاگوزوۆا.
كاسىپكەردىڭ ايتۋىنشا, قازىرگى رەزيدەنتتەردىڭ 42 پايىزى – ءىت-كومپانيالار مەن ستارتاپتار, 20-22 پايىزى – ماركەتينگ پەن digital اگەنتتىكتەر, كرەاتيۆ يندۋستريا وكىلدەرى, 20 پايىزى – سەرۆيستىك جانە كونسالتينگ كومپانيالار. 15 پايىزعا دەيىن حالىقارالىق جوبالار بار. ورتاشا كوماندا كولەمى – 15 ادام. كوماندالار كەڭسەنى ورتا ەسەپپەن 18-24 اي جالعا الادى. Open-space رەزيدەنتتەرى اي سايىن ۇزارتۋ فورماتىن تاڭدايدى.
– رەزيدەنتتەرگە تاۋلىك بويى سپورتزال, دۋش, ويىن ايماعى, دەمالىس بولمەسى, كىتاپحانا, تەلەفون كابينالارى, بالالار بولمەسى, كونفەرەنتس زالدار قولجەتىمدى. ءداستۇرلى كەڭسەدەگى جوندەۋ, جيھاز, ينتەرنەت, كلينينگ, كۇزەت, رەسەپشن ماسەلەلەرىن SmArt.Point ءوز موينىنا الادى. بۇل باستاما ايەل كوشباسشىلىعىنىڭ ىسكەرلىك ورتا قالىپتاستىرۋداعى ءرولىن ايقىن كورسەتەدى, – دەيدى كاسىپكەر.