جەتىسۋ وبلىسىندا جاڭا كونستيتۋتسياعا ارنالعان مۇرال سالىندى. ونىڭ ەسكيزىن ازىرلەۋگە جاساندى ينتەللەكت مۇمكىندىكتەرى پايدالانىلدى. «Jetisu jastary» كمم-ءنىڭ ۇسىنىسىمەن سالىنعان «اتا زاڭىم – ايبىنىم» مۇرالى جاستاردىڭ ازاماتتىق مادەنيەتىن قالىپتاستىرۋعا جانە زاماناۋي كوشە ونەرى ارقىلى قوعامداعى ماڭىزدى قۇندىلىقتاردى دارىپتەۋگە باعىتتالعان, دەپ جازادى Egemen.kz.
بۇل ارت-نىسان تالدىقورعان قالاسىنداعى كوپقوباتتى ۇيلەردىڭ ءبىرىنىڭ قابىرعاسىندا بەينەلەنگەن. مۇرالدىڭ اشىلۋ سالتاناتى ءوتىپ, وعان ءوڭىر جاستارى, قوعام بەلسەندىلەرى, شىعارماشىلىق ورتا وكىلدەرى جانە قالا تۇرعىندارى قاتىسقان.
ء«بىزدىڭ جاڭا مۇرالىمىز اتا زاڭىمىزعا ارنالعان. كەشە مەملەكەت باسشىسى اتاپ وتكەنىندەي, جاڭا كونستيتۋتسيا ەڭ الدىمەن جاستارعا باعىتتالعان. اتا زاڭىمىزعا ەرىكتىلىك قىزمەت, عىلىم, يننوۆاتسيا, جاساندى ينتەللەكت ۇعىمدارى ەنگىزىلگەن. وسىعان بايلانىستى ءبىز مۇرالدى زاماناۋي مۇمكىندىكتەرمەن ۇشتاستىرۋعا تىرىستىق. كوركەم تۋىندىدا بىرلىك, ادىلدىك, جاۋاپكەرشىلىك جانە بولاشاققا دەگەن سەنىم يدەيالارى بەينەلەنىپ, قوعامداعى ءوزارا قۇرمەت پەن ىنتىماقتاستىقتى دارىپتەيتىن مازمۇن كورىنىس تاپتى. ويتكەنى كونستيتۋتسيا – بارلىق وسى يگىلىكتىڭ باستاۋى», دەدى «Jetisu jastary» كمم-ءنىڭ ديرەكتورى شاميل ۆانكەەۆ.
پرەزيدەنت: اتا زاڭ جاس بۋىننىڭ تەمىرقازىعى بولۋعا ءتيىس
مۇرال اۆتورى ەرنۇر باقبەرگەننىڭ ايتۋىنشا, بۇل جۇمىس قوعامداعى ماڭىزدى قۇندىلىقتاردى زاماناۋي ونەر ءتىلى ارقىلى جەتكىزۋگە باعىتتالعان.
«مۇنداي شىعارماشىلىقپەن 6 جىلدان بەرى كاسىبي تۇردە اينالىسىپ كەلەمىن. وسى ۋاقىت ارالىعىندا «زاڭ مەن ءتارتىپ», «تازا قازاقستان» سياقتى يدەولوگيالىق جانە قوعامدىق ماڭىزى بار تاقىرىپتاردا بىرقاتار مۋرالدار سالدىم. ال وسى جوبامنىڭ ەرەكشەلىگى – مۇرالدىڭ ەسكيزى جاساندى ينتەللەكت كومەگىمەن ازىرلەندى. بۇل ءتاسىل شىعارماشىلىق پەن تەحنولوگيانى ۇشتاستىرا وتىرىپ, زاماناۋي ونەردىڭ جاڭا باعىتتارىن كورسەتۋگە, سونىمەن قاتار قىسقا مەرزىم ىشىندە جۇزەگە اسىرۋعا مۇمكىندىك بەرەدى. مىسالى, ءبىزدىڭ شىعارماشىلىق توپ مۇرالدى 3 كۇننىڭ ىشىندە تولىق سالىپ ءبىتتى», دەدى جاس سۋرەتشى.
ايدوس سارىم: مەملەكەت باسشىسى – جاڭا اتا زاڭنىڭ نەگىزگى اۆتورى
ەسكە سالساق, بۇعان دەيىن ءوڭىر جاستارىنىڭ باستاماسىمەن وبلىستىڭ اۋدان ورتالىقتارىندا «تازا قازاقستان», «ادال ازامات», «زاڭ مەن ءتارتىپ» قاعيدالارىنا ارنالعان ءۇش مۇرال كوكسۋ, قاراتال, سارقان اۋداندارىنىڭ ورتالىقتارىندا سالىنعان بولاتىن.
جاڭا اتا زاڭ – سىن-قاتەرلەرگە بەرىلگەن جاۋاپ