اتىراۋدا الاياقتار قىلمىسى ءورشىپ تۇر. قۇقىق قورعاۋ ورگاندارىن ينتەرنەتتەگى الاياقتىق قىلمىسىنىڭ 14 پايىزعا ارتقانى الاڭداتادى. كەيىنگى جىلدارى ارام پيعىلدى الاياقتاردىڭ وسىنداي زاڭسىز ارەكەتىنەن جابىرلەنۋشىلەرگە 1 ملرد 297 ملن تەڭگەدەن اسا شىعىن كەلتىرىلگەن.
اتىراۋ قالالىق پروكۋراتۋراسىنىڭ مالىمەتىنە قاراعاندا, الاياقتار ازاماتتاردى الداۋ ءۇشىن الەۋمەتتىك جەلىلەردى, مەسسەندجەرلەردى, جالعان سايتتار مەن حابارلامالاردى كەڭىنەن پايدالانادى. الاياقتار وزدەرىن بانك قىزمەتكەرى, قۇقىق قورعاۋ ورگانىنىڭ وكىلى نە جاقىن تۋىسىڭىز رەتىندە تانىستىرۋى مۇمكىن. ءسويتىپ, جەكە دەرەكتەردى, بانك كارتاسىنىڭ رەكۆيزيتتەرىن نەمەسە كودتاردى الۋعا تىرىسادى.
«وسىعان بايلانىستى تۇرعىندار قاۋىپسىزدىك ماقساتىندا بىرنەشە ساقتىق شاراسىنا ءمان بەرگەنى ءجون. بىرىنشىدەن, بەيتانىس سىلتەمەلەرگە وتپەۋدى, جەكە جانە بانك دەرەكتەرىن ءۇشىنشى تۇلعالارعا بەرمەۋ كەرەك. ەكىنشىدەن, كۇماندى قوڭىراۋلار مەن حابارلامالارعا سەنبەۋدى ۇسىنامىز. الاياقتىق بەلگىلەرى بايقالعان جاعدايدا قۇقىق قورعاۋ ورگاندارىنا دەرەۋ حابارلاسۋدى سۇرايمىز», دەپ حابارلادى قالالىق پروكۋراتۋرادان.
وبلىستىق پروكۋراتۋرانىڭ ۇيلەستىرۋىمەن اتىراۋدا ينتەرنەت-الاياقتىققا قارسى «Anti-Fraud Call Center» ورتالىعى اشىلدى. ورتالىقتا پوليتسيا دەپارتامەنتىنىڭ كيبەرقىلمىسقا قارسى جەدەل توبى «قازاقتەلەكوم» اق-تىڭ وڭىرلىك فيليالىنىڭ قىزمەتكەرلەرىمەن بىرلەسە جۇمىس ىستەيدى.
«باستى ماقساتىمىز – تۇرعىنداردى ينتەرنەت جەلىسىندەگى الاياقتىق قىلمىستاردان قورعاۋ. بۇل ورتالىقتا زارداپ شەككەن تۇرعىنداردىڭ وتىنىشتەرى جەدەل قارالادى. الاياقتاردان قورعانۋ ءادىسى جونىندە پروفيلاكتيكالىق كەڭەس بەرىلەدى», دەيدى وبلىس پروكۋرورى ماديار باسشىباەۆ.
قۇقىق قورعاۋ ورگاندارىنىڭ مالىمەتىنە سۇيەنسەك, جىل باسىنان بەرى ينتەرنەت ارقىلى جاسالعان الاياقتىق قىلمىسىنىڭ دەرەگى 19 پايىزعا وسكەن. اككىلەردىڭ زاڭسىز ارەكەتىنە بايلانىستى ورتالىققا 100-گە جۋىق شاعىم تۇسكەن.
پوليتسيا دەپارتامەنتىنىڭ باستىعى وڭال بەكەەۆتىڭ ايتۋىنشا, الاياقتاردان قورعايتىن ورتالىق قىزمەتكەرلەرى تاۋلىك بويى جۇمىس ىستەيدى. ورتالىققا تۇسكەن قوڭىراۋلارعا مونيتورينگ جۇرگىزىلەدى.
«قىزمەتكەرلەر مونيتورينگ كەزىندە قىلمىسكەردىڭ قوڭىراۋ شالعانىن انىقتاسا, دەرەۋ جابىرلەنۋشىمەن بايلانىسقا شىعادى. تۇرعىندارعا ەسكەرتۋ جانە ءتۇسىندىرۋ جۇمىسىن جۇرگىزەدى. پوليتسەيلەر بۇدان كەيىن الاياقتىق ارەكەتىنىڭ جولىن كەسۋ, كۇدىكتىنى ۇستاۋ ماقساتىندا ءتيىستى جەدەل ءىس-شارالاردى جۇزەگە اسىرادى», دەيدى و.بەكەەۆ.
اتىراۋ وبلىسى