پاۆلوداردا كەلەر جىلعى سۋ تاسقىنىنا قارسى ءىس-شارالار قازىردەن باستالىپ كەتتى

كەلەر جىلعى سۋ تاسقىنى كەزەڭى قارساڭىندا ەلدى مەكەندەردى سۋ باسۋ قاۋپىن ازايتۋ ماقساتىندا پاۆلودار وبلىسىندا وبلىس اكىمىنىڭ ينجەنەرلىك جۇمىستار مەن كەشەندى ءىس-شارالار جوسپارى بەكىتىلگەن. ءىس-شارالاردى ىسكە اسىرۋ ءتورت كەزەڭگە بولىنەدى: جاز, كۇز, قىس, كوكتەم.

-قازىرگى ۋاقىتتا ينجەنەرلىك جۇمىستار جوسپارى شەڭبەرىندە اۋماقتار مەن الەۋمەتتىك ينفراقۇرىلىم وبەكتىلەرىن ىقتيمال سۋ تاسقىنىنان قورعاۋ باعىتىندا جوسپارلانعان 22 ءىس-شارانىڭ 13-ءى ورىندالدى. ماسەلەن, ەرتىس اۋدانىندا سىلەتى – قىزىلاعاش اۋداندىق ماڭىزى بار 13 كم اۆتوجولعا سۋ وتكىزۋ قۇبىرلارى ورناتىلدى. وسىعان ۇقساس جۇمىستار ماي اۋدانىندا ورىندالدى: قۇبىرلار جاڭاتىلەك اۋىلىنا جانە باسكول اۋىلىنا كىرمە جولعا سالىندى. ەكىباستۇز اۋدانىندا اك. مارعۇلان اۋىلىنىڭ اينالاسىندا قورعانىش ءۇيىندىسىن نىعايتۋ جانە ارىق جۇيەسىن جايلاستىرۋ جۇمىستارى جۇرگىزىلدى. پاۆلودار قالاسىنىڭ كەنجەكول اۋىلىندا جانە پاۆلودار اۋدانى جامبىل اۋىلىندا جەر ۇيىندىلەرى نىعايتىلدى,-دەپ حابارلادى وڭىرلىك توتەنشە جاعدايلار دەپارتامەنتىنەن.

ينجەنەرلىك ءىس-شارالار كوكتەمگى سۋ تاسقىنى كەزەڭىندە توتەنشە جاعدايلار تاۋەكەلدەرىن ازايتۋعا, حالىقتى قورعاۋعا جانە ينفراقۇرىلىم وبەكتىلەرىنىڭ تۇراقتى جۇمىس ىستەۋىن قامتاماسىز ەتۋگە باعىتتالعان.

پاۆلودار وبلىسى