اقتوبە وڭىرىندە فەرمەرلەر مەن اۋىل تۇرعىندارى اراسىندا العاشقى رەت تسيفرلىق فورماتتا ساۋالناما جۇرگىزىلدى. قاتىسۋشىلاردىڭ بەلسەندىلىگى جوعارى بولدى. شارا بولاشاق كووپەراتيۆتى تالقىلاۋ جوباسىنىڭ باستى ءساتىنىڭ بىرىنە اينالدى, دەپ حابارلايدى Egemen.kz.
جۋىردا بۇۇ-نىڭ ازىق-ت ۇلىك جانە اۋىل شارۋاشىلىعى ۇيىمى (فاو) مەن قازاقستان ەكولوگيالىق ۇيىمدارى قاۋىمداستىعىنىڭ (قەۇق) «كليماتتىق تۇراقتىلىقتى قامتاماسىز ەتۋ جانە جايىلىمدىق القاپتاردى قالپىنا كەلتىرۋگە ارنالعان اگرولەسومەليوراتسيا» (GCP/KZK/005/GFF) جوباسى اياسىندا اقتوبە وبلىسىنىڭ ايتەكەبي مەن مۇعالجار اۋداندارىنىڭ فەرمەرلەرىنە ارنالعان كوشپەلى سەمينارلار مەن تاجىريبەلىك كورسەتىلىمدەر وتكىزىلدى.
بۇعان دەيىن, 1 قىركۇيەكتە وبلىس اكىمى اسحات شاحاروۆ بۇل باستامانىڭ ەرەكشە ماڭىزىن اتاپ ءوتىپ, كليماتتىڭ وزگەرۋىنە بەيىمدەلۋ شارالارى اۋىل شارۋاشىلىعىنىڭ دامۋى مەن جايىلىمداردىڭ ونىمدىلىگىن ساقتاۋىمەن تىكەلەي بايلانىستى ەكەنىن جەتكىزگەن بولاتىن. ارالتوعاي مەن تالدىساي اۋىلدىق وكرۋگتەرىندە جوبا ساراپشىلارى جەرگىلىكتى فەرمەرلەرمەن بىرلەسىپ, ەركەكشوپ پەن تۇيەجوڭىشقا سياقتى مالازىقتىق داقىلداردىڭ ەگىستىگىنە ارنالعان تاجىريبەلىك ۇلگى القاپتارىن قۇردى.
تۇقىم شارۋاشىلىقتار اراسىندا كەزەك ءپرينتسيپىن ەسكەرە وتىرىپ ءارى زاماناۋي اۋىلشارۋاشىلىق تەحنيكاسىن, سونىڭ قاتارىندا چيزەلدى سوقانى پايدالانۋ ارقىلى عىلىمي نەگىزدەلگەن ادىستەمە بويىنشا سەبىلدى. بۇل جۇمىس فەرمەرلەردىڭ ۇلكەن قىزىعۋشىلىعىن تۋدىردى.
جەرگىلىكتى قاۋىمداستىقتاردى وقىتۋ مەن تارتۋعا ەرەكشە كوڭىل ءبولىندى. وسى ماقساتتا بىرقاتار اۋىلدار مەن اۋدان اكىمدەرى قاتىسقان كوشپەلى سەمينارلار ءوتتى. سونداي-اق, اۋىل تۇرعىندارىمەن كەزدەسۋلەر دە ۇيىمداستىرىلدى. ءارتۇرلى فورماتتا وتكەن بۇل كەزدەسۋلەردە جايىلىمداردىڭ توزۋىن ازايتۋعا جانە كليماتتىق تۇراقتىلىقتى ارتتىرۋعا باعىتتالعان شارالار تالقىلاندى. فەرمەرلەر, ءۇي شارۋاشىلىعىنىڭ وكىلدەرى, ايەلدەر مەن جاستار ءوز پىكىرلەرىن ءبىلدىرىپ, ورتاق ۇسىنىستار جاسادى.
فاو مەن قەۇق وتكىزگەن وقىتۋ سەمينارلارى جاڭا تيپتەگى اۋىل كووپەراتيۆتەرىن قۇرۋ مۇمكىندىگى ارقىلى ءونىمنىڭ قوسىلعان قۇنىن ارتتىرۋعا مۇمكىندىك بەرەتىن زاماناۋي تەحنولوگيالىق شەشىمدەرگە ارنالعان ۆيدەوروليكتەر كورسەتتى.
«فەرمەرلەردىڭ جايىلىمداردى قالپىنا كەلتىرۋدىڭ پراكتيكالىق ادىستەرىنە قىزىعۋشىلىعى زور ەكەنىن كورىپ وتىرمىز. ماڭىزدىسى – جەرگىلىكتى قاۋىمداستىقتاردىڭ بەلسەندى قاتىسۋى. بۇل باستامانىڭ تۇراقتىلىعى مەن ءارى قاراي دامۋىنىڭ كەپىلى», دەدى جوبا ساراپشىسى.
فاو مەن قەۇق-نىڭ اقتوبە وبلىسىنداعى جوباسى كليماتتىق وزگەرىستەرگە بەيىمدەلۋ الەۋمەتتىك-ەكونوميكالىق دامۋىمەن ۇشتاسا الاتىنىنىڭ ايقىن ۇلگىسىنە اينالاتىنى ءسوزسىز.