ۇكىمەت وتىرىسىندا پرەمەر-مينيستر ولجاس بەكتەنوۆ پرەزيدەنتتىڭ 2025 جىلعى جولداۋىن ىسكە اسىرۋ اياسىندا شەكاراداعى وتكىزۋ پۋنكتتەرىنىڭ ينفراقۇرىلىمىن دامىتۋعا ەرەكشە كوڭىل بولىنەتىنىن اتاپ ءوتتى. بۇل كولىك-لوگيستيكالىق كەشەندى جەتىلدىرۋدىڭ ماڭىزدى بولىگى بولىپ سانالادى, دەپ حابارلايدى Egemen.kz.
پرەمەر-ءمينيستردىڭ ايتۋىنشا, جۇرگىزىلگەن شارالار ناتيجەسىندە شەكارادان ءوتۋ ۋاقىتى 2 ساعاتتان 30 مينۋتقا دەيىن قىسقارعان.
«ۇكىمەت شەكارادان ءوتۋ راسىمدەرىن جەتىلدىرۋدى جالعاستىرادى. وتكىزۋ پۋنكتتەرىندە جىلدامدىق پەن جايلىلىق ستاندارتقا اينالۋى كەرەك. قارجى مينيسترلىگى كولىك مينيسترلىگى, اكىمدىكتەر جانە شەكارا قىزمەتىمەن بىرلەسىپ جىل سوڭىنا دەيىن 8 وتكىزۋ پۋنكتىن جاڭعىرتۋدى اياقتاۋى ءتيىس», دەدى ولجاس بەكتەنوۆ.
سونىمەن قاتار كەدەن بەكەتتەرىنىڭ اينالاسىنداعى ينفراقۇرىلىمدى — قويمالار مەن سەرۆيستىك نىسانداردى دامىتۋ قاجەتتىگى ايتىلدى. قازىردىڭ وزىندە ساقتاۋ, سۇرىپتاۋ, تاسىمالداۋ جانە تسيفرلىق سەرۆيستەرگە ينۆەستيتسيا سالۋعا دايىن ينۆەستورلار بار.
پرەمەر-مينيستر قارجى مينيسترلىگىنە كولىك, اۋىل شارۋاشىلىعى, تسيفرلاندىرۋ مينيسترلىكتەرىمەن, شەكارا قىزمەتى جانە اكىمدىكتەرمەن بىرگە وسى ينفراقۇرىلىمدى دامىتۋ بويىنشا ناقتى شارالار قابىلداۋدى تاپسىردى.