كۇنى كەشە مەملەكەت باسشىسى قاسىم-جومارت توقاەۆ قازاقستان حالقىنا جىل سايىنعى ءداستۇرلى جولداۋىن جاريالادى. ەل دامۋىنىڭ جاڭا كەزەڭىن ايقىندايتىن ماڭىزدى قۇجاتتا ءبىلىم, عىلىم, تەحنولوگيا جانە ەكونوميكا سالالارىنا ەرەكشە نازار اۋدارىلدى. جولداۋدى تىڭداۋعا ەلىمىزدىڭ ءار وڭىرىنەن ءارتۇرلى سالا ماماندارى ارنايى شاقىرىلدى. سولاردىڭ ءبىرى – شىمكەنت قالاسىنىڭ تۇرعىنى, پەداگوگ مارات تاڭسىقباەۆ بولدى, دەپ حابارلايدى Egemen.kz.
العاش رەت پرەزيدەنت جولداۋىنا قاتىسقان ۇستاز ءوز اسەرىمەن ءبولىستى. ول بۇل ءىس-شارانىڭ كاسىبي بولاشاعىنا تىڭ سەرپىن بەرگەنىن اتاپ ءوتتى.
«مەن ءۇشىن ەڭ اسەرلىسى — ءبىلىم سالاسى مەن جاڭا تەحنولوگيالارعا, ونىڭ ىشىندە جاساندى ينتەللەكتكە بەرىلگەن ەرەكشە كوڭىل بولدى. پرەزيدەنت بۇل سالانىڭ ەل ەكونوميكاسى ءۇشىن ماڭىزدى قوزعاۋشى كۇش ەكەنىن اتاپ, جاساندى ينتەللەكتتى وقۋ پروتسەسىنە ەنگىزۋ قاجەتتىگىن ايتتى. سونىمەن قاتار, مۇعالىمدەردىڭ دە وسى باعىتتا بىلىكتىلىگىن ارتتىرۋى كەرەك ەكەنىن جەتكىزدى. بۇل سوزدەر مەنى جىگەرلەندىردى, ويتكەنى جاساندى ينتەللەكت تەك تەحنيكالىق سالا ماماندارىنا عانا ەمەس, ءبىز – پەداگوگتار ءۇشىن دە ءتيىمدى قۇرال بولا الادى», دەدى مارات تاڭسىقباەۆ.
پەداگوگتىڭ پىكىرىنشە, جولداۋدا كوتەرىلگەن ماسەلەلەر اسىرەسە ءبىلىم بەرۋ ساپاسىن ارتتىرۋعا باعىتتالعان. جاساندى ينتەللەكت ارقىلى وقۋ باعدارلامالارىن جاڭعىرتۋ, وقۋشىلار مەن ستۋدەنتتەردىڭ قابىلەتىن اشۋ جولدارىن جەتىلدىرۋ – قازىرگى زامان تالابىنا ساي باستامالار.
ول سونىمەن قاتار وقۋ پروتسەسىن جەكەلەپ جۇرگىزۋ مۇمكىندىكتەرىنە نازار اۋداردى. «جاساندى ينتەللەكت ءار وقۋشىنىڭ جەكە قابىلەتىن ەسكەرە وتىرىپ ءبىلىم بەرۋ – مۇعالىمدەر ءۇشىن ءتيىمدى قۇرال ءارى ۇلكەن كومەكشى», دەدى مارات تاڭسىقباەۆ.
«پرەزيدەنتتىڭ بۇگىنگى جولداۋى بارشا ۇستازدار ءۇشىن ۇلكەن موتيۆاتسيا بولدى دەپ ەسەپتەيمىن. ەل بولاشاعى – ءبىلىمدى جاستار مەن بىلىكتى مامانداردىڭ قولىندا ەكەنىن تاعى ءبىر مارتە ءتۇسىندىم. مەن دە ءوز تاراپىمنان جاساندى ينتەللەكتتى قولدانا وتىرىپ, وقىتۋ ادىستەرىمدى جاڭارتۋعا بار كۇشىمدى سالامىن», دەپ تۇيىندەدى ۇستاز.
ايتا كەتەيىك, مەملەكەت باسشىسى جولداۋدا ءبىلىم جانە عىلىم سالاسىنا ەرەكشە باسىمدىق بەرىپ, جاساندى ينتەللەكت پەن جاڭا تەحنولوگيالاردى ەنگىزۋ ارقىلى زاماناۋي ءارى ساپالى ءبىلىم بەرۋ جۇيەسىن قالىپتاستىرۋ قاجەتتىگىن اتاپ ءوتتى. بۇل باعىتتاعى ناقتى تاپسىرمالار الداعى ۋاقىتتا ىسكە اسىرىلۋى ءتيىس.