اباي وبلىسىندا وڭىرلىك ينۆەستيتسيالىق شتابتىڭ العاشقى وتىرىسى ءوتتى. ءوڭىر باسشىسى بەرىك ءۋاليدىڭ توراعالىعىمەن وتكەن جيىنعا ينۆەستورلار, كاسىپكەرلەر, سونداي-اق مەملەكەتتىك مەكەمەلەر وكىلدەرى قاتىستى.
وتىرىستا «Eurasia Agro Semey» جشس, «PANA Complex Semey» جشس, «Yqylas Invest» جشس جوبالارىنىڭ ىسكە اسىرىلۋ بارىسى تالقىلاندى. كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ مالىمەتىنشە, وڭىرلىك ينۆەستيتسيالىق جوبالار پۋلىنا 86 جوبا ەنگىزىلگەن. جالپى قۇنى 3,2 ترلن تەڭگەدەن اساتىن بۇل جوبالار 14 مىڭنان اسا جاڭا جۇمىس ورنىن اشۋدى كوزدەيدى. ولاردىڭ قاتارىندا اگرارلىق كەشەندەردى دامىتۋ, قايتا وڭدەۋ كاسىپورىندارىن اشۋ, يندۋستريالىق جانە الەۋمەتتىك ينفراقۇرىلىم نىساندارى بار.
«ەندى ينۆەستيتسيالىق شتابتىڭ وتىرىسىن اي سايىن وتكىزىپ وتىرامىز. اۋدانداردىڭ الەۋەتى, مۇمكىندىگى بولا تۇرا ينۆەستيتسيالىق جوبالار وتە از. بۇل باعىتتاعى جۇمىستى جانداندىرۋ كەرەك. ءبىز ينۆەستورلاردىڭ اباي وبلىسىنىڭ ەكونوميكاسىنا قوساتىن ۇلەسىن جوعارى باعالايمىز. ءوڭىر ەكونوميكاسىنىڭ دامۋىنا ايتارلىقتاي ۇلەس قوسىپ جۇرگەن بارلىق ينۆەستورعا العىس بىلدىرەمىن. ءوڭىردىڭ دامۋ قارقىنىنا ءاربىر ينۆەستيتسيالىق جوبا ايرىقشا ۇلەس قوسادى. زاڭناما اياسىندا ينۆەستورلارعا ءتيىستى قولداۋ كورسەتىلەدى», دەدى وبلىس باسشىسى.
جيىن قورىتىندىسىندا ءوڭىر باسشىسى ءوڭىردىڭ ەكونوميكالىق الەۋەتىن ءتيىمدى پايدالانۋ قاجەتتىگىن ايتىپ, قالا-اۋدان اكىمدەرىنە ينۆەستيتسيا تارتۋ باعىتىنداعى جۇمىستى جانداندىرۋدى تاپسىردى.
اباي وبلىسى