قر پارلامەنتى ءماجىلىسىنىڭ دەپۋتاتى نۇرسۇلتان بايتىلەسوۆ مەملەكەت باسشىسى قاسىم-جومارت توقاەۆتىڭ بۇگىنگى جولداۋىنا قاتىستى پىكىر ءبىلدىردى. ونىڭ ايتۋىنشا, قۇجاتتا ۇلتتىق ەكونوميكانى دامىتۋ مەن الەۋمەتتىك سالانى جەتىلدىرۋدىڭ نەگىزگى قىرلارى جان-جاقتى قامتىلعان, دەپ جازادى Egemen.kz.
«جولداۋدا جەتى باعىتقا ايرىقشا نازار اۋدارىلدى. ولار: ينۆەستيتسيالىق ساياسات, ونەركاسىپتى نىعايتۋ, اگرارلىق سەكتوردى دامىتۋ, كولىك جانە تۋريزم سالاسىن وركەندەتۋ, تۇرعىن ءۇي-كوممۋنالدىق شارۋاشىلىعىن جاڭعىرتۋ, كاسىپكەرلىكتى قولداۋ جانە ادامي كاپيتالدى جەتىلدىرۋ. بۇل شارالاردىڭ بارلىعى تۇراقتى ءارى سەرپىندى ەكونوميكالىق ءوسىم قالىپتاستىرۋعا باعىتتالعان. ناتيجەسىندە ءاربىر ازاماتتىڭ ءومىر ساپاسىن جاقسارتۋعا مۇمكىندىك بەرەدى», – دەدى نۇرسۇلتان بايتىلەسوۆ.
دەپۋتاتتىڭ ايتۋىنشا, جولداۋدا تسيفرلىق ترانسفورماتسيانىڭ ماڭىزدىلىعى دا ەرەكشە اتاپ ءوتىلدى.
«پرەزيدەنت تسيفرلاندىرۋدى ەل ءومىرىنىڭ بارلىق سالاسىن جاڭعىرتۋدىڭ نەگىزگى وزەگى دەپ اتادى. جاساندى ينتەللەكتىنى ەنگىزۋ مەن تسيفرلاندىرۋ مۇمكىندىكتەرىن ارتتىرۋ جاڭا تسيفرلىق كودەكستىڭ ىرگەتاسى بولادى. بۇل قۇجات جاساندى ينتەللەكت پەن پلاتفورمالىق ەكونوميكانى پايدالانۋدىڭ نەگىزگى باعىتتارىن ايقىندايدى. مۇنداي قادامدار ۇلتتىق ەكونوميكانىڭ باسەكەگە قابىلەتتىلىگىن ارتتىرادى», – دەدى ول.
سونىمەن بىرگە كيبەرقاۋىپسىزدىك ماسەلەسى دە نازاردان تىس قالعان جوق.
«مەملەكەت باسشىسى كيبەرقاۋىپتەرگە قارسى جاڭا ينتەللەكتۋالدى جۇيە قۇرۋدى تاپسىردى. بۇل ازاماتتاردىڭ دەرەكتەرىن قورعاپ, قارجىلىق وپەراتسيالاردىڭ تۇراقتىلىعىن قامتاماسىز ەتۋگە باعىتتالعان كەشەندى شارالاردىڭ ماڭىزدى بولىگى. مۇنداي قادامدار بيزنەس جۇرگىزۋدە جانە ازاماتتاردىڭ كۇندەلىكتى ومىرىندە اشىقتىقتى, قاۋىپسىزدىكتى جانە سەنىمدىلىكتى نىعايتىپ, ەلىمىزدىڭ جاھاندانۋ داۋىرىندەگى تۇراقتى دامۋىنا نەگىز بولادى», – دەدى ءماجىلىس دەپۋتاتى.