قازاقستان ەنەرگەتيكا ءمينيسترى ەرلان اقكەنجەنوۆ ەلدەگى بەنزين باعاسىنا قاتىستى الاڭداۋشىلىققا جاۋاپ بەرىپ, قازىرگى جاعداي تۇراقتى ەكەنىن ايتتى, دەپ حابارلايدى Egemen.kz.
8 قىركۇيەك 2025 جىلى ەنەرگەتيكا ءمينيسترى ەرلان اقكەنجەنوۆ قازاقستاندىقتاردىڭ بەنزين باعاسىنىڭ وسۋىنە بايلانىستى قويعان ساۋالدارىنا تۇسىنىكتەمە بەردى.
«بۇل جەردە دوللارعا ەشقانداي بايلانىس جوق. ىشكى سۇرانىس پەن ۇسىنىس بار. رەسەيدەگى جاعدايعا بايلانىستى حالىقتا الاڭداۋشىلىق تۋىنداپ وتىر. ويتكەنى بىزدە 7 مىڭ شاقىرىمنان استام ورتاق شەكارا بار. سوندىقتان ازاماتتارىمىزدىڭ بەلگىلى ءبىر دەڭگەيدە ۋايىمداۋى تۇسىنىكتى», دەدى ول.
ءمينيستردىڭ ايتۋىنشا, بۇگىندە اي-95 ماركالى بەنزيننىڭ قورى جەتكىلىكتى.
«وتكەن اپتادا قورىمىز 21 كۇنگە جەتسە, بيىلعى اپتادا 26 كۇنگە جەتتى. قور كوبەيىپ جاتىر, زاۋىتتار تۇراقتى جۇمىس ىستەپ تۇر. اي-92 ماركالى بەنزين بويىنشا دا جاعداي وسىنداي. رەسەيدەگى جاعداي بىزدە قايتالانادى دەپ ويلامايمىن», دەدى اقكەنجەنوۆ.
سونىمەن قاتار ول مينيسترلىك تاراپىنان بەنزيندى ەلدەن شىعارۋعا تىيىم سالۋ شارالارى تۇراقتى تۇردە ۇزارتىلىپ وتىرعانىن ەسكە سالدى.