مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا پارلامەنتتىك رەفورما باستاماسىنا قاتىستى تۇسىنىكتەمە بەرىپ, بۇل ۇدەرىستىڭ اشىق تۇردە جۇرگىزىلەتىنىن ايتتى, دەپ جازادى Egemen.kz.
پرەزيدەنتتىڭ سوزىنشە, ءماجىلىستىڭ قازىرگى قۇرامى بارلىق زاڭدىق راسىمدەر اياقتالعانعا دەيىن ءوز جۇمىسىن جالعاستىرا بەرەدى. سەنات تا جالپىۇلتتىق رەفەرەندۋم قورىتىندىسى شىعىپ, جاڭا پارلامەنت سايلانعانعا دەيىن تۇراقتى قىزمەتىن اتقارادى. بۇل رەتتە ساياسي پارتيالاردىڭ دا باسەكەگە دايىندالۋىنا جەتكىلىكتى ۋاقىت بەرىلەدى.
«دەپۋتاتتارىمىز ناعىز مەملەكەتشىل ازامات رەتىندە بۇل ماسەلەگە زور جاۋاپكەرشىلىكپەن ءارى تۇسىنىستىكپەن قارايدى دەپ ويلايمىن. تۇپتەپ كەلگەندە, ساياسي رەفورمالاردىڭ ءبارى ەلىمىزدىڭ ءبىرتۇتاس ينستيتۋتسيونالدى جۇيەسىنىڭ اجىراماس بولىگىنە اينالادى», – دەدى مەملەكەت باسشىسى.
سونىمەن قاتار قاسىم-جومارت توقاەۆ ءوز باستاماسىنىڭ نەگە الدىن الا جاريالانعانىن ءتۇسىندىردى.
«ارينە, زاڭدى سۇراق تۋىنداۋى مۇمكىن: پرەزيدەنت پارلامەنتتىك رەفورما جاساۋ قاجەتتىگى تۋرالى نەگە سونشالىقتى ەرتە جاريالاپ جاتىر؟ ايتپەسە, ساياسي تەحنولوگيانىڭ قاعيداسىنا سايكەس مۇنداي شارالار توسىننان, كۇتپەگەن جەردەن جاسالادى ەمەس پە؟ بىراق مەن وسىعان دەيىن دە ايتتىم, تاعى دا قايتالاپ ايتامىن: مەن ەلىمىزدىڭ جانە حالقىمىزدىڭ تاعدىرىنا قاتىستى قانداي دا ءبىر ماسەلەگە كەلگەندە تەك قانا اشىق ساياسات جۇرگىزۋ كەرەك دەپ سانايمىن. مۇنداي اۋقىمدى رەفورمانى قوعامنان قۇپيا ۇستاۋعا بولمايدى دەپ ەسەپتەيمىن», – دەدى ول.
پرەزيدەنت وسىنداي تاعدىرلى ماسەلەلەر بويىنشا حالىقپەن اشىق سۇحبات جۇرگىزۋ قاجەتتىگىن باسا ايتتى.
«سوندا عانا ءبارىمىز ءبىر ەل بولىپ, ادىلەتتى ءارى قۋاتتى قازاقستاندى قۇرۋ جولىندا تاعى ءبىر ماڭىزدى قادام جاسايمىز. بارشاڭىزعا اماندىق, تابىس تىلەيمىن. قازاقستانىمىز ماڭگى جاساي بەرسىن!» – دەدى قاسىم-جومارت توقاەۆ.