پرەزيدەنت قاسىم-جومارت توقاەۆ جولداۋىندا قازىرگى ۇرپاقتىڭ ءپاتريوتيزمدى قابىلداۋ ەرەكشەلىگىنە توقتالدى. مەملەكەت باسشىسىنىڭ ايتۋىنشا, جاستار ەلگە دەگەن سۇيىسپەنشىلىكتى جاڭالىق اشۋمەن, جاڭا ءىس باستاۋىمەن بايلانىستىرادى, دەپ جازادى Egemen.kz.
«قازىرگى كوكىرەگى وياۋ جاس ۇرپاق وتانشىلدىقتى باسقاشا تۇسىنەدى. جاستاردىڭ باسىم بولىگى اسىرەۇلتشىلدىقتى دا, اسىرەدىنشىلدىكتى دە قولدامايدى. ولار ءۇشىن ءپاتريوتيزمنىڭ باستى كورسەتكىشى – جاسامپازدىق پەن جاڭاشىلدىق. بۇعان قوسا «ەلدى ءسۇيۋ دەگەنىمىز – حالىققا پايداسى تيەتىن جاڭا ءىس باستاۋ» دەپ ويلايدى. جاستار قازاقستاندى دامىعان, وركەندەگەن مەملەكەت رەتىندە كورۋگە ۇمتىلادى», دەدى پرەزيدەنت.
مەملەكەت باسشىسى وسكەلەڭ ۇرپاقتىڭ بويىنداعى ءپاتريوتيزمدى بولاشاققا دەگەن شىنايى ۇمتىلىس دەپ باعالادى.
«بۇل – قوعام ساناسىندا بولىپ جاتقان وزگەرىستىڭ ايقىن كورىنىسى. مەن جاستاردىڭ كۇش-جىگەرىنە, دارىنى مەن بىلىمىنە سەنەمىن. ءبىز قولعا الىپ جاتقان بارلىق اۋقىمدى جۇمىس – ولاردىڭ جارقىن بولاشاعى ءۇشىن جاسالىپ جاتىر», دەدى توقاەۆ.
پرەزيدەنت جاستاردىڭ عىلىم-بىلىمگە دەگەن تالپىنىسىن قولداۋدىڭ ماڭىزىن اتاپ ءوتىپ, جاڭا داۋىردە جاساندى ينتەللەكتتىڭ ورنى ەرەكشە ەكەنىن ايتتى. سونداي-اق مەملەكەت باسشىسى ابايدىڭ «ادامنىڭ ادامشىلىعى اقىل, عىلىم, جاقسى اتا, جاقسى انا, جاقسى قۇربى, جاقسى ۇستازدان بولادى» دەگەن ناقىلىن مىسالعا الدى.
«وركەنيەتتى ءارى وزىق ەلدىڭ زاڭى ءادىل, بيلىگى بىلىكتى, ازاماتتارى سانالى جانە بەلسەندى بولۋعا ءتيىس. مەملەكەتتىك دەڭگەيدە قابىلدانعان ءاربىر شەشىم حالىقتىڭ تۇرمىسىن جاقسارتۋ, ەكونوميكانى تۇراقتاندىرۋ, الەۋمەتتىك ادىلدىك ورناتۋ ءۇشىن جاسالعان ىسپەن ولشەنەدى. سوندا عانا ءبىز جاڭا تۇرپاتتى, مىقتى ەل بولامىز», دەدى پرەزيدەنت.