ەۋروپالىق كوميسسيا Google كومپانياسىنا جارناما بيزنەسىندەگى باسەكەلەستىككە قارسى ارەكەتتەرى ءۇشىن 2,95 ميلليارد ەۋرو ايىپپۇل سالدى. كوميسسيانىڭ مالىمەتىنشە, Google 2014 جىلدان بەرى نارىقتاعى ۇستەمدىگىن تەرىس پايدالانىپ كەلگەن. ال بۇل جاعداي باسەكەلەستەر مەن ونلاين-باسپاگەرلەرگە زيان تيگىزگەن, دەپ جازادى Egemen.kz.
ەو-نىڭ باسەكەلەستىك ماسەلەلەرى جونىندەگى كوميسسارى تەرەزا ريبەرا «شىنايى ەركىندىك ءبارى تەڭ جاعدايدا باسەكەگە تۇسكەندە جانە ازاماتتاردا تاڭداۋ قۇقىعى تولىق ساقتالعاندا عانا بولادى» دەپ مالىمدەدى.
Google-گە بۇل تاجىريبەنى توقتاتىپ, جاعدايدى تۇزەتۋ تاپسىرىلدى. كومپانيا 60 كۇن ىشىندە ەۋروكوميسسياعا ناقتى جوسپار ۇسىنۋى كەرەك.
الايدا Google ايىپپۇلمەن كەلىسپەي وتىر. كومپانيانىڭ ۆيتسە-پرەزيدەنتى لي-ەنن مالحوللاند:
«ەۋروكوميسسيا نەگىزسىز ايىپپۇل سالىپ وتىر جانە تالاپ ەتىپ وتىرعان وزگەرىستەر مىڭداعان ەۋروپالىق كومپانيالاردىڭ تابىسىن قيىنداتادى. جارناما بەرۋشىلەر مەن ساتىپ الۋشىلارعا قىزمەت كورسەتۋدە ەشقانداي باسەكەگە قارسى ارەكەت جوق, بالاما قىزمەتتەر بۇرىنعىدان دا كوپ», دەدى.
بۇعان دەيىن كاليفورنيا سوتى Google كومپانياسىنا پايدالانۋشىلاردىڭ دەرەكتەرىن زاڭسىز جيناعانى ءۇشىن 314 ميلليون دوللار ايىپپۇل سالعان. Bloomberg دەرەگىنشە, Android قولدانۋشىلارىنىڭ دەرەكتەرى كەلىسىمسىز جينالعان.