استانا. 18 اقپان. قىزىلوردا وبلىسى قازالى اۋدانىنا استانادان مونو جانە شاعىن قالالاردى دامىتۋ جونىندەگى جەتەكشى-ساراپشى, فينليانديا ەلىنىڭ ازاماتى, دوكتور تيمو پيراينەن ارنايى ىسساپارمەن كەلىپ, مەملەكەتتىك باعدارلامانىڭ تىزىمىنە ەنگەن قازالى قالاسىمەن تانىستى. بۇل تۋرالى egemen.kz ءتىلشىسى حابارلادى.
دوكتور تيمو پيراينەندى اۋدان اكىمى باحىت جاحانوۆ قابىلداپ, قازالى قالاسىنىڭ الداعى دامۋ جوسپارى بويىنشا پىكىرلەستى.
بەلگىلەنگەن جۇمىس جوسپارىنا سايكەس قالا اكىمى ن.بوزعۇلوۆپەن بىرگە قازالى قالاسىنداعى «نۇرالى» مەشىتىنە, «عانيباي» كەرۋەن سارايىنا, م.گوركي اتىنداعى كىتاپحانا ورنالاسقان نوعاي مەشىتىنە, «شاعالا» بالالار ساۋىقتىرۋ دەمالىس ورتالىعىنا, ورمان زەرتتەۋ ورتالىعى مەن «وياز» باعىنا, ع.مۇراتباەۆتىڭ مەموريالدىق مۋزەيىنە باردى. ارالاۋ كەزىندە قالانى دامىتۋعا قانداي مۇمكىندىكتەر بار ەكەنىنە زەرتتەۋ جۇرگىزىپ, قالا اكىمىنىڭ ۇسىنىسىن تىڭدادى. ءوز كەزەگىندە قالا اكىمى ن.بوزعۇلوۆ قالانى ءتورت باعىتتا دامىتۋعا قولايلى ەكەندىگىن جەتكىزدى.
- ءبىرىنشى باعىت بويىنشا قازالى قالاسىندا بىرنەشە تاريحي ەسكەرتكىشتەردىڭ ورنالاسۋىنا سايكەس تۋريزم سالاسىن دامىتۋ.
- ەكىنشى باعىت بويىنشا قالا تۇرعىندارىنىڭ باۋ-باقشا داقىلدارىن ەگۋمەن اينالىساتىندىقتان جىلىجاي سالۋدى قولعا الۋ.
- ءۇشىنشى باعىت بۇرىنعى قازالى رەمونت مەكەمەسىن قايتا جاڭعىرتىپ, اۋىلشارۋاشىلىق تەحنيكالىن جوندەۋ جونىندە ارنايى تسەحتار اشۋ.
- ءتورتىنشى باعىت بويىنشا سىرداريا وزەنىنىڭ كونە ساعاسىنىڭ بويىنا توعان اشىپ, بالىق جانە قۇستار ءوسىرۋدى قولعا الۋ.
ءىسساپار بارىسىندا دوكتور تيمو پيراينەن اۋداندىق ەكونوميكا جانە بيۋدجەتتىك جوسپارلاۋ, اۋداندىق كاسىپكەرلەر, ونەركاسىپ جانە تۋريزم, اۋداندىق تۇرعىن ءۇي, كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى, اۋداندىق جۇمىسپەن قامتۋ جانە الەۋمەتتىك باعدارلامالار, اۋداندىق ىشكى ساياسات بولىمدەرىنىڭ باسشىلارىمەن كەزدەسىپ, قازالى قالاسىن دامىتۋ جايىن تالقىلادى.
قازالى قالاسىن ارالاپ, ونداعى جۇمىستارمەن مۇقيات تانىسقان دوكتور تيمو پيراينەن الداعى شىلدە ايىنا دەيىن قالانىڭ ستراتەگيالىق جانە وپەراتيۆتى جوسپارىن ازىرلەيتىنىن ايتتى.
جولدىباي بازار.
دەرەك, سۋرەت: egemen.kz.