2025 جىلدىڭ مامىر ايىندا Enbek.kz ەلەكتروندى ەڭبەك بيرجاسىندا وقۋشىلارعا ارنالعان «مەنىڭ جازعى كانيكۋلىم» ارنايى ءبولىمى ىسكە قوسىلدى. ونىڭ كومەگىمەن دەمالىس كەزىندە 14 پەن 18 جاس ارالىعىنداعى 5,4 مىڭ جاس قازاقستاندىق جۇمىسقا ورنالاسقان, دەپ حابارلايدى Egemen.kz.
جالپى جازعى ماۋسىمدا 16-18 جاستاعى جاستار تاراپىنان 13,6 مىڭ تۇيىندەمە ورنالاستىرىلسا, 14-15 جاس ارالىعىنداعى جاسوسپىرىمدەردىڭ اتا-انالارى 356 جەكە كابينەت اشىپ, ونىڭ ىشىندە 112 اتا-انا 129 تۇيىندەمە جىبەرگەن.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, ەڭبەك كودەكسىنە سايكەس, 14 جاستان باستاپ جاسوسپىرىمدەر تەك دەنساۋلىققا زيانسىز, ساباقتان تىس ۋاقىتتا ورىندالاتىن جۇمىستارعا عانا قابىلدانا الادى. وسى تالاپتارعا سايكەس شامامەن 80 ماماندىق بەلگىلەنگەن. ولاردىڭ قاتارىندا تاربيەشىنىڭ كومەكشىسى, دۇكەن ساتۋشىسى, تازالاۋشى, كۋرەر, SMM-مەنەدجەر سياقتى قىزمەتتەر بار.
1 قىركۇيەكتەگى دەرەك بويىنشا, «مەنىڭ جازعى كانيكۋلىم» بولىمىندە 305 جۇمىس بەرۋشى تاراپىنان وسىنداي 2,1 مىڭ بوس جۇمىس ورنى جاريالانعان. ايتا كەتەرلىگى, ۇسىنىستاردى تىكەلەي جۇمىس بەرۋشىلەر ەنگىزەتىندىكتەن, كەيبىر وڭىرلەردە مۇنداي بوس ورىندار بولماۋى مۇمكىن. دەگەنمەن, اتالعان فۋنكتسيونال الداعى ۋاقىتتا دا ساقتالىپ, جازعى كەزەڭدە كامەلەتكە تولماعانداردى جۇمىسقا ورنالاستىرۋعا مۇمكىندىك بەرەدى. ول ءۇشىن جۇمىس بەرۋشىلەر بوس جۇمىس ورنى جاريالاعان كەزدە ارنايى بەلگى قويۋى قاجەت.