پروكۋرورلار دابىل قاقتى

باس پروكۋراتۋرا قۇقىقتىق ستاتيس­تيكا جانە ارنايى ەسەپكە الۋ جونىندەگى كوميتەتىنىڭ پاۆلودار وبلىسى بويىنشا دەپارتامەنتى ەرتىس-بايان ءوڭىرى ەلىمىزدەگى ينتەرنەت-الاياقتىق دەڭگەيى جوعارى بەس ايماقتىڭ قاتارىنا كىرەتىنىن ءمالىم ەتتى.

«الماتى مەن استانا قالالارى, سونداي-اق قاراعاندى مەن الماتى وبلىستارىنان كەيىنگى ورىندا ءبىزدىڭ ءوڭىر تۇر. العاشقى جەتى ايدا وبلىستا الاياقتىققا قاتىستى 1 208 دەرەك تىركەلگەن. وتكەن جىلدىڭ سايكەس كەزەڭىندە بۇل كورسەتكىش 842 بولعان, ياعني ءوسىم 43 پايىزدان اسادى. الاياقتاردىڭ ارەكەتىنەن كەلگەن جالپى ماتەريالدىق شىعىن 164 ملن تەڭگەنى قۇرادى, ونىڭ تەك 12 ملن تەڭگەسى وتەلگەن», دەپ حابارلادى دەپارتامەنتتەن.

الاياقتىق وقيعالارىنىڭ ەڭ كوپ ءوسۋى پاۆلودار قالاسىندا جانە تەرەڭكول, ۋسپەن اۋداندارىندا بايقالعان. ال اققۋلى, اقتوعاي جانە شارباقتى سياقتى اۋدانداردا كەرىسىنشە تومەندەگەن.

قۇقىقتىق ستاتيستيكا دەپارتامەنتىنىڭ مالىمەتىنە سايكەس, تىركەلگەن الاياقتىق­تاردىڭ باسىم بولىگى (86,3 پايىز) ينتەرنەت ارقىلى جاسالعان. الاياقتىق قىلمىستاردىڭ اشىلۋ كورسەتكىشى نەبارى – 28,1 پايىز, ال ينتەرنەت-الاياقتىقتار بويىنشا – 17,5 پا­يىز دەڭگەيىندە. الاياقتاردىڭ قۇرباندارى كوبىنە 60 جاستان اسقان ازاماتتاردى قۇرايدى (جابىرلەنۋشىلەردىڭ 25,9 پايىزى).

پروكۋراتۋرا وكىلدەرىنىڭ ايتۋىنشا, الاياقتىقتاردىڭ ءوسۋىنىڭ بىرنەشە نەگىزگى سەبەبى بار. بۇل – قىزمەت كورسەتۋ, ساۋدا جانە قارجى سالالارىنداعى تسيفرلاندىرۋدىڭ جاپپاي ءوسۋى, ەگدە جاستاعى ازاماتتار اراسىنداعى تسيفرلىق ساۋاتتىلىقتىڭ جەتكىلىكسىزدىگى, سونداي-اق بۇل سالاداعى قىلمىستاردى تەرگەۋدىڭ كۇردەلىلىگى.

اتالعان ماسەلەمەن كۇرەسۋ ءۇشىن پروكۋرورلار ونلاين-پلاتفورمالاردا پايدالانۋشىلاردى مىندەتتى تۇردە يدەنتيفيكاتسيالاۋدى, كۇماندى وپەراتسيالاردى باقىلاۋ تەتىكتەرىن ەنگىزۋدى, نەسيەلەر بەرۋگە باقىلاۋدى كۇشەيتۋدى, سونداي-اق ازاماتتاردىڭ وزدەرىنىڭ ساق بولۋىن ۇسىنادى. ونلاين-پلاتفورمالاردىڭ ءوز كليەنتتەرىنىڭ قاۋىپسىزدىگى ءۇشىن جاۋاپ­كەرشىلىگىن ارتتىرۋ جانە ازاماتتاردى كيبەرقاۋىپسىزدىك نەگىزدەرىنە بەلسەندى وقىتۋ – الاياقتىقپەن كۇرەستى ايتارلىقتاي جەڭىلدەتە الادى.

پاۆلودار وبلىسى