اتىراۋدا وتباسىنىڭ شىرقىن بۇزىپ, تۇمىستىق زورلىق-زومبىلىق كورسەتكەندەرگە قاتىستى 2700-دەن استام قورعاۋ نۇسقاۋى بەرىلگەن, دەپ حابارلايدى Egemen.kz.
وبلىستىق جەرگىلىكتى پوليتسيا قىزمەتى باسقارماسى وتباسىلىق-تۇرمىستىق زورلىق-زومبىلىققا قارسى كۇرەس ءبولىمىنىڭ ينسپەكتورى ايگەرىم مۇراتوۆانىڭ ءمالىم ەتۋىنشە, قازىر داعدارىس ورتالىعىنا 5 ايەل مەن 11 بالا ورنالاستىرىلعان.
«جىل باسىنان بەرى اكىمشىلىك قۇقىق بۇزۋشىلىق تۋرالى كودەكسىنىڭ 73-بابىمەن 3232 اكىمشىلىك قۇقىق بۇزۋشىلىق تىركەلدى. وتباسىنا زورلىق-زومبىلىق كورسەتەتىندەرگە قاتىستى 2700-دەن اسا قورعاۋ نۇسقاماسى شىعارىلدى. ونىڭ ىشىندە 700 ادامعا ەرەكشە تالاپتار بەلگىلەندى», دەيدى ايگەرىم مۇراتوۆا.
ونىڭ ايتۋىنشا, اكىمشىلىك قۇقىق بۇزۋشىلىق تۋرالى جانە قىلمىستىق كودەكستەرگە ەنگىزىلگەن وزگەرىستەرگە سايكەس جابىرلەنۋشى ارىز جازباسا دا پوليتسيا قۇقىق بۇزۋشىعا قاتىستى اكىمشىلىك ءىس قوزعاي الادى. بۇل – زورلىق-زومبىلىق قۇرباندارىن قورعاۋعا زور مۇمكىندىك بەرەتىن قۇقىقتىق قادام.
«كوپ جاعدايدا قۇقىق بۇزۋشىلىقتار ەكونوميكالىق سيپاتتا بولادى. مىسالى, ەر ادامدار تابىسىن وتباسىنا بەرمەي, ويىن اۆتوماتتارىنا نەمەسە ىشىمدىككە جۇمسايدى. پسيحولوگيالىق قىسىم دا كەڭ تارالىپ وتىر. مۇندايدا ايەلگە قول كوتەرىلمەگەنىمەن, جۇيەلى تۇردە ءتىل تيگىزۋ, كەمسىتۋ سەكىلدى ارەكەتتەر ءجيى كەزدەسەدى. تۇرمىستىق زورلىق-زومبىلىققا اكەلەتىن نەگىزگى سەبەپتەردىڭ ءبىرى – الكوگولگە, قۇمار ويىنعا جانە ەسىرتكىگە تاۋەلدىلىك», دەپ مالىمدەدى ايگەرىم مۇراتوۆا.