قازاقستان ءۇشىن مال شارۋاشىلىعى – ازىق-ت ۇلىك قاۋىپسىزدىگىن قامتاماسىز ەتەتىن ءارى اگروونەركاسىپ كەشەنىندەگى ۇلەسى 40%-دى قۇرايتىن ستراتەگيالىق باعىت. 2025 جىلدىڭ قاڭتار–شىلدە ايلارىندا سالاداعى ءوندىرىس كولەمى 3,4%-عا ءوسىپ, شامامەن 2 ترلن تەڭگەگە جەتتى. ەت ءوندىرىسى 2%-عا ارتىپ, 608,8 مىڭ توننانى قۇرادى, ال ءسۇت ءوندىرۋ كولەمى 6,5%-عا ۇلعايىپ, 2,25 ملن تونناعا دەيىن جەتكەن, دەپ حابارلايدى Egemen.kz.
ءىرى قارا مال 8,7 ملن باسقا (+0,3%), جىلقى 4,6 ملن باسقا (+6,7%), تۇيە 300 مىڭ باسقا (+3,9%), ال قۇس سانى 48 ملن باسقا دەيىن (+6,6%) ارتتى. دەگەنمەن, قوي سانى 3,7%-عا ازايىپ, 21,1 ملن باستى قۇراعان.
2025 جىلدىڭ العاشقى بەس ايىندا ەت ەكسپورتى ايتارلىقتاي وسكەن. سيىر ەتى ەكسپورتى 2,5 ەسەگە (12,3 مىڭ توننا), قوي ەتى 2,6 ەسەگە (9,2 مىڭ توننا) كوبەيگەن. تاريحتا العاش رەت 797 توننا شوشقا ەتى سىرتقى نارىققا جەتكىزىلگەن. بۇل قازاقستاندىق ءونىمنىڭ ساپاسى جوعارى ەكەنىن جانە حالىقارالىق سۇرانىسقا يە ەكەنىن ايعاقتايدى.
ءسۇت فەرمالارىن دامىتۋعا ەرەكشە كوڭىل بولىنگەن. 2023–2025 جىلدارى جىلىنا 300 مىڭ توننادان استام ءونىم بەرەتىن 48 ءسۇت تاۋارلى فەرما سالىنعان. جاڭا كەشەندەردە ورتاشا ساۋىم 8,2 مىڭ ءليتردى قۇراسا, ۇزدىك شارۋاشىلىقتاردا بۇل كورسەتكىش 11 مىڭ ليترگە دەيىن جەتىپ وتىر. مۇنداي ونىمدىلىك ەۋروپانىڭ جەتەكشى ەلدەرىنىڭ دەڭگەيىنە سايكەس كەلەدى. 2024 جىلى ءسۇت ءوندىرىسى 688 مىڭ تونناعا جەتىپ, 2022 جىلمەن سالىستىرعاندا 32%-عا ءوستى. 2025 جىلى قوسىمشا 32 فەرما ىسكە قوسىلىپ, تاعى 152 مىڭ توننا ءونىم الۋ جوسپارلانىپ وتىر.
اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا, ەتتى ءىرى قارا شارۋاشىلىعىندا نەسيەلەر 5% مولشەرلەمەمەن ۇسىنىلادى.
«ەتتى ءىرى قارا مال شارۋاشىلىعىندا نەسيە تازا 5%-بەن بەرىلەدى. قارجىلاندىرۋ كولەمى 50 ملرد تەڭگە. ال بيىل وڭدەۋ كاسىپورىندارىنىڭ اينالىم قاراجاتىن جەڭىلدەتىلگەن نەسيەلەۋ باعىتىنا 44 ملرد تەڭگە ءبولىندى. سونىمەن قاتار فەرمەرلەردىڭ كەپىلگە قولجەتىمدىلىگى ماسەلەسىن شەشۋ ءۇشىن نەسيە سوماسىنىڭ 85%-ىنا دەيىن كەپىلدىك بەرۋ باعدارلاماسى جۇزەگە اسىرىلۋدا», دەدى ايداربەك ساپاروۆ.
بيىلعى جىلدىڭ 1 تامىزىنان باستاپ بورداقىلاۋ الاڭدارىنا 5% مولشەرلەمەمەن نەسيە بەرۋ باعدارلاماسى ىسكە قوسىلدى. بۇل باعىتقا 50 ملرد تەڭگە قاراستىرىلعان. جاڭا باعدارلاما ءوندىرىس قۋاتىن 60%-دان جوعارى دەڭگەيدە پايدالانۋعا جانە ءونىمنىڭ كەمىندە جارتىسىن ىشكى نارىققا باعىتتاۋعا مۇمكىندىك بەرەدى.
اۋستراليالىق ۇلگى نەگىزىندە ەت كلاستەرلەرى دامي باستادى. 2024 جىلى جالپى قۇنى 9 ملرد تەڭگەنى قۇرايتىن ءتورت جوبا قارجىلاندىرىلسا, 2025 جىلى 21,7 ملرد تەڭگەنىڭ ون جوباسى ايقىندالدى. تۇركىستان وبلىسىندا تۇيىرشىكتەلگەن جەم وندىرەتىن زاۋىت پەن 15 مىڭ باسقا ارنالعان بورداقىلاۋ الاڭى اشىلدى. بۇل باستامالار «جەمشوپتەن باستاپ قايتا وڭدەۋگە دەيىنگى» تولىق وندىرىستىك تىزبەكتى قالىپتاستىرۋعا جاعداي جاسايدى.
سوڭعى بەس جىلدا قۇس ەتى يمپورتى 42%-دان 20%-عا دەيىن قىسقاردى. 2024 جىلى جامبىل, قىزىلوردا, پاۆلودار, تۇركىستان, سولتۇستىك قازاقستان جانە ۇلىتاۋ وبلىستارىندا جىلىنا 15,9 مىڭ توننا ەت وندىرەتىن التى قۇس فابريكاسى پايدالانۋعا بەرىلدى. نەگىزگى ماقسات – بۇل سالادا ىشكى قاجەتتىلىكتى تولىقتاي ءوز ونىمىمىزبەن قامتاماسىز ەتۋ.
وسىلايشا, قازاقستانداعى مال شارۋاشىلىعى قارقىندى دامىپ كەلەدى. ءوندىرىس كولەمىنىڭ ارتۋى, ەكسپورتتىڭ ۇلعايۋى, جاڭا قولداۋ تەتىكتەرىنىڭ ەنگىزىلۋى جانە زاماناۋي كلاستەرلەردىڭ قۇرىلۋى سالانى اگروونەركاسىپ كەشەنىنىڭ باستى درايۆەرلەرىنىڭ بىرىنە اينالدىرىپ وتىر.