قازاقستاندا بانكتەر مەن ميكروقارجى ۇيىمدارى نەسيە بەرۋ ەرەجەلەرىن قاتاڭداتادى. قارجى نارىعىن رەتتەۋ جانە دامىتۋ اگەنتتىگىنىڭ (قنردا) جاڭا قاۋلىسى حالىقتىڭ شامادان تىس قارىزعا باتۋىنىڭ الدىن الۋعا باعىتتالعان. ەگەر قارىز الۋشىنىڭ ايلىق تابىسى ەڭ تومەنگى كۇنكورىس دەڭگەيىنەن تومەن بولسا, وعان نەسيە راسىمدەلمەيدى. سونداي-اق ادامنىڭ بارلىق نەسيەلەرى ايلىق تابىسىنىڭ 50%-ىنان اسىپ كەتسە, جاڭا قارىز الۋ مۇمكىن بولمايدى, دەپ جازادى Egemen.kz.
بانكتەن العان نەسيە بويىنشا 30 كۇننەن استام, ال ميكروقارجىلىق قارىزدى 1 كۇننەن ارتىق كەشىكتىرگەندەرگە نەسيە بەرىلمەيدى. كەيىنگى ءۇش جىلدا قارىزى تولىق كەشىرىلگەن ازاماتتارعا دا جاڭا نەسيە الۋ قيىندايدى. ال كەپىلسىز تۇتىنۋشىلىق نەسيە مەرزىمى 5 جىلدان اسپاۋى ءتيىس.
قايتا قۇرىلىمداۋعا قاتىستى دا تالاپتار كۇشەيەدى. ەگەر قارىز الۋشى كەيىنگى ءبىر جىلدا قارىزىن قايتا قۇرىلىمداسا, بىراق 6 اي ىشىندە تولەمى 5%-عا ازايماسا نەمەسە جىل ىشىندە ەكى رەتتەن ارتىق قايتا قۇرىلىمداۋ جاساسا,نەسيە راسىمدەۋ مۇمكىن بولمايدى. سونىمەن قاتار ەگەر سىياقى سوماسى نەگىزگى قارىزدىڭ 20%-ىنان اسىپ كەتسە نەمەسە بۇرىنعى قارىزدى جاڭا نەسيە ارقىلى جابۋ كوزدەلسە, مۇنداي جاعدايدا دا نەسيە بەرىلمەيدى.
ەڭ قاتاڭ تالاپ سوڭعى ءبىر جىلدا قارىزىن 90 كۇننەن استام كەشىكتىرگەندەرگە قويىلادى. قارىزعا قىزمەت كورسەتۋ كوەففيتسيەنتى ەكى ەسە قىسقارادى, ياعني ايلىق تابىسىنىڭ تەك 25%-ىنا دەيىن عانا قارىز تولەۋگە رۇقسات بەرىلەدى. بۇل ازاماتتاردىڭ اي سايىنعى تابىسىنىڭ تورتتەن بىرىنەن ارتىق بولىگى نەسيە تولەمىنە جۇمسالماۋى ءتيىس دەگەندى بىلدىرەدى.
قنردا دەرەگىنشە, قازىرگى تاڭدا ميكروقارجى ۇيىمدارىنىڭ پورتفەلىنىڭ تورتتەن ءبىر بولىگى مەرزىمى وتكەن قارىزدارعا تيەسىلى. ال حالىقتىڭ موينىنداعى جالپى كرەديت كولەمى 24 ترلن تەڭگەدەن اسىپ كەتكەن. جاڭا تالاپتار تاۋەكەلى جوعارى قارىز الۋشىلاردى شەكتەۋگە باعىتتالعان.