اقش بيلىگى 1 قازاننان باستاپ جاڭا visa integrity fee دەپ اتالاتىن قوسىمشا الىم ەنگىزۋى مۇمكىن. ەگەر بۇل وزگەرىس كۇشىنە ەنسە, تۋريستىك, ستۋدەنتتىك, جۇمىس جانە باسقا دا يمميگراتسيالىق ەمەس ۆيزالاردىڭ باعاسى قازىرگىدەي 185 دوللار ەمەس, 435 دوللار بولادى, دەپ جازادى Egemen.kz.
Reuters اگەنتتىگىنىڭ ايتۋىنشا, جاڭا الىمنىڭ مولشەرى – 250 دوللار. ول B1/B2 (تۋريزم جانە ىسكەرلىك ساپار), F-1 (وقۋ), J-1 (الماسۋ باعدارلاماسى), H-1B (جۇمىس) سياقتى ۆيزالارعا ءوتىنىش بەرگەندە تولەنەدى. ەگەر ۆيزا تالاپتارى تولىق ورىندالسا, بۇل قاراجات قايتا قايتارىلادى.
بۇعان دەيىن اقش ۆيزاسىن الۋ ءۇشىن تەك 185 دوللار كونسۋلدىق الىم تولەنەتىن. ەندى جاڭا جۇيە ەنگىزىلگەن سوڭ, ۆيزا باعاسى ەكى ەسەدەن اسا ءوسىپ, الەمدەگى ەڭ قىمبات ۆيزالاردىڭ قاتارىنا كىرۋى مۇمكىن. العاشىندا بۇل وزگەرىستى 2026 جىلدان باستاپ ەنگىزۋ جوسپارلانعان ەدى, بىراق مەرزىمى ىلگەرى جىلجىتىلدى.
بۇل شەشىم اسىرەسە اقش-قا كوپ باراتىن مەكسيكا, ارگەنتينا, برازيليا, ءۇندىستان جانە قىتاي ازاماتتارىنا قيىندىق تۋدىرادى. كەيىنگى ۋاقىتتا وسى ەلدەردەن كەلەتىن تۋريستەر سانى ازايعان. جالپى العاندا, شىلدە ايىندا اقش-قا كەلگەندەر سانى وتكەن جىلمەن سالىستىرعاندا 3,1%-عا تومەندەگەن.
دۇنيەجۇزىلىك ساياحات جانە تۋريزم كەڭەسىنىڭ ەسەبى بويىنشا, 2025 جىلى اقش-تا شەتەلدىك تۋريستەردىڭ شىعىنى 169 ملرد دوللار بولماق. بۇل 2024 جىلعى كورسەتكىشتەن تومەن. بۇعان قاراماستان, اقش پرەزيدەنتى دونالد ترامپ اكىمشىلىگى كوشى-قون ساياساتىن قاتاڭداتىپ وتىر. ونىڭ ىشىندە ستۋدەنتتىك جانە جۋرناليستىك ۆيزالاردىڭ مەرزىمىن قىسقارتۋ, سونداي-اق تۋريستىك ۆيزالارعا 5 مىڭ دوللاردان 15 مىڭ دوللارعا دەيىن كەپىلدىك جارنا ەنگىزۋ قاراستىرىلعان.