بۇگىن, 1 قىركۇيەك – ءبىلىم كۇنى قارساڭىندا اقتاۋ قالاسىندا مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا 300 ورىندىق جاڭا زاماناۋي مەكتەپ پايدالانۋعا بەرىلدى, دەپ جازادى Egemen.kz.
ومىرزاق اۋىلىنىڭ «راۋان» تۇرعىن ماسسيۆىندە بوي كوتەرگەن №26 جالپى ءبىلىم بەرەتىن مەكتەپ اۋىلدىق ايماقتاردا ساپالى بىلىمگە قولجەتىمدىلىكتى ارتتىرۋعا باعىتتالعان ۇلتتىق جوبانىڭ ناقتى ناتيجەسى بولىپ وتىر.
سالتاناتتى اشىلۋ راسىمىنە اقتاۋ قالاسىنىڭ اكىمى ابىلقايىر بايپاقوۆ قاتىسىپ, جينالعان قاۋىمدى جاڭا مەكتەپتىڭ اشىلۋىمەن قۇتتىقتادى.
«اۋىل – قازاقتىڭ بەسىگى. قازاقتىڭ تالاي عالىمدارى, اقىن-جازۋشىلارى مەن وزگە دە سالاداعى مىقتىلارى اۋىلدان شىقتى. سوندىقتان اۋىلدىق جەرلەردەگى بالالاردىڭ ساپالى ءبىلىم الۋىنا مەملەكەت بارلىق جاعدايدى جاساپ وتىر. جاڭا مەكتەپ قۇتتى, ءبىلىم كۇنى وڭ بولسىن», – دەدى قالا اكىمى.
جاڭا مەكتەپ زاماناۋي وقۋ كابينەتتەرىمەن, سپورت جانە شىعارماشىلىق زالدارىمەن, سونداي-اق ينكليۋزيۆتى ءبىلىم بەرۋگە ارنالعان ارنايى كابينەتتەرمەن جابدىقتالعان. بۇل – اۋىل بالالارى ءۇشىن قولايلى ءارى ساپالى ءبىلىم الۋعا جاسالعان ماڭىزدى قادام.
اتا-انالار مەن تۇرعىندار جاڭا ءبىلىم وشاعىنىڭ اشىلعانىنا ريزاشىلىقتارىن ءبىلدىرىپ, قۋانىشتارىن جاسىرمادى.