كونستيتۋتسيا كۇنى قارساڭىندا قىزىلوردا قالاسىندا مەملەكەت باسشىسىنىڭ باستاماسىمەن جۇزەگە اسىرىلىپ جاتقان «كەلەشەك مەكتەپتەرى» ۇلتتىق جوباسى اياسىندا ەكى جاڭا مەكتەپ پايدالانۋعا بەرىلدى. اشىلۋ سالتاناتىنا وقۋ-اعارتۋ ءمينيسترى عاني بەيسەمباەۆ, وبلىس اكىمى نۇرلىبەك نالىباەۆ, قوعام وكىلدەرى, پەداگوگتەر مەن قالا تۇرعىندارى قاتىستى, دەپ حابارلايدى Egemen.kz.
قالانىڭ حالىق ەڭ تىعىز قونىستانعان اۋداندارىنىڭ ءبىرى «اراي» شاعىن اۋدانىندا 1500 ورىندىق جاڭا مەكتەپ ەسىگىن ايقارا اشتى. بۇل – قىزىلورداداعى ەڭ ءىرى ءبىلىم وشاعى. ول سىنىپتارداعى ارتىق جۇكتەمەنى ازايتىپ, بالالارعا جايلى ورتادا ءبىلىم الۋعا مۇمكىندىك بەرەدى. سونداي-اق «قىزىلجارما» شاعىن اۋدانىندا 900 ورىندىق جاڭا مەكتەپ پايدالانۋعا بەرىلدى. ول ەسكى عيماراتتىڭ ورنىنا سالىنعان ءارى زاماناۋي ستاندارتتارعا ساي كەلەدى.
وبلىس اكىمى اتاپ وتكەندەي, قىزىلوردا ءۇش اۋىسىمدى وقىتۋ ماسەلەسىن تۇبەگەيلى شەشكەن كوشباسشى ايماقتاردىڭ قاتارىنا ەندى. بۇعان دەيىن مۇنداي ناتيجەگە شىمكەنت قالاسى مەن اقمولا وبلىسى قول جەتكىزگەن بولاتىن.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە ءوڭىر تۇرعىندارى الدىندا ءسوز سويلەگەن وقۋ-اعارتۋ ءمينيسترى سوڭعى ەكى جىلدا جۇيەلى جاڭعىرتۋ مەن مەكتەپ ينفراقۇرىلىمىن كەڭەيتۋ ناتيجەسىندە ەلىمىزدە ءۇش اۋىسىمدى مەكتەپتەردىڭ سانى ءۇش ەسەگە قىسقارعانىن ەرەكشە اتاپ ءوتتى.
«ەكى جىلدىڭ ىشىندە قازاقستانداعى ءۇش اۋىسىمدى مەكتەپتەردىڭ سانى ءۇش ەسە ازايدى. بۇگىندە شامامەن 3 مىڭ مەكتەپ ءبىر اۋىسىمدا, 5 مىڭعا جۋىق مەكتەپ ەكى اۋىسىمدا جۇمىس ىستەيدى. مۇنداي ناتيجەگە مەملەكەت تاراپىنان جاڭا مەكتەپتەر قۇرىلىسى مەن ينفراقۇرىلىمدى جاڭعىرتۋعا باعىتتالعان اۋقىمدى شارالاردىڭ ارقاسىندا قول جەتكىزىلىپ وتىر. 2025-2026 وقۋ جىلدارى 267 مىڭ ورىنعا ارنالعان 232 جاڭا مەكتەپتىڭ قۇرىلىسى جوسپارلانعان. سونىمەن بىرگە مەكتەپتەردى جاڭعىرتۋ بويىنشا رەنوۆاتسيادان وتكىزۋ باعدارلاماسى جۇزەگە اسىرىلىپ جاتىر. بيىل بۇل باعدارلاما 190 مىڭ وقۋشى ءبىلىم الاتىن 245 مەكتەپتى قامتيدى», دەدى عاني بەيسەمباەۆ.
بۇگىندە قىزىلوردا وبلىسىندا 8 جايلى مەكتەپ بار. ونىڭ ەكەۋى وسى اپتادا اشىلسا, تاعى ەكەۋى جاڭا وقۋ جىلى باستالعانعا دەيىن وقۋشىلاردى قابىلداۋعا دايىن بولماق.