جي-ءدىڭ بيزنەس نارىعىنا ىقپالى قانداي؟

ىزدەۋ ناتيجەسىن جي قالاي شەشەدى؟

بيىلعى جىلدىڭ العاشقى جارتىسىندا «Google» ەلىمىزدە «AI Overview» قىزمەتىن ىسكە قوستى. بۇل — بەدەلدى دەرەككوزدەر نەگىزىندە جاساندى ينتەللەكت قۇراستىراتىن اۆتوماتتى جاۋاپتار. ولار ىزدەۋ ناتيجەلەرىنىڭ ەڭ جوعارى بولىگىندە ورنالاسىپ, ءداستۇرلى سىلتەمەلەر ءتىزىمىن ءجيى الماستىرادى.

«Ahrefs» زەرتتەۋىنە سايكەس, «AI Overview» پايدا بولعاننان كەيىن سايتتارعا ءوتۋ سانى ورتاەسەپپەن 34,5%-عا تومەندەگەن. سەبەبى پايدالانۋشىلار ىزدەگەن جاۋاپتى بىردەن العان سوڭ, سىلتەمەلەردى اشىپ اۋرە بولمايدى. ءتىپتى ىزدەۋ جۇيەسىندەگى جوعارى ورىنداردىڭ ءوزى ەندى ترافيككە كەپىلدىك بەرە المايدى. بۇل بيزنەس ءۇشىن ورگانيكالىق كەلۋشىلەردىڭ تىكەلەي ازايۋىن بىلدىرەدى.

«ZipTie» جۇرگىزگەن قوسىمشا زەرتتەۋ دە وسىنى راستايدى: ەگەر سايت «Google»-دىڭ ءداستۇرلى ناتيجەلەرىندە ءبىرىنشى ورىندا تۇرسا, ول تەك 25%-ى جاعدايدا عانا «AI Overview» دەرەككوزىنە اينالادى. ورىن نەعۇرلىم جوعارى بولسا, تاڭدالۋ ىقتيمالدىعى سوعۇرلىم ارتقانىمەن, رەيتينگتىڭ ءوزى ەندى ءابسوليۋتتى كەپىلدىك ەمەس.

سونىمەن قاتار اۋديتوريانىڭ ارەكەتى وزگەرىپ كەلەدى. ادامدار جاۋاپتاردى براۋزەردەن ەمەس, «ChatGPT», «Perplexity», «Gemini» سياقتى جي-سەرۆيستەردەن الاتىن بولدى. بيىلعى ءساۋىر ايىندا «ChatGPT» سايتى الەمدەگى ەڭ كوپ كىرەتىن رەسۋرستاردىڭ توپ-10 قاتارىنا ەنىپ, ءداستۇرلى مەديا جانە ىزدەۋ پلاتفورمالارىنان باسىم ءتۇستى.

قازاقستان دا بۇل ۇردىستەن قالىس قالعان جوق. «Netpeak Kazakhstan» دەرەكتەرىنە سايكەس, 2025 جىلدىڭ العاشقى ءۇش ايىندا «ChatGPT» ەلدەگى «Apple» قولدانۋشىلارى اراسىندا ەڭ كوپ جۇكتەلگەن ءموبيلدى قوسىمشاعا اينالدى. كوپتەگەن ادام  «Google»-عا كىرمەس بۇرىن, جي-عا جۇگىنەدى — بۇل تۇتىنۋشىنىڭ شەشىم قابىلداۋ جولىن تۇبەگەيلى وزگەرتىپ جاتىر.

بيزنەس ءۇشىن بۇل نەنى بىلدىرەدى؟

جاساندى ينتەللەكت تەك كىلت سوزدەرگە عانا ەمەس, سونىمەن قاتار دەرەكتەردىڭ قۇرىلىمى مەن سەنىمدىلىگىنە, پايدالانۋشى ارەكەتىنە, ءوزارا بايلانىس تاريحى مەن كونتەكستىنە سۇيەنەدى. بيزنەستىڭ ىزدەۋ ناتيجەلەرىندەگى ورنىن ساقتاۋى ءۇشىن وسى فاكتورلاردى ەسكەرىپ, كونتەنتتى گەنەراتيۆتى جۇيەلەردىڭ الگوريتمدەرىنە بەيىمدەۋ قاجەت. بۇل كلاس­­­سي­كالىق SEO-نى جوققا شىعارمايدى, بىراق ونى جاڭا دەڭگەيگە كوتەرۋدى تالاپ ەتەدى.

وسى بەيىمدەلۋدىڭ ءبىر ءتيىمدى ءتاسىلى — GEO (Generative Engine Optimization), ياعني گەنەراتيۆتى الگوريتمدەرگە وڭتايلاندىرۋ. بۇل ءادىستىڭ ءمانى — سايتتى جي سەنەتىن سەنىمدى دەرەككوز رەتىندە قالىپتاستىرۋ. قازاقستاندا بۇل ءتاسىل قازىردىڭ وزىندە قولدانىلىپ ءجۇر. الدىمەن پايدالانۋشى ارەكەتتەرى مەن سۇرانىس تۇرلەرى تالدانىپ, سودان كەيىن دەرەكتەر قۇرىلىمدالادى. الگوريتم ونى دايىن جاۋاپ رەتىندە پايدالانا الاتىنداي ەتىپ كونتەنت دا­يىندالادى. مۇنداي ءادىستى قولدانعان كومپانيالاردىڭ العاشقى اپتانىڭ وزىندە-اق جي جا­ۋاپتارىنا شىققان مىسالدارى بار. بۇل جاڭا فورماتقا بەيىمدەلۋ ونلاين-كورىنىمدىلىكتى ساقتاپ قالۋعا مۇمكىندىك بەرەتىنىن دالەلدەيدى.

كوپتەگەن ساراپشى الداعى جىلدارى ءداستۇرلى ىزدەۋ جۇيەلەرىنەن كەلەتىن ترافيكتىڭ كولەمى ازايا بەرەدى دەپ ەسەپتەيدى. سوندىقتان بۇعان دايىندىق تەك تەحنيكالىق ەمەس, ستراتەگيالىق قادام بولۋعا ءتيىس. كىم تەز بەيىمدەلسە, سول تۇتىنۋشى نازارىندا قالادى.

باۋىرجان توقتاعازى,

ماركەتينگ سالاسىنىڭ ساراپشىسى, «Netpeak Kazakhstan» اگەنتتىگىنىڭ باس ديرەكتورى