«سامۇرىق-قازىنا» باسشىلىعى ديرەكتورلار كەڭەسىنە ەسەپ بەردى

«سامۇرىق-قازىنا» باسشىلىعى ديرەكتورلار كەڭەسىنە نەگىزگى وندىرىستىك جانە قارجىلىق كورسەتكىشتەر تۋرالى ەسەپ بەردى. 

ديرەكتورلار كەڭەسى ەكونوميكانىڭ باسىم سالالارىن قامتيتىن ءىرى ينۆەستيتسيالىق جوبالاردىڭ جۇزەگە اسىرىلۋ بارىسى تۋرالى اقپاراتتى تىڭدادى.

«ناتيجەسىندە 6 جوبانى قوسۋ ارقىلى جوبالار تىزبەسىن 52-گە دەيىن كەڭەيتۋ تۋرالى شەشىم قابىلداندى. وسىلايشا, بۇگىندە 30 جوبا بويىنشا ەرس-كەلىسىمشارتتار, ونىڭ ىشىندە, 24 جوبا بويىنشا قۇرىلىس-مونتاجداۋ جۇمىستارى جۇرگىزىلۋدە, 4 جوبا ىسكە قوسىلدى, 11 جوبا ينۆەستيتسيا الدىنداعى كەزەڭدە, 11 جوبا جوبالاۋ كەزەڭىندە تۇر. ءىرى جوبالار بويىنشا قاراجاتتى يگەرۋ 101%-دى, جەرگىلىكتى قامتۋ ۇلەسى – 273 ملرد تەڭگەنى قۇرادى. ەنەرگەتيكا سالاسىندا كوكشەتاۋ جەو قۇرىلىسى باستالدى, №3 ەنەرگيا بلوگىن ورناتا وتىرىپ, ەكىباستۇز گرەس-2 كەڭەيتۋ بويىنشا قۇرىلىس-مونتاجداۋ جۇمىستارى باستالدى. سونداي-اق الماتىداعى جەو-2-دە جاڭعىرتۋ جۇمىستارى جالعاسۋدا, مۇندا ءبىرىنشى گاز تۋربيناسىن ورناتۋ اياقتالعان. مۇناي-گاز سالاسىندا گاز ءبولۋ كەشەنىن سالۋعا كەلىسىمشارتقا قول قويىلدى, سونداي-اق كەندىرلى كەنتىندە تەڭىز سۋىن تۇششىتۋ بويىنشا العاشقى وندىرىستىك جەلى ىسكە قوسىلدى», دەپ حابارلادى ۇكىمەتتىڭ ءباسپاسوز قىزمەتى.

ايتا كەتەيىك, كولىك-لوگيستيكالىق ينفراقۇرىلىمدى دامىتۋ شەڭبەرىندە باقتى-اياگوز تەمىرجول جەلىسىنىڭ قۇرىلىسى جۇرگىزىلىپ جاتىر, كاسپي تەڭىزىنىڭ تۇبىمەن تالشىقتى-وپتيكالىق بايلانىس جەلىسىن تارتۋ بويىنشا تەڭىز ىزدەنىستەرى باستالدى.

«بيىل Caspi Bitum زاۋىتىنىڭ قۋاتىن كەڭەيتۋ جانە ZHETYSU كونتەينەرلىك تەرمينالىنىڭ قۇرىلىسى سياقتى جوبالار اياقتالدى. كەندىرلى قالاسىندا سۋ تۇششىتۋ زاۋىتىنىڭ سۋ تاراتۋ قوندىرعىسى ىسكە قوسىلىپ, جاڭاوزەن قالاسىنىڭ ورتالىق سۋمەن جابدىقتاۋ تورابىنا سۋ بەرىلە باستالدى. اياقتالۋى بيىلعا جوسپارلانعان بىرقاتار جوبانى جۇزەگە اسىرۋ جالعاسادى.  «دوستىق – مويىنتى» تەمىرجول جەلىسىنىڭ ەكىنشى جولدارىندا پويىز قوزعالىسى ءىشىنارا ىسكە قوسىلدى, اقتاۋ پورتىندا كونتەينەرلىك حاب جۇمىسىن باستادى, «تالدىقورعان–ۇشارال» ماگيسترالدى گاز قۇبىرىنىڭ جەلىلىك بولىگى اياقتالدى, الماتى اينالما تەمىرجول جەلىسىنىڭ قۇرىلىسى جالعاسىپ جاتىر», دەلىنگەن حابارلامادا. 

جالپى قوردىڭ 2025 جىلدىڭ 7 ايىنداعى كىرىسى مەن EBITDA بويىنشا ناقتى ماندەرى جوسپارلانعاننان تيىسىنشە 6% جانە 15%-عا اسىپ تۇسكەن.

ديرەكتورلار كەڭەسىنىڭ مۇشەلەرىنە سونداي-اق عىلىمي-زەرتتەۋ جانە تاجىريبەلىك-كونسترۋكتورلىق جۇمىستاردى (عزتكج) دامىتۋ جانە قور توبىنىڭ كومپانيالارىندا جاساندى ينتەللەكتتى ەنگىزۋ تۋرالى اقپارات ۇسىنىلدى. بۇگىنگى تاڭدا عزتكج-نىڭ ەكى جوباسى ىسكە اسىرىلدى: قىزىلوردا وبلىسىنداعى «اقشابۇلاق» كەن ورنىندا ىلەسپە گازدى قايتا وڭدەۋ بويىنشا, ول قايتا وڭدەۋ كولەمىن 33%-عا ۇلعايتادى; بەلسەندىرىلگەن ءاليۋمينيدىڭ كەشەندى رەاگەنتتەرى جوباسى, سونىڭ ارقاسىندا سۋ دايىنداۋ كەزىندە سۋدىڭ بۇلدىرلىعىن تومەندەتۋ تيىمدىلىگى 99%-عا جەتەدى.

سونىمەن قاتار قارجىلاندىرۋ كوزدەرىن ءارتاراپتاندىرۋ اياسىندا قوردىڭ ديرەكتورلار كەڭەسى قحر نارىعىندا پاندا-وبليگاتسيالاردىڭ دەبيۋتتىك شىعارىلىمى ارقىلى سىرتقى قارىز الۋدى ماقۇلدادى.

وتىرىس قورىتىندىسى بويىنشا «سامۇرىق-قازىنا» باسشىلىعىنا ينۆەستيتسيالىق جوبالاردىڭ ۋاقتىلى جۇزەگە اسىرىلۋىن قامتاماسىز ەتۋ, قۇرىلىس-مونتاجداۋ جۇمىستارىنىڭ ساپاسىنا جانە نىسانداردى ىسكە قوسۋ كەستەسىنىڭ ساقتالۋىنا باقىلاۋدى كۇشەيتۋ تاپسىرىلدى.