ەرتىس-بايان ءوڭىرى مەكتەپ باعدارلامالارىنا جاساندى ينتەللەكتىنى ينتەگراتسيالاۋدا قاناتقاقتى الاڭ بولىپ بەلگىلەندى. الداعى ۋاقىتتا بۇل باعىتتا جاڭا جوبالار ءتۇزىلىپ, پەداگوگتەر جاڭا تەحنولوگيالاردى يگەرۋ ماقساتىندا بىلىمدەرىن جەتىلدىرەدى.
پاۆلوداردا وتكەن مۇعالىمدەردىڭ تامىز كەڭەسىندە وتاندىق كومپانيالار وزدەرىنىڭ يننوۆاتسيالىق جوبالارىن ۇسىندى. ءبىلىم بەرۋ سالاسىن تسيفرلاندىرۋ, وقىتۋ ۇردىسىنە زاماناۋي تەحنولوگيالاردى ەنگىزۋ جانە ۇستازداردىڭ جۇمىسىن جەڭىلدەتۋ – جاڭاشا باعىتتا ءتۇزىلىپ وتىرعان ميسسيالار.
ء«بىلىم كەلەشەگى – ادال ازامات, كاسىبي مامان» تاقىرىبىندا وتكەن ءداستۇرلى تامىز جيىنىندا وبلىس اكىمى اسايىن بايحانوۆ مەملەكەت باسشىسى قاسىم-جومارت توقاەۆتىڭ «بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز» دەگەن ۇندەۋى ءاربىر پەداگوگ ءۇشىن باستى باعدار بولۋعا ءتيىس ەكەنىن اتاپ ءوتتى.
– ءبىلىم بەرۋ ساپاسىن ۇنەمى ارتتىرىپ وتىرۋ قاجەت. ەل پرەزيدەنتى بۇل سالادا ەشقانداي قاتەلىككە جول بەرۋگە بولمايتىنىن اتاعان. ويتكەنى باقىتتى بالا – ەلدىڭ باقىتى, ال ۇستازدار وسى بولاشاققا جول اشادى. ءبىلىم زاماناۋي, تەحنولوگيالىق, سونىمەن بىرگە الەۋمەتتىك باعدارلانعان بولۋى كەرەك. پاۆلودار وبلىسى ءاردايىم وسى ماڭىزدى سالاداعى كوشباسشىلاردىڭ قاتارىندا, – دەدى ءوڭىر باسشىسى.
سۋرەتتى تۇسىرگەن – ۆالەري بۋگاەۆ
بۇگىندە وبلىستا 23 مىڭنان استام پەداگوگ جۇمىس ىستەيدى, ولاردىڭ 15 مىڭنان استامى بىلىكتىلىگىن ارتتىرعانى ءۇشىن ەڭبەكاقىسىنا قوسىمشا ۇستەمەاقى الادى. ءۇش جىلدىڭ ىشىندە وڭىردەگى ءبىلىم بەرۋ سالاسىنىڭ بيۋدجەتى ەكى ەسەگە ۇلعايىپ, 250 ميلليارد تەڭگەدەن استى. بۇل وبلىستىق بيۋدجەتتىڭ جارتىسىنان استامىن قۇرايدى. جاڭا مەكتەپتەر مەن بالاباقشالار سالىنىپ, 182 مەكەمە جاڭعىرتىلدى, وقۋ ورىندارىنداعى قاۋىپسىزدىك تولىعىمەن قامتاماسىز ەتىلدى. بيىل كوللەدجدەرگە بولىنگەن ورىندار سانى رەكوردتىق كورسەتكىشكە جەتتى – 6 250 ورىن, ال تۇلەكتەر وقۋلارىن اياقتاعاننان كەيىن ءجۇز پايىز جۇمىسقا ورنالاسادى.
وتكەن وقۋ جىلىندا پاۆلودارلىق وقۋشىلار حالىقارالىق جانە رەسپۋبليكالىق دەڭگەيدەگى ءبىلىم سايىستارىنان 329 مەدال جەڭىپ الىپ, رەسپۋبليكادا ۇزدىك كوماندا اتانۋى. ءبىلىم الۋ مۇمكىندىگىنىڭ تەڭ دارەجەدە بولۋىنا ەرەكشە نازار اۋدارىلىپ وتىر. ءوڭىردىڭ 387 مەكتەپكە دەيىنگى ۇيىمىندا 36 مىڭ بالا تاربيەلەنسە, 3-6 جاس ارالىعىنداعى جەتكىنشەكتەردى قامتۋ كورسەتكىشى 100 پايىزعا جەتتى. جاقىن كۇندەرى بىرلىك, زاڭعار, اقتوعاي اۋىلدارىندا, پاۆلودار قالاسىنىڭ «دوستىق» شاعىن اۋدانىندا جاڭا بالاباقشالار ەسىگىن ايقارا اشادى. شىلدە ايىنان باستاپ وڭىردەگى بالاباقشالاردا ۆاۋچەرلىك قارجىلاندىرۋ جوباسى ەنگىزىلدى. بۇل دەگەنىمىز – اتا-انالاردىڭ وزدەرى بالاباقشانى تاڭدايدى, ال مەملەكەتتىك تاپسىرىس بالانىڭ سوڭىنان «جۇرەدى». اتالعان ءتاسىل بالاباقشالارداعى كەزەكتى 50 پايىزعا تومەندەتۋگە مۇمكىندىك بەرىپ وتىر.
ءوڭىر مەكتەپتەرىندە 117 مىڭنان استام وقۋشى ءبىلىم الادى. بيىل 10,5 مىڭ بالا العاش رەت مەكتەپ تابالدىرىعىن اتتاعالى وتىر.
ءبىلىم بەرۋ ساپاسىن جاقسارتۋ ءۇشىن 130 زاماناۋي كابينەت ەنگىزىلدى, ونىڭ 85 پايىزدان استامى مۋلتيمەديالىق قۇرالدارمەن جابدىقتالعان. بيىل پاۆلودار قالاسىنىڭ «دوستىق» شاعىن اۋدانىندا, پاۆلودار اۋدانىنىڭ بىرلىك اۋىلىندا جاڭا مەكتەپتەر ىسكە قوسىلادى. اققۋلى جانە ەرتىس اۋداندارىنداعى اپاتتى جاعدايدا تۇرعان مەكتەپتەردىڭ ورنىنا زاماناۋي عيماراتتار سالىندى. كەلەر جىلى قىزىلقاق اۋىلىندا, پاۆلودار قالاسىنىڭ «ۋسولكا» شاعىن اۋدانىندا مەكتەپتەر سالۋ, سونداي-اق ەكىباستۇز ايماعىنىڭ اتىعاي اۋىلىنداعى مەكتەپ قۇرىلىسىن اياقتاۋ جوسپارلانعان. سونداي-اق ەكىباستۇزدا ينكليۋزيۆتى بالاباقشا رەتىندە اشىلاتىن عيماراتتى قايتا جاڭارتۋ باستالدى. اقسۋدا جاڭا مامانداندىرىلعان مەكەمە, ال مايقايىڭ كەنتىندە مۋزىكا مەكتەبى سالىنادى.
جيىندا «ادال ازامات – كاسىبي مامان» قاعيداتى نەگىزىندە تاربيە مەن ءبىلىمنىڭ بىرتۇتاستىعى, جاس ۇرپاقتىڭ قاۋىپسىزدىگى, سونىمەن بىرگە ءبىلىم بەرۋ جۇيەسىنە جاساندى ينتەللەكتىنى ەنگىزۋ ماسەلەلەرى تالقىلاندى. جاڭا وقۋ جىلىندا مەكتەپتەردەگى ءبىلىم بەرۋ ۇردىسىنە جاساندى ينتەللەكتىنى ەنگىزۋ باستالماقشى. پەداگوگتەر تسيفرلىق رەسۋرستاردى قولدانۋ بويىنشا ارنايى كۋرستاردان وتەدى.
– مەملەكەت باسشىسى ءبىلىم بەرۋ ساپاسىن ارتتىرۋ, بالالاردىڭ قاۋىپسىزدىگىن قامتاماسىز ەتۋ, جاساندى ينتەللەكتىنى ەنگىزۋ جانە ۇستاز مارتەبەسىن قورعاۋ جونىندە ناقتى بەس مىندەت قويدى. بۇل – الداعى جۇمىسىمىزدىڭ ميسسياسى. جىل سوڭىنا دەيىن بالالاردىڭ مۇددەلەرىن ەسكەرەتىن جانە وتباسى, ءبىلىم بەرۋ, دەنساۋلىق ساقتاۋ, الەۋمەتتىك قورعاۋ, قۇقىقتىق قورعاۋ, قاۋىپسىز ورتا قۇرۋ, بوس ۋاقىت پەن سپورتتى ۇيىمداستىرۋدىڭ 7 ستراتەگيالىق باعىتىن قامتيتىن «قازاقستان بالالارى» اتتى بىرىڭعاي باعدارلاما قابىلداناتىن بولادى, – دەدى كەڭەسكە قاتىسقان وقۋ-اعارتۋ مينيسترلىگى ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى سەرىك ءاشىروۆ.
جاس ۇرپاق – مەملەكەت اماناتى. قاتىسۋشىلار ءبىلىم مەن تاربيەنى ۇيلەستىرۋدىڭ ماڭىزدىلىعىن دا اتاپ ءوتتى. ونى ىسكە اسىرۋ ءۇشىن وڭىردە «التىن ساقا» جانە «سامعاۋ» سياقتى جاڭا ورتالىقتار قۇرىلعان, سونىڭ ارقاسىندا قوسىمشا بىلىممەن قامتۋ كورسەتكىشى 98 پايىزعا دەيىن ءوستى. جاقىن ارادا وقۋشىلاردى قوعامدىق پايدالى ىستەرگە تارتۋعا باعىتتالعان «ۇرپاق ءۇنى» اتتى جاڭا جوبا ومىرشەڭ ەتىلەدى. بۇعان قوسا ەرتىستىڭ پاۆلودار وڭىرىندە بۋللينگكە قارسى «Kiva» جانە «دوسبولLIKE» جاڭا جوبالارى ىسكە قوسىلادى. سونداي-اق ومىرلىك قيىن جاعدايعا تاپ بولعان وتباسىلاردى انىقتاۋ ءۇشىن ارنايى تسيفرلىق جۇيە ازىرلەنىپ جاتىر.
پاۆلودار وبلىسى مەكتەپ باعدارلامالارىنا AI-ءدى ينتەگراتسيالاۋ ماقساتىندا قاناتقاقتى الاڭ بولىپ بەلگىلەندى, بۇل دەربەس وقىتۋ جۇيەسىن قۇرۋعا مۇمكىندىك بەرمەكشى. 2025–2026 وقۋ جىلىندا پەداگوگتەر سارالانعان جانە ينكليۋزيۆتى ءبىلىم بەرۋ ءۇشىن تسيفرلىق قۇرالداردى قولدانۋ بويىنشا ارنايى وقۋدان وتەدى.
وتاندىق «Smart بولاشاق» كومپانياسى مەكتەپ وقۋشىلارىنا كاسىبي باعدار بەرۋگە ارنالعان جاڭا تسيفرلىق ءونىمىن تانىستىردى. جوبا وقۋشىلارعا 7-8-سىنىپتان باستاپ, بولاشاق ماماندىعىن ايقىنداۋعا كومەكتەسۋدى كوزدەيدى. كومپانيا وكىلدەرىنىڭ سوزىنشە, باعدارلاما جاساندى ينتەللەكت نەگىزىندە جاسالعان جانە حالىقارالىق ستاندارتتارعا سايكەستەندىرىلگەن.
ء«بىزدىڭ جۇيە ءار وقۋشىعا جەكە تراەكتوريا قۇرىپ بەرەدى. وقۋشى تەستىلەۋدەن وتكەننەن كەيىن ءوزىنىڭ قابىلەتى مەن قىزىعۋشىلىعى بويىنشا ناقتى ۇسىنىستار الادى. جۇيە ماماندىققا قاجەتتى پاندەردى, سايكەس جوعارى وقۋ ورىندارىن, سونىمەن قاتار ەڭبەك نارىعىنداعى بولجامدى جالاقى مولشەرىن كورسەتەدى», دەيدى باعدارلاما اۆتورلارى.
جوبانىڭ ەرەكشەلىگى – كاسىبي باعدار ۇدەرىسىنە ءبىر مەزگىلدە ءۇش تاراپتىڭ, ياعني وقۋشى, مەكتەپ, اتا-انانىڭ قاتىسا الۋى. مۇعالىمدەر بۇكىل سىنىپ نەمەسە مەكتەپ دەڭگەيىندە تالداۋ الا الادى, ال اتا-انالار بالاسىنىڭ قابىلەتى مەن قىزىعۋشىلىعىن قاداعالاپ, بىرلەسە شەشىم قابىلدايدى. وقۋشى جۇيەگە QR-كود ارقىلى تىركەلىپ, ءوزىنىڭ جەكە كابينەتىندە تەست تاپسىرادى. تەست سۇراقتارى بالانىڭ بەيىمدىلىگىن جوعارى دالدىكپەن انىقتايدى. كومپانيا وكىلدەرى مۇنداي تسيفرلىق قۇرالدىڭ باستى ارتىقشىلىعى رەسۋرستى ۇنەمدەۋ ەكەنىن ايتادى. بۇل شەشىم وتباسىنىڭ دا, مەكتەپتىڭ دە, مەملەكەتتىڭ دە ۋاقىتىن ۇنەمدەيدى. ەڭ باستىسى, بالا ەرتە جاستان ءوز باعىتىن انىقتاپ, بولاشاققا سەنىمدى قادام جاسايدى. تسيفرلىق ءونىم قازىردىڭ وزىندە باتىس قازاقستان, ماڭعىستاۋ وبلىستارىندا جانە قاراعاندىداعى بىرنەشە «كەلەشەك مەكتەپتەرىندە» قولدانىلا باستاعان. الداعى ۋاقىتتا ول پاۆلودارعا دا كەلۋى ىقتيمال.
ەلوردالىق «IQ» كومپانيالار توبى ۇسىنعان يننوۆاتسيالىق جوبالار دا ۇستازداردىڭ كوزايىمىنا اينالدى. مۇندا كومپيۋتەرلىك جابدىقتار ءوندىرىسى – ينتەراكتيۆتى پانەلدەر, مونوبلوكتەر, نوۋتبۋكتەر جانە دەربەس كومپيۋتەرلەر قۇراستىرىلادى. كەلەر جىلدان باستاپ وتاندىق جۇيەلى پلاتالار مەن قۋاتتاندىرعىشتاردىڭ تولىق ءوندىرىسىن جولعا قويۋ كوزدەلگەن. بۇل – وتاندىق ءىت-يندۋستريا ءۇشىن ماڭىزدى قادام بولماقشى. «كيبەر فورمۋلا 3» كومپانياسى مۇعالىمدەر مەن وقۋشىلاردى جاڭا تەحنولوگيالار مەن جاساندى ينتەللەكت قۇرالدارىن ءتيىمدى قولدانۋعا ۇيرەتەدى. ال «5 Bit» كومپانياسى, ءبىلىم بەرۋ سالاسىنداعى باسقارۋ جۇيەسىن اۆتوماتتاندىرۋعا نەگىزدەلگەن. جوبا اياسىندا مۇعالىمدەردىڭ كۇندەلىكتى ەسەپ-قيسابىن ازايتىپ, اكىمشىلىك جۇمىستاردى جەڭىلدەتەتىن باعدارلامالىق جاساقتاما ازىرلەنىپ جاتىر. جاساندى ينتەللەكت پلاتفورماسى ۇستازدار قاۋىمىنىڭ قىزىعۋشىلىعىن تۋدىردى. مىسالى, پلاتفورما Kundelik.kz قوسىمشاسىنداعى ءۇي تاپسىرمالارىن اۆتوماتتى تۇردە تەكسەرىپ, قۇجاتتاردى راسىمدەۋدە كومەك كورسەتەدى. دەگەنمەن سوڭعى باقىلاۋدى ارقاشان مۇعالىم جۇرگىزەدى. جوبا 2026 جىلدىڭ شىلدە ايىندا قولدانىسقا ەنگىزىلەدى دەپ كۇتىلىپ وتىر.
اتاپ وتەرلىگى, ء«بىلىم بەرۋدەگى وزگەرىستىڭ 1000 كوشباسشىسى» جوباسىنا وڭىردەن قاتىسقان 21 ۇستازدىڭ 17-ءسى بۇگىندە ءبىلىم بەرۋ ۇيىمدارىن باسقارۋدا. جوعارى جەتىستىكتەرى مەن ءبىلىم سالاسىنا قوسقان زور ۇلەستەرى ءۇشىن ءسابيت يبادۋللين, فارزيا كلەپيتسا, ليليا ستادنيكوۆا, وكسانا كولداشەۆا «قازاقستاننىڭ ەڭبەك سىڭىرگەن ۇستازى» قۇرمەتتى اتاعىمەن ماراپاتتالدى.
سونداي-اق جيىندا جىل سايىنعى «ۇزدىك ءبىلىم بەرۋ ۇيىمى – 2025» بايقاۋىنىڭ قورىتىندىسى شىقتى. پاۆلودار قالاسىنىڭ №29 ورتا مەكتەبى, ەكىباستۇز قالاسىنىڭ قىزدارعا ارنالعان №25 قازاق گيمنازياسى, اقسۋ قالاسىنىڭ №24 بالاباقشاسى, بالالار مەن جاستارعا ارنالعان ەكولوگيا جانە تۋريزم ورتالىعى, سونداي-اق پاۆلودار تەحنولوگيالىق كوللەدجى ۇزدىكتەر قاتارىنان كورىندى. بارلىق جەڭىمپاز 50 ملن تەڭگە سەرتيفيكات يەلەندى.
ءبىلىم بەرۋ سالاسىن دامىتۋعا ەلەۋلى ۇلەس قوسقان پەداگوگتەرگە دە ەرەكشە نازار اۋدارىلدى. ء«بىلىم بەرۋ ءىسىنىڭ قۇرمەتتى قىزمەتكەرى» بەلگىسىمەن 6 پەداگوگ ماراپاتتالدى.
كەڭەس اياسىندا ۇيىمداستىرىلعان «تسيفرلىق كورمەدە» زاماناۋي تەحنيكالىق جانە پەداگوگيكالىق شەشىمدەر ۇسىنىلدى. جاساندى ينتەللەكت جانە الەۋمەتتىك باستامالار سالاسىنداعى جەتەكشى ساراپشىلار AI ەنگىزۋگە, ۇزدىكسىز ءبىلىم بەرۋ ەكوجۇيەسىن قۇرۋعا جانە بالا تاربيەسىندەگى وتباسىنىڭ ءرولىن نىعايتۋعا باسا نازار اۋداردى. «الماتىكىتاپ» باسپاسى ءوڭىردىڭ شاعىن جيناقتى مەكتەپتەرىنە «TopIQ-Mobil Box» 40 ءموبيلدى ءبىلىم بەرۋ كەشەنىن تەگىن ۇسىنىپ, ءوڭىردىڭ ءبىلىم بەرۋ جۇيەسىنە قولداۋىن ءبىلدىردى.
پاۆلودار وبلىسى