ۇكىمەت ازىق-ت ۇلىك باعاسىن باقىلاۋدى كۇشەيتەدى

سوڭعى ەكى اپتا قاتارىنان الەۋمەتتىك تاۋارلاردىڭ ورتاشا باعا يندەكسى وزگەرىسسىز — 0% دەڭگەيىندە ساقتالىپ وتىر. وتكەن اپتادا كۇرىش – 0,2%-عا, قىرىققابات – 2,2%-عا, ءسابىز – 4,1%-عا, كارتوپ – 5,7%-عا, پياز – 9%-عا تومەندەگەن.

سيىر ەتى نارىعىنا قاتىستى جاعداي بولەك تالقىلانعان. ءبىر اپتا ىشىندە باعا 0,8%-عا ءوسىپ, جىل باسىنان بەرى جالپى ءوسىم 20,2%-دى قۇراعان.

«قازاقستاندىق سيىر ەتى باسەكەگە قابىلەتتى: ەلدەگى ورتاشا باعا ءبىر كگ ءۇشىن 3105 تەڭگەنى قۇرايدى, بۇل ەاەو ەلدەرى مەن وزبەكستانعا قاراعاندا تومەن. بۇل رەتتە كورشى ەلدەر تاراپىنان سۇرانىس تۇراقتى جوعارى ەكەنىن اتاپ ءوتۋ كەرەك», دەدى ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا.

كەلەسى ماۋسىمدا كارتوپ باعاسىنىڭ قىمباتتاۋىن بولدىرماۋ ءۇشىن ساۋدا مينيسترلىگى, اۋىل شارۋاشىلىعى مينيسترلىگى, جەرگىلىكتى اكىمدىكتەر جانە كارتوپ وسىرۋشىلەر وداعى تۇراقتى جەتكىزىلىم مەن ءادىل باعاعا قاتىستى مەموراندۋم ازىرلەپ جاتىر.

اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ مالىمەتىنشە, 22 تامىزداعى جاعداي بويىنشا قىرىققاباتتىڭ 317,9 مىڭ تونناسى, كارتوپتىڭ 512,9 مىڭ تونناسى, پيازدىڭ 226,8 مىڭ تونناسى, ءسابىزدىڭ 98,8 مىڭ تونناسى جينالعان.

سونىمەن قاتار بارلىق وڭىرلەر كۇزگى-قىسقى جانە كوكتەمگى كەزەڭدە قولجەتىمدى باعانى قامتاماسىز ەتۋ ءۇشىن تۇراقتاندىرۋ قورلارىنا كوكونىس ونىمدەرىن جەتكىزۋگە ارنالعان كەلىسىمشارتتاردى ءالى اياقتاعان جوق. وسىعان بايلانىستى ۆيتسە-پرەمەر ساۋدا جانە ينتەگراتسيا مينيسترلىگىنە ءونىمنىڭ جەتكىلىكتى كولەمىن جانە ساپاسىن تۇراقتى باقىلاۋ ءۇشىن تەكسەرۋ الگوريتمىن ازىرلەۋدى تاپسىردى.

كەڭەستە تۇراقتاندىرۋ قورلارىن قاداعالاۋدى تسيفرلاندىرۋ ماسەلەسى دە كوتەرىلدى. الەۋمەتتىك ماڭىزى بار ازىق-ت ۇلىك ونىمدەرىنىڭ كىرىس-شىعىسىن تىركەۋ ءۇشىن بەينەمونيتورينگ جۇيەلەرى مەن قويمالارعا سكانەرلەۋشى قۇرىلعىلار ورناتۋ ۇسىنىلدى. بۇل شارا ءونىم قوزعالىسىنىڭ اشىقتىعىن ارتتىرىپ, ونى ونلاين باقىلاۋعا مۇمكىندىك بەرەدى.

سەرىك جۇمانعارين بۇل باستامانى قولداپ, وڭىرلەرگە ونى ەنگىزۋ جولدارىن قاراستىرۋدى تاپسىردى.