*Brent مۇنايىنىڭ باعاسى باررەلىنە 62 دوللارعا جەتتى. ساراپشىلاردىڭ ءپىكىرىنشە, بۇعان ءىرى مۇناي كومپانيالارىنىڭ وزدەرىنىڭ قۇرىلىمدارىن وڭتايلاندىرىپ, پەرسونالدارىن قىسقارتۋعا دەگەن نيەتى سەبەپ بولىپ وتىر. بۇگىنگە دەيىن الەمدەگى مۇناي كومپانيالارى 100 مىڭ ادامدى جۇمىستان بوساتىپ ۇلگەرگەن.
* قىتايدا كەزەكتى جوعارى لاۋازىمدى شەنەۋنىككە قاتىستى قىلمىستىق قۋعىنداۋ باستالدى. قحر پارلامەنتى توراعاسىنىڭ بۇرىنعى ورىنباسارى سۋ جۋنعا ءوزىنىڭ قىزمەت بابىن ءىرى كولەمدە پارا الۋعا پايدالاندى دەگەن ايىپ تاعىلىپ وتىر.
*مىسىر پرەزيدەنتى ابدەل فاتتاح اس-سيسي بۇۇ قاۋىپسىزدىك كەڭەسىن ليۆياعا حالىقارالىق ارالاسۋ تۋرالى قارار قابىلداۋعا شاقىردى. بۇعان دەيىن ليۆيا سودىرلارى 21 مىسىرلىق بالىقشىنى ۇستاپ, ولتىرگەن بولاتىن. وسىعان وراي, كاير كەك الۋ شارالارىنا, ياعني سودىرلار شەپتەرىن بومبالاۋعا كىرىسىپ كەتكەن ەدى.
*جاپونيانىڭ سولتۇستىك-شىعىسىندا ماگنيتۋداسى 6,9 باللدىق جەر سىلكىنىسى ءتىركەلگەن ەدى. وسىعان وراي, يۆاتە پرەفەكتۋراسىندا تسۋنامي قاۋپى جاريالاندى. جاعالاۋداعى حالىققا قاۋىپسىز جەرلەرگە جەدەل جەتۋ ۇسىنىلدى. بىراق كەيىن تسۋناميدەن قاۋىپ جوق ەكەنى بەلگىلى بولدى. ءزىلزالا زاردابى تۋرالى اقپارات جوق.
* يەمەندە تاعىنان تايدىرىلعان پرەزيدەنت ابد راببۋ مانسۇر حادي جاعىنداعى قارۋلى جاساق ەل استاناسى – ابدەن قالاسىنىڭ ءبىر بولىگىن باسىپ العان. بەس ساعاتقا سوزىلعان ۇرىستان سوڭ ءحاديدى جاقتاۋشى كوتەرىلىسشىلەر بىرقاتار اكىمشىلىك عيماراتتاردى ءوز باقىلاۋىنا كوشىرگەن. تەكەتىرەس جالعاسىپ جاتىر.
* اقش-تىڭ بىرقاتار شتاتتارىندا اۋا رايى ۇلكەن قولايسىزدىق تۋعىزىپ تۇر. ۆاشينگتوندا بوران سالدارىنان مەملەكەتتىك مەكەمەلەر مەن مەكتەپتەر جابىلىپ قالدى. اۆياكومپانيالار 2,6 مىڭ رەيسىن كەيىنگە شەگەردى. ەلدىڭ ءتۇرلى بولىكتەرىندە قالىڭ جاۋعان قار سالدارىنان 1,2 ميلليون ادام جارىقسىز وتىر. 25 ادام وپات بولدى دەگەن دەرەك بار.
*دانيانىڭ استاناسى – كوپەنگاگەن قالاسىندا 30 مىڭ ادامدىق نارازىلىق شاراسى بولىپ ءوتتى. بۇعان سەبەپ – وتكەن سەنبى كۇنى ومار ابدەل حاميد ءال-حۋسەين دەگەن 22 جاستاعى لاڭكەس تەررورلىق قادامعا بارىپ, ەكى ەۆرەي ازاماتىن ولتىرگەن ەدى. ءوزى دە پوليتسيا تاراپىنان جەر جاستاندىرىلعان بولاتىن.
* ەۋرووداق سانكتسيا ەنگىزىلەتىن (كىرۋگە تىيىم سالۋ جانە ەسەپشوتتاردى جاۋىپ تاستاۋ) ادامدار ءتىزىمىن كەڭەيتتى. بۇل جولى قارا ءتىزىمگە 5 رەسەيلىك ەنگىزىلدى. ولار: قورعانىس ءمينيسترىنىڭ ورىنباسارلارى اناتولي انتونوۆ پەن اركادي باحين, باس شتاب باستىعىنىڭ ورىنباسارى اندرەي كارتوپولوۆ, ءانشى يوسيف كوبزون جانە مەمدۋما دەپۋتاتى ۆالەري راشكين.
* اقش-تىڭ مەريلەند شتاتىندا 16 جاستاعى بوزبالا اتا-اناسى مەن قارىنداسىن اتىپ ولتىرگەننەن كەيىن ءوزى دە پوليتسيا قىزمەتكەرلەرىنىڭ قولىنان وققا ۇشتى. الدىن الا بولجام بويىنشا, بوزبالا اتا-اناسىنىڭ كومپيۋتەردى پايدالانۋعا تىيىم سالۋىنا نارازىلىعىن وسىلاي بىلدىرگەن سىڭايلى.
اقپارات اگەنتتىكتەرى ماتەريالدارىنىڭ نەگىزىندە ازىرلەندى.