مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا ەلىمىزدە جاڭا گاز كەن ورىندارى ونەركاسىپتىك پايدالانۋعا ەنگىزىلدى. بۇل تۋرالى ەنەرگەتيكا ءمينيسترى ەرلان اقكەنجەنوۆ حابارلادى, دەپ جازادى Egemen.kz.
پرەزيدەنت ءوز جولداۋىندا گاز سالاسىنداعى باستى مىندەتتەردىڭ ءبىرى – قۋاتتىلىقتى ارتتىرۋ جانە گاز تاسىمالداۋ باعىتتارىن ءارتاراپتاندىرۋ ەكەنىن اتاپ وتكەن بولاتىن. ۇكىمەت ءۇشىن حالىقتى جانە ەكونوميكانى تۇراقتى گازبەن قامتۋ – نەگىزگى باسىمدىقتاردىڭ ءبىرى بولىپ قالا بەرەدى.
ءمينيستردىڭ ايتۋىنشا, قازىرگى كەزەڭدەگى باستى مىندەت – رەسۋرستىق بازانى كەڭەيتۋ جانە وڭدەۋدى دامىتۋ. بۇل باعىتتا «2029 جىلعا دەيىنگى گاز سالاسىن دامىتۋدىڭ كەشەندى جوسپارى» جۇزەگە اسىرىلىپ جاتىر.
ەرلان اقكەنجەنوۆتىڭ دەرەگىنشە, ەلىمىزدە روجكوۆسكوە, ۇرىكتاۋ شىعىس جانە اناباي كەن ورىندارى ونەركاسىپتىك پايدالانۋعا بەرىلدى. سونداي-اق ءىرى گاز وڭدەۋ زاۋىتتارىنىڭ قۇرىلىسى قارقىندى ءجۇرىپ جاتىر. ولار قاشاعان, قاراشىعاناق جانە جاڭاوزەن كەن ورىندارىندا سالىنۋ كوزدەلدى.
كاسپي قايراڭىنداعى قاشاعان كەن ورنىندا قۋاتتىلىعى جىلىنا 1 ملرد م³ بولاتىن گاز وڭدەۋ زاۋىتىنىڭ قۇرىلىسى باستالعان. جوبا 2026 جىلى اياقتالۋى ءتيىس.
بۇدان بولەك, بيىل مامىر ايىندا «بەينەۋ – بوزوي – شىمكەنت» ماگيسترالدىق گاز قۇبىرىنىڭ ەكىنشى جەلىسىنىڭ قۇرىلىسى باستالدى. بۇل ەلىمىزدىڭ گاز تاسىمالداۋ جۇيەسىن ايتارلىقتاي كۇشەيتپەك.
ساراپشىلاردىڭ پىكىرىنشە, جاڭا كەن ورىندارىنىڭ ىسكە قوسىلۋى مەن وڭدەۋ زاۋىتتارىنىڭ سالىنۋى ەلىمىزدىڭ گاز سالاسىن جاڭا دەڭگەيگە شىعارىپ, ىشكى سۇرانىستى قامتاماسىز ەتۋمەن قاتار, ەكسپورتتىق الەۋەتىن دە ارتتىرادى.