تۇركىستان وبلىسى ورداباسى اۋدانىنىڭ ورتالىعى تەمىرلان ەلدى مەكەنىندە «مەكتەپكە جول» قايىرىمدىلىق اكتسياسى اياسىندا مەكتەپ جارمەڭكەسى ءوتتى, دەپ حابارلايدى Egemen.kz.
جارمەڭكەگە اۋدان ورتالىعىندا كاسىبىن دوڭگەلەتىپ وتىرعان 70-تەن استام كاسىپكەر اتسالىسىپ, جاڭا وقۋ جىلىنا قاجەتتى مەكتەپ فورمالارىن, سپورتتىق كيىمدەردى, كەڭسە تاۋارلارىن جانە وزگە دە قاجەتتى قۇرال-جابدىقتاردى نارىقتاعى باعادان تومەن, قولجەتىمدى باعادا ۇسىندى. سونداي-اق, جانى جومارت ازاماتتار جارمەڭكە بارىسىندا 310 بالاعا قوسىمشا قولداۋ كورسەتىپ, اقشالاي قاراجاتپەن قاتار كيىم-كەشەك جانە مەكتەپكە قاجەتتى كەڭسە تاۋارلارىن تابىس ەتتى. ايتا كەتەلىك, اۋدان بويىنشا 5 ساناتقا جاتاتىن 3 450 مەكتەپ جاسىنداعى بالانىڭ اتا-انالارىنىڭ شوتىنا 46 228 تەڭگە كولەمىندە قارجى اۋدارىلدى.
وسىنداي يگى ءىس-شارا تولەبي اۋدانىندا دا ءوتتى. «مەكتەپكە جول» رەسپۋبليكالىق اكتسياسى جانە «Amanat» پارتياسىنىڭ «بالانى مەكتەپكە دايىندايىق!» جالپىرەسپۋبليكالىق قايىرىمدىلىق اكتسياسى اياسىندا اۋدان ورتالىعىنداعى بىرقاتار مەكتەپتىڭ 120 وقۋشىسىنا مەكتەپ سومكەلەرى مەن قاجەتتى وقۋ قۇرال-جابدىقتارى تارتۋ ەتىلدى. سىيلىقتار مەكتەپ باسشىلىقتارىنا تابىستالدى. بۇل جولعى ەرەكشەلىك – وقۋ قۇرالدارى مەن سومكەلەر وقۋشىلارعا ءوز مەكتەپتەرى ارقىلى تابىستالاتىن بولادى.
ۇيىمداستىرۋشىلار بۇل قادام – بالالارعا دەگەن قۇرمەت پەن مەكتەپ ۇجىمىنىڭ بەدەلىن ارتتىرۋدى كوزدەيتىنىن ايتادى.