ۇلتتىق ستاتيستيكا بيۋروسىنىڭ 1446 بايلانىس ورتالىعى ازاماتتارعا ۇلتتىق اۋىل شارۋاشىلىعى ساناعىنا قاتىسۋ ماسەلەلەرى بويىنشا بەلسەندى تۇردە كەڭەس بەرىپ كەلەدى. 1 تامىزدان باستاپ بايلانىس ورتالىعىنا 10,5 مىڭنان استام ءوتىنىش كەلىپ ءتۇسىپ, ونىڭ 8,4 مىڭى تىكەلەي اۋىل شارۋاشىلىعى ساناعىنا قاتىستى بولدى, دەپ حابارلايدى Egemen.kz.
ساناق ونلاين فورماتتا ءوتىپ جاتىر. وسى ايدىڭ سوڭىنا دەيىن بارلىق اۋىل شارۋاشىلىعى قۇرىلىمدارى مەن ءۇي شارۋاشىلىقتارى ونلاين تۇردە sanaq.gov.kz رەسمي سايتىندا اۋىل شارۋاشىلىعى ساناعىنان وتە الادى. جەدەل كەڭەس الۋ ءۇشىن 1446 بايلانىس ورتالىعى تاۋلىك بويى جۇمىس ىستەپ تۇر. سونداي-اق «Sanaq myrza» چات-بوتى مەن سايتتاعى ونلاين-كونسۋلتانت سياقتى تسيفرلىق بايلانىس ارنالارى دا قولجەتىمدى. ەسكە سالايىق, ساناقتىڭ ەكىنشى كەزەڭى 2025 جىلعى 20 قىركۇيەكتەن 20 قازانعا دەيىن وتەدى. بۇل كەزەڭدە ينتەرۆيۋەرلەر ونلاين ساناقتان وتپەگەن ءۇي شارۋاشىلىقتارىن ارالاپ, دەرەكتەر جينايتىن بولادى. اۋىل شارۋاشىلىعى ساناعى – ەلدىڭ اگرارلىق سەكتورىن ءتيىمدى دامىتۋ ءۇشىن قاجەت ساپالى ستاتيستيكانى قالىپتاستىرۋ مەن اۋىل شارۋاشىلىعى وندىرۋشىلەرى تۋرالى دەرەكتەردى وزەكتەندىرۋدە ماڭىزدى ءرول اتقاراتىنىن ايتا كەتكەن ءجون.