بۇگىن ءماجىلىس دەپۋتاتى, جسدپ توراعاسى, فراكتسيا جەتەكشىسى اسحات راقىمجانوۆ شىعىس قازاقستان وبلىسىنداعى بەلوۋسوۆكا اۋىلىنىڭ تۇرعىندارىمەن كەزدەسىپ, ولاردىڭ ينفراقۇرىلىمعا قاتىستى كوتەرگەن ماسەلەلەرىن تىڭدادى, دەپ حابارلايدى Egemen.kz.
اۋىلدا ينفراقۇرىلىم, سۋ تاپشىلىعى, مەديتسينالىق قىزمەتتەردىڭ قولجەتىمسىزدىگى مەن ءدارى-دارمەك ماسەلەلەرى وتكىر تۇر. اسىرەسە تۇرعىندار قىس كەزىندە قاردى ەرىتىپ پايدالانۋعا ءماجبۇر. بۇل جايتقا قاتىستى اۋىل اكىمى اناتولي تاشنيچەنكو 1 قاراشاعا دەيىن سۋ قىسىمىن قالپىنا كەلتىرەتىندىگى جونىندە ۋادە بەردى.
قارتتارعا ارنالعان كۇندىزگى ستاتسيوناردىڭ جوقتىعى, اۋرۋحانادا قاجەتتى توسەك-ورىنداردىڭ جەتىسپەۋشىلىگى دە اۋىل تۇرعىندارىنىڭ الاڭداۋشىلىعىن تۋعىزىپ وتىر. جاڭا مەديتسينالىق عيماراتتىڭ قۇرىلىسى تەك 2027 جىلى باستالادى. بۇدان بولەك, كەزدەسۋدە ءدارى-دارمەك تاپشىلىعى ماسەلەسى دە ەگجەي-تەگجەيلى كوتەرىلدى.
اسحات راقىمجانوۆ بۇل ماسەلەلەردى شەشۋ ءۇشىن ۋاقىتشا ستاتسيوناردى ۇيىمداستىرۋدى, اۋرۋحانالاردا مەديتسينالىق قىزمەتتەردىڭ قولجەتىمدىلىگىن ارتتىرۋدى جانە ءدارى-دارمەك ساتىپ الۋ ءتارتىبىن قايتا قاراستىرۋدى ۇسىندى.
كەزدەسۋ سوڭىندا ءماجىلىس دەپۋتاتى تۇرعىنداردىڭ ماڭىزدى تالاپ-تىلەگىن ورىنداۋ تۇرعىسىندا جەرگىلىكتى بيلىكتىڭ جەدەل ارەكەت ەتۋى قاجەت ەكەندىگىن باسا ايتتى.
«تۇرعىندار اۋىز سۋمەن, ءدارى-دارمەكتەرمەن قامتاماسىز ەتۋدى جانە تىرشىلىككە قاجەتتى ينفراقۇرىلىمدى دۇرىس تالاپ ەتىپ وتىر. اكىمدىك حالىقتىڭ ناقتى سۇرانىستارىنا جاۋاپ بەرۋگە ءتيىس», دەدى ا.راقىمجانوۆ.
سونىمەن قاتار دەپۋتات بەلوۋسوۆكا تۇرعىندارىنىڭ سۇراقتارى مەن ۇسىنىستارىن ءتيىستى مەملەكەتتىك ورگاندارعا جولدايتىنىن, ال ولاردىڭ ورىندالۋ بارىسى دەپۋتاتتىڭ قاداعالاۋىندا بولاتىنىن اتاپ ءوتتى.