ەلىمىزدە اۆتوجول سالاسىنداعى بارلىق جوبالار «تسيفرلىق تەڭگە» باعدارلاماسى ارقىلى جۇزەگە اسىرىلاتىن بولادى. بۇل تۋرالى كولىك ءمينيسترى نۇرلان ساۋرانباەۆ ۇكىمەتتە وتكەن ءباسپاسوز ءماسليحاتىندا ءمالىم قىلدى, دەپ حابارلايدى Egemen.kz.
قاراجاتتى ماقساتسىز پايدالانۋعا قاتىستى جانە سىبايلاس جەمقورلىققا قارسى كۇرەس جونىندەگى سۇراققا جاۋاپ بەرە وتىرىپ, نۇرلان ساۋرانباەۆ تەمىرجولداعى ءىرى جوبالاردى جۇزەگە اسىرۋ تسيفرلىق تەڭگەگە اۋىستىرىلعانىن حابارلادى. مۇنداعى قارجىلاندىرۋدىڭ بۇكىل پروتسەسىن ۇلتتىق بانك رەتتەيدى. سوندىقتان دا بۇل قاراجاتتى ناقتى ماقساتىنا سايكەس جۇمساۋعا مۇمكىندىك بەرەدى.
«اۆتوجولدارعا كەلەتىن بولساق, ءبىز پاۆلودار مەن اتىراۋدا ەكى جوبا بويىنشا وسىنداي پيلوتتىق جوبانى باستادىق. قازىردىڭ وزىندە باعا ايىرماشىلىعىن سەزىنىپ وتىرمىز. ءبىز اۆتوجولدار بويىنشا بارلىق جوبالاردى تسيفرلىق تەڭگە ارقىلى جۇزەگە اسىراتىن بولامىز. وسىنداي باقىلاۋدىڭ ارقاسىندا اقشا ماقساتسىز جۇمسالمايتىن بولادى», دەپ اتاپ ءوتتى مينيستر.
سپيكەر وسى جۇيەنىڭ ارقاسىندا قاراجاتتى اۋدارۋدىڭ بارلىق پروتسەسى اشىق جانە باقىلاۋ وڭاي بولاتىنىن ءتۇسىندىردى. مەملەكەتتىك كىرىستەر كوميتەتىمەن بىرلەسىپ مۇنىڭ ءبارى قاتاڭ باقىلانادى.
«تسيفرلىق تەڭگە» دەگەنىمىز, بۇل – ۇلكەن باعدارلاما. پرەمەر-مينيستر ءتيىستى جيىن وتكىزىپ, تاپسىرما بەردى. پيلوتتىق باعدارلاما ىسكە قوسىلدى. جول كارتاسى بويىنشا مەرزىمدەر بەلگىلەندى. ءبىز قۇرىلىس جۇمىستارى تسيفرلىق تەڭگە ارقىلى جۇزەگە اسىرىلۋى ءتيىس دەگەن شارت قويامىز. بۇل باسقا جەرگە اقى تولەۋگە مۇمكىندىك بەرمەيتىن ءجۇز پايىز اشىقتىقتى قامتاماسىز ەتەدى», دەپ اتاپ ءوتتى ن.ساۋرانباەۆ.