تۇركىستان وبلىستىق «ەڭبەك موبيلدىلىگى ورتالىعىنىڭ» ۇيىمداستىرۋىمەن ساۋران اۋدانى, ورانعاي اۋىلىندا وڭىردەگى جۇمىسسىز ازاماتتار مەن جاستارعا ارنالعان بوس جۇمىس ورىندارى جارمەڭكەسى ءوتتى. جارمەڭكەگە تۇركىستان, كەنتاۋ قالالارى مەن ساۋران اۋدانىنان 30 جۇمىس بەرۋشى قاتىسىپ, 700-دەن استام بوس جۇمىس ورنىن ۇسىندى, دەپ حابارلايدى Egemen.kz.
ناتيجەسىندە, 300-گە جۋىق تۇرعىن جۇمىس بەرۋشىلەرمەن تىكەلەي سۇحباتتاسىپ, ماماندىقتارىنا سايكەس جۇمىسقا ورنالاسۋعا مۇمكىندىك الدى. جالپى ونەركاسىپ سالاسىندا 445 جۇمىس ورنى, اۋىل شارۋشىلىعى سالاسىندا – 33, قۇرىلىس پەن تۇرعىن ءۇي كوممۋنالدىق شارۋاشىلىعى سالالارىندا – 150, ءبىلىم – 38, دەنساۋلىق ساقتاۋ – 14, قىزمەت كورسەتۋ سالاسىندا 96 جۇمىس ورنى ۇسىنىلدى. ولاردىڭ قاتارىندا فارماتسەۆت, نەۆروپاتولوگ, تراۆماتولوگ-ورتوپەد, بالا دارىگەرى, پسيحولوگ, لوگوپەد, مادەني شارالار ۇيىمداستىرۋشى, كىتاپحاناشى, باعبان, شاشتاراز, سۋ سورعى ستانتسياسى ءماشينيسى, سانيتار, ينجەنەر, اۋدارماشى, ەسەپشى, زاڭگەر, مەحانيك, ەلەكتريك, دانەكەرلەۋشى, وپەراتور, تەحنولوگ, جۇرگىزۋشى, پەداگوگ, تاربيەشى, تىگىنشى, اسپاز, لابورانت, كۇزەتشى, IT مامانى جانە وزگە دە 70-تەن استام ماماندىق ءتۇرى بار.
ايتا كەتەيىك, جىل باسىنان بەرى وڭىرلىك جۇمىسپەن قامتۋ كارتاسى اياسىندا 74630 ازامات تۇراقتى جانە سۋبسيديالاناتىن جۇمىس ورىندارىنا جولدانعان. ونىڭ ىشىندە, تۇراقتى جۇمىس ورنىنا 36415 ازامات ورنالاسسا, سۋبسيديالاناتىن جۇمىس ورىندارىنا 38215 ازامات جولدانعان.