ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ اگرەگاتورلارىن پايدالانۋ جونىندەگى قاناتقاقتى جوبانى ىسكە اسىرۋ قارقىن الىپ كەلەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن بيىلعى جەتى ايدا استانا مەن الماتىدا 266,8 مىڭ رەت ينۆاتاكسي قىزمەتى كورسەتىلدى.
بىلتىر مۇگەدەكتىگى بار ادامدار ينۆاتاكسي قىزمەتىن 207,2 مىڭ رەت پايدالانعان. ينۆاتاكسي قىزمەتىن كورسەتۋ جىلدامدىعى مەن ساپاسىن ارتتىرۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى جەرگىلىكتى اكىمدىكتەرمەن بىرلەسىپ, وسى قىزمەتكە وزگەرىس ەنگىزدى. مىسالى, ازاماتتارعا قىزمەت الۋدان ءبىر كۇن بۇرىن تەلەفون ارقىلى جازىلۋ قاجەت, بۇل ءوز ساپارلارىن الدىن الا جوسپارلاۋعا, ينۆاتاكسيگە تاپسىرىس بەرۋدى كۇتۋگە ءماجبۇر ەتەدى, ينۆاتاكسي قىزمەتتەرىن ۇسىنۋدا كولىك سانىنىڭ ازدىعى سىندى ماسەلە دە تۋىندايدى. شارتتاردى جەڭىلدەتۋ ءۇشىن وسى قىزمەتتى كورسەتۋگە قاتىسۋعا ءتيىستى سۇرانىس العان تاكسي اگرەگاتورلارىن تارتۋ ماقساتىندا قاناتقاقتى جوبا قولعا الىندى.
مۇنداعى باستى شارت ساپارلاردىڭ اقىسىنان پايىزدىڭ بولماۋى, ولار ادەتتە اگرەگاتور پلاتفورمالارىنىڭ پايداسىنا اۋدارىلاتىن. ياندەكس كومپانياسى قاناتقاقتى جوباعا وتەۋسىز نەگىزدە قاتىسۋعا نيەت ءبىلدىردى.
جوبا شەڭبەرىندە ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانا الادى. بۇل قىزمەتتى الۋشى ءۇشىن كولىكتى تەزىرەك تاڭداۋعا, ونلاين رەجىمدە تاپسىرىس مارتەبەسىن قاداعالاپ, ءارى ساپارلارعا مونيتورينگ جۇرگىزۋگە مۇمكىندىك بەرەدى. قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە, جۇرگىزۋشىلەر ادامدى كولىككە وتىرعىزىپ, مەجەلى جەرگە جەتكەن سوڭ تۇسىرۋدە قالاي كومەك كورسەتۋ قاجەتتىگىن ارنايى نۇسقاۋلاردان بىلە الادى.
بيىل جوبا استانا مەن الماتى قالالارىنان مۇگەدەكتىگى بار ادامدار قاتارىنان فوكۋس-توپتىڭ قاتىسۋىمەن قاناتقاقتى رەجىمدە ىسكە اسىپ جاتىر. مينيسترلىك كەلەشەكتە باسقا وڭىرلەردە دە يگى جوبانى ىسكە قوسۋدى كوزدەپ وتىر.