سەربيادا ءۇشىنشى كۇن قاتارىنان پرەزيدەنت الەكساندر ءۆۋچيچتىڭ جاقتاستارى مەن قارسىلاستارىنىڭ قاقتىعىستارى جالعاسىپ جاتىر. ۆالەۆو قالاسىندا (بەلگرادتان 100 شاقىرىم قاشىقتىقتا) نارازىلار پوليتسيامەن قاقتىعىسىپ, سەرب پروگرەسسيۆتى پارتياسىنىڭ كەڭسەسىن وت قويۋعا تىرىستى. ءتارتىپ ساقشىلارى كوز جاساۋراتاتىن گاز قولدانىپ, 18 ادامدى ۇستادى. ءبىر پوليتسەي جارالانعانى حابارلاندى, دەپ جازادى Egemen.kz.
بەلگرادتا دا جاعداي شيەلەنىستى. نارازىلار قوقىس جاشىكتەرىن ورتەپ, پوليتسياعا تاس پەن بوتەلكە لاقتىردى. پوليتسيا گاز قولداندى, بىراق زارداپ شەككەندەر جايلى مالىمەت ءالى بەرىلگەن جوق.
بۇعان دەيىنگى كۇندەرى 30 قالادا بولعان قاقتىعىستاردا 42 پوليتسەي جارالانعان, 37 ادام قاماۋعا الىنعان. نوۆي-سادتا دا پارتيا كەڭسەسى باسىپ كىرگەندەر تاراپىنان ب ۇلىنگەن. ىشكى ىستەر ءمينيسترى يۆيتسا داچيچ جاعدايدى «مەملەكەتكە قارسى شابۋىل» دەپ باعالاپ, قاتاڭ شارالار قابىلداۋدى تالاپ ەتتى.
پرەزيدەنت ۆۋچيچ قۇقىق قورعاۋ جۇيەسىنە رەفورما جاسايتىنىن ايتىپ, تارتىپسىزدىكتەرگە قاتىسقانداردىڭ كوبىرەك ۇستالا باستاعانىن مالىمدەدى. بۇعان دەيىن ول «ازاماتتىق سوعىسقا جول بەرمەۋ ءۇشىن بەلگراد پەن نوۆي-ساد كوشەلەرىن بۇزاقىلاردان تازارتۋ قاجەت» دەگەن بولاتىن.
تولقۋلاردىڭ باستى سەبەبى – 2024 جىلعى 1 قاراشادا نوۆي-سادتاعى ۆوكزالدىڭ جاڭا سالىنعان بەتون جابىنى قۇلاپ, 16 ادامنىڭ قازا تابۋى. بۇل وقيعا بيلىككە دەگەن سەنىمسىزدىكتى كۇشەيتىپ, ەلدە سوڭعى ونجىلدىقتاعى ەڭ ءىرى نارازىلىقتارعا تۇرتكى بولدى. قوعامدىق پىكىردە تراگەدياعا سەبەپ رەتىندە جەمقورلىق پەن قۇرىلىس سالاسىنداعى جاۋاپسىزدىق اتالدى.
وقيعادان كەيىن قۇرىلىس ءمينيسترى گوران ۆەسيچ وتستاۆكاعا كەتىپ, كەيىن ءوزى جانە تاعى وننان استام ادام قاماۋعا الىنعان. قاڭتاردا پرەمەر-مينيستر ميلوش ۆۋچەۆيچ قىزمەتىنەن بوساتىلدى, ال ناۋرىزدا جاڭا ۇكىمەتتى پروفەسسور دجۋرو ماتسۋت باسقاردى.