اقمولا وبلىسىنىڭ 910 اۋىل شارۋاشىلىعى قۇرىلىمدارى پرەزيدەنتتىڭ تاپسىرماسىن ورىنداۋ شەڭبەرىندە جەڭىلدىكتى قارجىلاندىرۋعا ەرتە قول جەتكىزۋدى پايدالاندى, دەپ حابارلايدى Egemen.kz.
پرەزيدەنت قاسىم-جومارت توقاەۆتىڭ تاپسىرمالارىن جۇزەگە اسىرۋ اياسىندا ۇكىمەت كوكتەمگى دالا جۇمىستارىن الدىن الا قارجىلاندىرۋدى 2024 جىلدىڭ قاراشا ايىندا باستادى. قابىلدانعان شارالاردىڭ ناتيجەسىندە اقمولا وبلىسىندا 910 اۋىل شارۋاشىلىعى قۇرىلىمى جەڭىلدىكپەن نەسيەلەندىرۋدى پايدالاندى.
- جەلتوقساننان باستاپ ءبىزدىڭ تاۋار وندىرۋشىلەر جەڭىلدەتىلگەن قارجىلاندىرۋعا قول جەتكىزدى. اتاپ ايتقاندا, بۇگىنگى تاڭدا 910 اۋىل شارۋاشىلىعى قۇرىلىمى جالپى سوماسى 117 ملرد تەڭگەنى 5%-بەن الدى, — دەدى اقمولا وبلىسى اۋىل شارۋاشىلىعى جانە جەر قاتىناستارى باسقارماسىنىڭ باسشىسى نۇربەك بادىراقوۆ.
2025 جىلى وڭىردەگى اۋىل شارۋاشىلىعى داقىلدارىنىڭ ەگىس القابى 5,5 ملن گەكتاردى قۇرادى, بۇل وتكەن جىلمەن سالىستىرعاندا 300 مىڭ گەكتارعا ارتىق.
- مەملەكەت باسشىسىنىڭ تاپسىرماسى اياسىندا اۋىل شارۋاشىلىعى داقىلدارىن ارتاراپتاندىرۋعا ەرەكشە كوڭىل بولىنۋدە. ونىڭ ىشىندە مايلى داقىلداردىڭ ەگىس القابى 226 مىڭ گەكتارعا ۇلعايىپ, العاش رەت 495 مىڭ گەكتار ەگىلدى, — دەپ اتاپ ءوتتى نۇربەك بادىراقوۆ.
ونىڭ ايتۋىنشا, مەملەكەتتىك رەزەرۆتەن مينەرالدى تىڭايتقىشتاردىڭ قۇنىن سۋبسيديالاۋعا 12 ملرد تەڭگە ءبولىندى, بۇل ولاردى ەنگىزۋ كولەمىن الدىڭعى ەكى جىلمەن سالىستىرعاندا ءۇش ەسەگە ارتتىرۋعا مۇمكىندىك بەردى.
ال سولتۇستىك قازاقستان وبلىسىندا كۇزدىك بيدايدىڭ ونىمدىلىگى 50 تس/گا جەتكەن. سولتۇستىك قازاقستان وبلىسىندا ەگىن جيناۋ ناۋقانى باستالدى. كۇزدىك بيداي ەگىلگەن القاپتاردان فەرمەرلەر گەكتارىنا 40-50 تسەنتنەردەن ءونىم جيناۋدا.فەرمەرلەردىڭ ايتۋىنشا, جوعارى ءونىم مەملەكەتتىك قولداۋدىڭ ارقاسىندا مۇمكىن بولدى.
- ءبىز "كەڭ دالا" باعدارلاماسى بويىنشا بيىل 319 ملن تەڭگە الدىق. مەملەكەتتىك سۋبسيديالاۋ تىڭايتقىشتارعا, تۇقىمدارعا بولىنەدى, بۇل مەملەكەت تاراپىنان وتە جاقسى قولداۋ, — دەپ اتاپ ءوتتى سولتۇستىك قازاقستان وبلىسىنىڭ فەرمەرى عاباس جانتاەۆ پرەزيدەنتتىڭ تاپسىرماسى بويىنشا اگرارشىلارعا كوڭىل بولگەنى ءۇشىن العىسىن ءبىلدىرىپ.