قر پرەزيدەنتى قاسىم-جومارت توقاەۆ رەسپۋبليكالىق ۇستازدار كونفەرەنتسياسىندا ءبىلىم بەرۋ جۇيەسىن تسيفرلاندىرۋ جانە جاساندى ينتەللەكتىنى قولدانۋ ماسەلەلەرىنە ەرەكشە نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى مۇعالىم ءوز ءپانىن جەتىك ءبىلىپ قانا قويماي, پەداگوگيكالىق تاجىريبەدە جاڭا تەحنولوگيالاردى دا قولدانا ءبىلۋى كەرەك دەپ سانايدى.
ء«بىلىم بەرۋ مەكەمەلەرىن ءتيىستى ينتەراكتيۆتى قۇرال-جابدىقپەن قامتاماسىز ەتۋ كەرەك. وقىتۋعا ارنالعان تسيفرلىق پلاتفورمالار مەن ەلەكتروندى وقۋلىقتار بارلىق وقۋشىعا قولجەتىمدى بولۋعا ءتيىس. بۇل رەتتە وقىتۋ ماتەريالدارى تۇگەل مۇقيات ساراپتالۋى كەرەك», دەيدى پرەزيدەنت.
قاسىم-جومارت توقاەۆتىڭ ايتۋىنشا, كەلەسى ماڭىزدى مىندەت - بالالارعا جاستايىنان جاساندى ينتەللەكت تەحنولوگياسىن وقىتقان ءجون.
«بۇل – بولاشاقتا جاستارىمىزدىڭ باسەكەگە قابىلەتتى وزىق مامان بولۋىنا قاجەتتى بىردەن-ءبىر داعدى. بۇل پەداگوگتەرگە دە قاتىستى. مۇعالىم ءوز ءپانىن جەتىك مەڭگەرىپ قانا قويماي, پەداگوگيكالىق تاجىريبەدە جاڭا تەحنولوگيالاردى دا قولدانا ءبىلۋى كەرەك», دەپ اتاپ ءوتتى مەملەكەت باسشىسى.
پرەزيدەنتتىڭ ايتۋىنشا, ءبىلىم بەرۋ سالاسىن مۇلدەم جاڭا ساپالى دەڭگەيگە شىعارۋ ءۇشىن تسيفرلاندىرۋ مەن جاساندى ينتەللەكتىنىڭ مۇمكىندىكتەرىن تولىق پايدالانۋ قاجەت.
«سىزدەر تۇتاس ەلىمىزدى تەحنولوگيالىق تۇرعىدان جاڭعىرتۋ ىسىندە الدىڭعى شەپتەن تابىلىپ, ءبىزدىڭ قوعامدى ناعىز پروگرەسسيۆتى ءارى دامىعان ۇلتقا اينالدىرۋعا ەرەن ۇلەس قوساسىزدار دەپ سەنەمىن», دەدى قاسىم-جومارت توقاەۆ.