2033 جىلعا قاراي جاساندى ينتەللەكت نارىعىنىڭ كولەمى 4,8 تريلليون دوللارعا جەتۋى – ادامزاتتىڭ تەحنولوگيالىق دامۋ تاريحىنداعى ەڭ اۋقىمدى سەرپىلىستەردىڭ ءبىرى بولماق. بۇل – تەك ءىت سالاسىنىڭ ەمەس, تۇتاس ەكونوميكانىڭ قۇرىلىمىن, ەڭبەك نارىعىن, ءبىلىم بەرۋ جۇيەسىن جانە ءتىپتى مادەنيەتتى وزگەرتۋگە قابىلەتتى قۇبىلىس. وسىنداي قارقىندى وزگەرىستەر جاعدايىندا ەلىمىز بۇل ۇدەرىستەن شەت قالماۋعا ءتيىس.
ءبىز – الەمدىك نارىقتىڭ ءبىر بولشەگىمىز, سوندىقتان جي سالاسىندا بولىپ جاتقان كەز كەلگەن ءىرى جاڭالىق ەلىمىزدىڭ ەكونوميكاسى مەن قوعامىنا تىكەلەي ىقپال ەتەدى. الەمدەگى تەحنولوگيالىق كۇشتەر قازىردەن باستاپ جي-ءدى مەديتسينادان باستاپ ونەرگە دەيىن, وندىرىستەن باستاپ مەملەكەتتىك باسقارۋعا دەيىنگى بارلىق باعىتتا قولدانۋعا كىرىستى. بۇل – ەلىمىز ءۇشىن دە ەكونوميكالىق ءوسىمنىڭ, ەكسپورتتى ۇلعايتۋدىڭ جانە جاڭا ماماندىقتار قالىپتاستىرۋدىڭ ۇلكەن مۇمكىندىگى. «Astana Hub» ەكوجۇيەسى ءدال وسى مۇمكىندىكتى ۇتىمدى پايدالانىپ, ايماقتىق تەحنولوگيالىق حاب ءرولىن اتقارۋعا قادام جاساپ وتىر. قازىردىڭ وزىندە وتاندىق ستارتاپتار ىشىندە الەمدىك دەڭگەيدە مويىندالعاندارى بار. مىسالى, مەديتسيناداعى بيوتەحنولوگيانى دامىتاتىن «Arlan Biotech», كونتەنت گەنەراتسياسى بويىنشا شەشىمدەر ۇسىناتىن «Higgsfield AI» سياقتى جوبالار ءبىزدىڭ ەلدىڭ جي سالاسىندا باسەكەگە قابىلەتتى ەكەنىن دالەلدەپ وتىر.
مەملەكەت باسشىسى قاسىم-جومارت توقاەۆ اتاپ وتكەندەي, الداعى ون جىلدا ەلىمىزدىڭ باستى مىندەتى – وسىنداي ستارتاپتارعا ينۆەستيتسيا تارتۋ, تەحنولوگيانى جەرگىلىكتى نارىققا بەيىمدەۋ جانە ەكسپورتتىق باعىتتى كۇشەيتۋ بولۋعا ءتيىس. بۇل – ەلىمىزگە جاھاندىق جي نارىعىندا ءوز ورنىن يەلەنۋگە جول اشادى. ءبىز جاساندى ينتەللەكتىنىڭ تۇتىنۋشىسى عانا ەمەس, ءوندىرۋشىسى, ەكسپورتتاۋشىسى بولۋىمىز كەرەك.
حح عاسىردا جاپونيا مەن وڭتۇستىك كورەيا يننوۆاتسيانىڭ التىن ءداۋىرىن دەر كەزىندە پايدالانىپ, تەحنولوگيالىق الپاۋىتتارعا اينالدى. ەندى ءدال سونداي مۇمكىندىك بىزگە دە بەرىلىپ وتىر. «مۇمكىندىك تەرەزەسى» ارقاشان اشىق تۇرمايدى. ەگەر قازىر ارەكەت ەتسەك, ەلىمىز جي نارىعىندا ماڭىزى بار ەلگە اينالادى.
دانابەك قالياجداروۆ,
«Astana HUB» باس ديرەكتورىنىڭ كەڭەسشىسى, IT-ساراپشى