سۋ رەسۋرستارى جانە يرريگاتسيا مينيسترلىگى قۇرىلعالى بەرى حالىقارالىق ارىپتەستەرمەن 4 كەلىسىم جانە 20 مەموراندۋمعا قول قويدى. مەملەكەت باسشىسىنىڭ تاپسىرمالارىن ورىنداۋ ماقساتىندا سالا مينيسترلىگى فرانتسيا, گەرمانيا, نيدەرلاندى, يسپانيا, جاپونيا جانە قحر سياقتى ەلدەردىڭ حالىقارالىق ۇيىمدارىمەن, سۋ سالاسى مەكەمەلەرىمەن, دامۋ اگەنتتىكتەرىمەن جانە كومپانيالارىمەن ارىپتەستىك ورناتتى. سۋ سالاسىن دامىتۋعا گرانتتار تۇرىندە 14 ملن دوللاردان استام قارجى تارتىلعان, دەپ حابارلايدى Egemen.kz اتالعان ۆەدومستۆونىڭ مالىمەتىنە سىلتەمە جاساپ.
بىلتىر جەلتوقسان ايىندا سۋ رەسۋرستارى جانە يرريگاتسيا مينيسترلىگى, فرانتسيانىڭ دامۋ اگەنتتىگى (AFD) جانە فرانتسيانىڭ گەولوگيالىق جانە تاۋ-كەن زەرتتەۋ بيۋروسى (BRGM) بالقاش كولىن ساقتاۋ جونىندە ۇشجاقتى ىنتىماقتاستىق كەلىسىمىنە قول قويدى. كەلىسىم اياسىندا كول باسسەينىن زەرتتەۋ جانە بالقاشتى ساقتاۋ بويىنشا ماستەر-جوسپار ازىرلەۋ ءۇشىن 1,35 ملن ەۋرو كولەمىندەگى گرانت قاراستىرىلعان.
بيىلعى ماۋسىم ايىندا الماتى وبلىسىنىڭ بالقاش اۋدانىندا وتاندىق عىلىمي ينستيتۋتتار مەن جەرگىلىكتى اتقارۋشى ورگانداردىڭ قاتىسۋىمەن سۋ رەسۋرستارى جانە يرريگاتسيا مينيسترلىگى مەن فرانتسۋز عىلىمي كونسورتسيۋمى ۇيىمداستىرعان اۋقىمدى دالالىق ەكسپەديتسيا ءوتتى.
وسى جىلى ناۋرىز ايىندا قازاقستان مەن قىتايدىڭ سۋ شارۋاشىلىعى ۆەدومستۆولارى ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى. قۇجاتتا سۋدى ۇتىمدى ءارى تۇراقتى پايدالانۋ, زاماناۋي تەحنولوگيالاردى ەنگىزۋ, سونداي-اق تاجىريبە الماسۋ جانە كادرلاردى بىرلەسىپ دايارلاۋ كوزدەلگەن.
بيىل قىتايدا وتاندىق سۋ سالاسىنىڭ 121 مامانى بىلىكتىلىگىن ارتتىرۋ كۋرستارىنان ءوتىپ جاتىر. كەلەسى جىلى بۇل كورسەتكىش شامامەن 200 ادامعا جەتپەك.
قازاقستان مەن نيدەرلاندى سۋ تاسقىنىنا قارسى كۇرەس جانە سۋ سالاسى ماماندارىن دايارلاۋ باعىتىندا مەموراندۋمدارعا قول قويدى. ءبىرىنشى قۇجاتتا تاسقىن سۋلاردى رەتتەۋ جانە پايدالانۋ تاجىريبەسىمەن الماسۋ, سونداي-اق وزەن اعىستارىن باسقارۋدا نيدەرلاندى تاجىريبەسىن زەردەلەۋ قاراستىرىلعان. ەكىنشى مەموراندۋم دەلفت سۋ رەسۋرستارىن وقىتۋ ينستيتۋتىمەن (IHE Delft) جاسالىپ, سۋ سالاسىندا ماماندار دايارلاۋدى, عىلىم جانە يننوۆاتسيالىق تەحنولوگيالار سالاسىنداعى ىنتىماقتاستىقتى قامتيدى.
وسى كەلىسىمدەر اياسىندا نيدەرلاندتىق ساراپشىلار ەلىمىزدە سۋ تاسقىنى قاۋپىن باسقارۋ بويىنشا وقىتۋ سەمينارلارىن وتكىزدى. سونداي-اق قازاقستاندا سۋ تاسقىنىن بولجاۋ جانە مودەلدەۋ جۇيەسىن قۇرۋ ءۇشىن Delft-FEWS تسيفرلىق پلاتفورماسى قولدانىلىپ جاتىر. بيىل قازان ايىندا نيدەرلاندىنىڭ استاناداعى ەلشىلىگىمەن بىرلەسىپ گيدرولوگيالىق مودەلدەۋدى باعدارلامالىق قامتاماسىز ەتۋ بويىنشا ترەنينگ وتكىزۋ جوسپارلانىپ وتىر.
«جاپونيا ۇكىمەتىمەن ەلىمىزدە بوگەتتەردى كەشەندى باسقارۋ ارقىلى سۋ تاسقىنىنا قارسى شارالاردى جەتىلدىرۋگە 2 ملن اقش دوللارى كولەمىندە قارجى ءبولۋ تۋرالى كەلىسىم جاسالدى. ال يسپانيا ۇكىمەتى باتىس قازاقستانداعى جەراستى سۋ كەن ورىندارىن زەرتتەۋگە گرانت ءبولۋدى جوسپارلاپ وتىر. مۇنداي حالىقارالىق كەلىسىمدەر مەملەكەت باسشىسىنىڭ تاپسىرمالارىن ساپالى جانە ۋاقىتىلى ورىنداۋعا باعىتتالعان», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.