قوستاناي وبلىسى اۋماعىندا 15 ساۋىردەن باستاپ ءورت قاۋىپسىزدىگى ايلىعى اياسىندا اۋقىمدى رەيدتەر وتەدى. اتالعان ءىس-شارا ءورت قاۋىپسىزدىگىنە جاۋاپتى قىزمەتتەردىڭ الدا كەلە جاتقان جىلۋ ماۋسىمىنا ازىرلىگىن قامتاماسىز ەتۋدى, سونداي-اق ءورتتىڭ الدىن الۋدى كوزدەيدى, دەپ حابارلايدى Egemen.kz.
«وسىعان وراي, 15 تامىز كۇنى ساعات 15:00-دە «اق-شاڭىراق» جاعاجايىنىڭ جانىنداعى اۆتوتۇراقتا رەيدتىك ءىس-شارا وتەدى. رەيد بارىسىندا تجد ماماندارى الەۋمەتتىك وسال توپتارعا جاتاتىن ازاماتتاردىڭ ءۇي-جايىن ارالاپ, ولارعا قاۋىپسىزدىك شارالارى بويىنشا كومەك كورسەتىلەدى. اتاپ ايتقاندا, ءبىزدىڭ قىزمەتكەرلەر جەكە ۇيلەردىڭ مۇرجاسىن تەكسەرىپ, ونى ءۇي يەسى تازالاي المايتىن جاعدايدا بولسا, كومەك بەرەدى. سونىمەن قاتار, ءۇي ىشىندە ۋلى گاز بولىنگەندە بەلگى بەرەتىن قۇرىلعىلاردىڭ بار-جوعىن تەكسەرەدى», دەيدى وڭىردەگى توتەنشە جاعداي دەپارتامەنتىنىڭ رەسمي وكىلى ايدانا ماناتقىزى.
ءبۇتىن ءوڭىردى قامتيتىن ءورت قاۋىپسىزدىگى ايلىعىنا تجد قىزمەتكەرلەرى, پوليتسيا جانە جەرگىلىكتى اتقارۋشى ورگاندار, ەرىكتىلەر, الەۋمەتتىك قىزمەتكەرلەر, ازاماتتىق قورعاۋ ورگاندارىنىڭ وزگە دە قىزمەتكەرلەرى قاتىسادى.
قوستاناي وبلىسى