2025 جىلعى شىلدە ايىندا ەلىمىزدىڭ اۋە تاسىمالى سالاسى ايتارلىقتاي ءوسىم كورسەتىپ, وتاندىق اۋە كومپانيالارى 1,7 ميلليون جولاۋشىنى جەتكىزدى. بۇل وتكەن جىلدىڭ شىلدە ايىمەن سالىستىرعاندا 12,9%-عا ارتىق. اتالعان كورسەتكىش 2007 جىلدان بەرى ءبىر ايدا تىركەلگەن ەڭ جوعارى ناتيجە بولىپ وتىر, دەپ مالىمدەدى ۇلتتىق ستاتيستيكا بيۋروسى, دەپ جازادى Egemen.kz.
جالپى, بيىلعى جىلدىڭ باسىنان بەرى اۋە ارقىلى تاسىمالدانعان جولاۋشىلار سانى 9 ميلليونعا جۋىقتادى.
سالاداعى قارجىلىق ءتۇسىم دە ارتىپ كەلەدى: تەك شىلدە ايىنىڭ وزىندە جولاۋشىلاردى تاسىمالداۋدان تۇسكەن كىرىس 113 ملرد تەڭگەنى قۇرادى, بۇل وتكەن جىلمەن سالىستىرعاندا 15,6%-عا كوپ.
ال 2025 جىلدىڭ العاشقى جەتى ايىنداعى جالپى تابىس كولەمى 500 ميلليارد تەڭگەدەن اسىپ, جىلدىق ءوسىم 0,9%-دى كورسەتتى.