قامبا دانگە تولار كۇن جاقىن

26,7 ميلليون توننا داقىل جينالدى

ماسەلەن, ەگىس كولەمى ءارتاراپتان­دىرىلىپ, بيىل مايلى داقىلدارعا مولىراق ورىن ءتيدى. بۇل مەملەكەت باسشىسىنىڭ اۋىل شارۋاشىلىعى ءوندىرىسىن 5 جىلدا 2 ەسەگە ارتتىرۋ تۋرالى تاپسىرماسىمەن ۇشتاسادى. جالپى, وسى جىلى 4,3 ملن گەكتار جەرگە ءدان سىڭىرىلسە, سونىڭ 3 ملن گەكتارى ءداندى, قالعان 1 ملن گەكتاردان ارتىعى مايلى داقىلدار.

بىلتىر قاراشا ايىندا بولعان اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا سويلەگەن سوزىندە مەملەكەت باسشىسى قاسىم-جومارت توقاەۆ: «قازاقستان ەگىس القابى جانە جايىلىمدىق جەر كولەمى جاعىنان الەمدە التىنشى ورىن الادى. ءبىز بيداي ەكسپورتتايتىن 10 ءىرى مەملەكەتتىڭ قاتارىنا كىرەمىز. ۇن ەكسپورتى بويىن­شا كوش باسىنداعى ەلدىڭ ءبىرىمىز. بيىل ءتۇرلى قيىندىققا قاراماستان, قام­­بامىز استىققا تولدى. كۇزگى جيىن-تەرىمدە 26,7 ميلليون توننا دا­­قىل جي­نالدى.

بۇل – كەيىنگى ون جىل­داعى رەكورد­تىق كورسەتكىش», دەي كەلىپ, ال­داعى ۋاقىتتا اگروونەركاسىپ كەشە­نىن قار­جىلاندىرۋدى جۇيەلى جۇر­گىزۋدى, سالانى يندۋستريالاندىرۋدى بەل­سەندى تۇردە جالعاستىرۋدى, اۋىل شارۋا­شىلىعى عىلىمىن وركەندەتۋدى, سەلەكتسيا مەن تۇقىم شارۋاشىلىعىن جانداندىرۋدى, وزىق تەحنولوگيالار ەنگىزۋدى, اۋىل شارۋاشىلىعى تەحنيكاسىنىڭ قولجە­تىمدىلىگىن ارتتىرۋ جانە اگروونەركاسىپ سالاسىنىڭ ەكسپورتتىق الەۋەتىن كۇشەي­تۋدى تاپسىرعان ەدى.

«پرەزيدەنت تاپسىرمالارى قالاي ورىندالىپ جاتىر؟» دەگەن ساۋالدىڭ جا­ۋابىن جۋىردا مامليۋت اۋدانىنداعى « ۇلى دالا استىعى» اتتى وراق الدىن­دا­عى وبلىس اۋىل شارۋاشىلىعى ەڭبەك­كەرلەرىنىڭ سەمينارىندا ەستىدىك. سەمي­نار جۇمىسىنا وبلىس اكىمى عاۋەز نۇر­مۇحامبەتوۆ, اۋىل شارۋاشىلىعى ءمينيس­ترىنىڭ ورىنباسارى امانعالي بەردالين, اۋدان اكىمدەرى, شارۋاشىلىق باسشىلارى, عىلىمي ورتا, مەملەكەتتىك ورگانداردىڭ وكىلدەرى جانە كورشى ەلدەردەگى ارىپتەستەر قاتىستى.

بيىلعى وراقتان نە كۇتەمىز؟

وبلىس اكىمىنىڭ ءبىرىنشى ورىنباسارى مارات تاسماعانبەتوۆتىڭ ايتۋىنا قاراعاندا, بيىلعى كوكتەم بىرقالىپتى بولعان جوق. مامىر ايىندا عانا كليمات­تىق نورما بويىنشا تۇسۋگە ءتيىستى 31,8 مم جاۋىن-شاشىننىڭ ورنىنا 73 مم ىلعال ءتۇسىپ, ءدال ەگىس ۋاقىتىندا قالىڭ باتپاق­تان تەحنيكالار ەگىسكە كىرە الماي قالدى.

«سونىڭ كەسىرىنەن تەحنيكالار قاڭ­تارىلىپ, ەگىس ۋاقىتى سوزىلىپ كەتتى. سوعان قاراماي وبلىس ديقاندارى ءاربىر ءساتتى كەزەڭدى ۇتىمدى پايدالانىپ, ەگىستى از ۋاقىتتا اياقتاي الدى. كۇنى بۇگىنگە دەيىن استىقتىڭ ءوسىپ-جەتىلۋى ۋاقىتىندا وب­لىس­تىڭ كەيبىر ايماقتارىندا 115-تەن 286 مم ارالىعىندا جاۋىن-شاشىن بول­­دى. قالىپتاعى نورما 148 بەن 204 مم ارا­لىعىندا بولاتىن. ال ايىرتاۋ, ەسىل, م.جۇماباەۆ, ع.مۇسىرەپوۆ, اقجار جانە ءۋاليحانوۆ اۋداندارىندا ماۋسىم ايىند­اعى جاۋىن-شاشىن 58-72 مم ارا­لىعىندا عانا بولدى. باسقا ايماقتاردا ىلعال­دىڭ ۇزدىكسىز بولىپ تۇرعانى وسكىن­نىڭ قا­لىپتى ورۋىنە سەپتەستى. بىراق جىلى­لىق پەن ىلعالدىڭ كەسىرىنەن ءتۇرلى زيان­كەس­تىڭ ورىستەۋىنە مۇمكىندىك تۋىپ, ديقان­دارعا كوپتەگەن ەگىستىك الاپتارىن كەمىندە ءۇش رەتتەن حيميالىق قوسپالارمەن وڭدەۋگە تۋرا كەلدى. بۇگىنگى تاڭدا بارلىق ەگىس القاپتارىنىڭ 90 پايىزى جاقسى كۇتىلگەن جاعدايدا. الدىن الا جاسالعان اگرومەتەورولوگيالىق جاعدايدى ەسكەرە وتىرىپ بيىل استىقتىڭ ءاربىر گەكتارىنان 14-17 تسەنتنەردەن, ال مايلى داقىلداردىڭ ءار گەكتارىنان 10 تسەنتنەردەن ءونىم الارمىز دەپ بولجاپ وتىرمىز», دەيدى م.تاسماعانبەتوۆ.

جەتىستىككە جەتكىزەتىن العىشارتتار

جاقسى ناتيجەگە قولجەتكىزۋ ءۇشىن دە العىشارتتار كەرەك. ونى الدىمەن ۇكى­مەت, سوسىن جەرگىلىكتى بيلىك تاراپىنان بولىنەتىن قارجىلاي قولداۋ ارقىلى جۇزەگە اسىرۋعا بولادى. الەمنىڭ بارلىق دامىعان ەلدەرى اۋىل شارۋاشىلىعىنا ارنايى نەسيەلەر مەن جەڭىلدەتىلگەن سۋبسيديالار بەرەدى. ەلىمىز دە كەيىنگى 2-3 جىلدا بۇل ءىستى قالىپتى جاعدايعا اينالدىرىپ, شارۋالاردى قولدايتىن ءتيىمدى تەتىكتەر ەنگىزدى. بيىل مەملەكەت باسشىسىنىڭ تاپسىرماسىنا سايكەس, اۋىل ەڭبەككەرلەرىنە بۇرىن بولماعان كولەمدە قارجىلىق قولداۋ كومەگى جاسالدى. ءبىزدىڭ وبلىسقا عانا «كەڭ دالا-1» جانە «كەڭ دالا-2» باعدارلامالارى بويىن­شا 97 ملرد تەڭ­گە قولداۋ قاراجاتى ءبولىندى. بۇل بىل­تىرمەن سالىستىرعاندا 2,5 ەسە ار­تىق, ءتىپتى ەلىمىزدەگى ەڭ جوعارى كورسەت­كىشتەردىڭ ءبىرى دەسە دە بولادى.

«مەملەكەت اگرارشىلارعا جۇيەلى قولداۋ كورسەتىپ كەلەدى, جەڭىلدەتىلگەن نەسيەلەۋدەن باستاپ قايتا وڭدەۋدى ىنتا­لاندىرۋعا جانە سىرتقى نارىققا شىعۋعا دەيىن ءۇزىلىسسىز كومەك جاسالىپ جاتىر. ەگىس جانە وراق ناۋقانى جۇمىستارىنا 5% مولشەرلەمەمەن جەڭىلدەتىلگەن قار­جىلاندىرۋ قاراستى­رىلدى. بۇعان دەيىن بۇل ماقساتقا 70 ملرد تەڭگە بولىنسە, بيىل 700 ملرد تەڭگە ءبولىندى, ياعني 10 ەسە ءوستى.

ءوندىرىس شىعىندارىن تومەندەتۋدى بارلىق فەرمەرلىك ساناتتار ءۇشىن قول­جەتىمدى ەتۋگە جۇمىس ىستەپ جاتىرمىز. قار­جىلاندىرۋدىڭ قامتىلۋى 2 جىلدا 3,5 مىڭنان 14 مىڭ قارىز الۋشىعا دەيىن ارتتى. ۋاقتىلى بەرىلگەن جەڭىلدەتىلگەن نەسيەلەردىڭ ارقاسىندا اگرارشىلار تىڭايت­قىش, تۇقىم, قوسالقى بولشەكتەر ساتىپ الىپ, جۇمىسشىلاردىڭ ەڭبەك­اقى­­سىن قولجەتىمدى باعامەن تولەۋگە مۇم­­كىن­دىك الدى», دەيدى اۋىل شارۋاشى­لىعى ءمي­نيسترىنىڭ ورىنباسارى امانعالي بەردالين.

اۋىل شارۋاشىلىعى ونىمدەرىن 5 جىل­دا 2 ەسە ارتتىرۋ باعدارلاماسىنا ساي­كەس, سولتۇستىك قازاقستان وبلىسىندا 340 مىڭ توننا تىڭايتقىش الۋعا كە­لىسىمشارتتار جاساۋعا مۇمكىندىك بە­رىل­گەن. سونىڭ ىشىندە تەك بيىل اۋىل شا­رۋا­­شىلىعى قۇرىلىمدارىنا 22 ملرد تەڭ­گە­­نىڭ تىڭايتقىشىن الۋعا سۋبسيديا ءبولىنىپتى.

«سونىڭ ارقاسىندا وتاندىق «قازفوس­فات» جانە «قازازوت» مينەرالدى تىڭايت­قىش جاسايتىن زاۋىتتارىنان 16 مىڭ توننا ارزانداتىلعان تىڭايتقىش جەت­كىزىلدى. بارلىعى 340 مىڭ توننا تىڭايت­قىش الۋعا كەلىسىمشارت جاسالدى, بۇل بىلتىرعىدان 102%-عا كوپ», دەدى مارات يمانباي ۇلى.

بيىل ەگىس القاپتارىنا ءورۋى تومەن تۇقىمدار مۇلدە ەگىلمەگەن. بارلىق ەگىل­گەن تۇقىمنىڭ ىشىندە 52,5 مىڭ تون­نا­سى – ەليتالىق, 2,5 مىڭ تونناسى – سۋپەرەليتالىق, 132,7 مىڭ توننا – 1-رەپرودۋكتسيالىق. بيىل وبلىس ءبىرىنشى رەت «تۇقىم-قىزىلجار» اتتى حالىقارالىق فورۋم وتكىزىپ, ونىڭ جۇمىسىنا وتاندىق قانا ەمەس ەۋروپالىق جانە رەسەيلىك مامانداردى قاتىستىردى. وبلىستا جەردى سۋلاندىرۋ مەن سۋارۋ تەحنيكالارىن قولدانۋ اياسى دا كەڭەيىپ كەلەدى. 2025 جىلى «ەلىم-اي», «بۋدەنىي سك» «اسىلفەرمس» جشس ۇسىنعان جوبا­لارعا قولداۋ كورسەتىلىپ, بۇرىنعى 9,4 مىڭ گەكتار ەگىس الاڭى ەندى 11 مىڭ گەكتار جەرگە دەيىن كوبەيتىلدى.

ارينە, اۋىل شارۋاشىلىعى تەحنيكالارىن جاڭارتۋ دا ماڭىزدى مىندەتتەر قاتارىندا.

«اۋىل شارۋاشىلىعىن قولداۋدىڭ ماڭىزدى باعىتىنىڭ ءبىرى – تەحنيكالىق قايتا جاراقتاندىرۋ. 2025 جىلى تەحني­كاعا جەڭىلدەتىلگەن ليزينگ ءۇشىن 250 ملرد تەڭگە ءبولىندى, 12 مىڭ بىرلىك ساتىپ الۋ جوسپارلانىپ وتىر. ەكى باعدارلاما دا تازا 5% مولشەرلەمەمەن نەسيە بەرۋدى كوزدەيدى, پايىزدىق مولشەرلەمەنى سۋبسيديالاۋدى جانە سۋبسيديا تولەمىن كۇتۋدى قاجەت ەتپەيدى. بۇل – جاقسى تاجى­ري­بە, ونى باسقا نەسيە باعىتتارىنا, ونىڭ ىشىندە مال شارۋاشىلىعى بو­يىنشا دا كەڭەيتۋ كوزدەلگەن. 25 شىل­دەدەن باستاپ «اگرارلىق نەسيە كور­پوراتسياسى» ارقىلى اينالىم قارا­جا­تىن قارجىلاندىرۋعا وتىنىمدەر قابىل­داۋ باستالدى. وعان 50 ملرد تەڭگە قا­راستىرىلعان», دەدى امانعالي بەردالين.

قازىر وبلىستا 7 مىڭداي استىق كوم­بايندارى بار, سونىڭ 4 مىڭدايى – گەر­مانيا, اقش جانە وزگە دە ەلدەر­دىڭ جوعارى ساپالى تەحنيكالارى. وب­لىس­تىڭ الەۋمەتتىك-ەكونوميكالىق دامۋ جوسپارىنا سايكەس 2025 جىلى وبلىس­تىڭ تەحنيكالىق پاركى 6%-عا جاڭعىر­تىلىپ, جاڭادان 2 290 تەحنيكا ساتىپ الۋ كوزدەلگەن. سونىڭ ىشىندە اۋىل شارۋا­شىلىعى قۇرىلىمدارى بيىل 32 ملرد تەڭگەگە 76 كومباين, 202 تراكتور, 296 سەيال­كا, 37 ەگۋ كەشەنىن جانە 603 باسقا تەحنيكا ساتىپ الدى. بەلگىلەنگەن جوسپار نەگىزىنەن ورىندالىپ, بيىلعى وراققا 12 مىڭداي تراكتور, 9 مىڭداي تراكتور تىركەمەلەرى, 4,5 مىڭ جاتكا جانە 5,6 مىڭ جۇك اۆتوموبيلدەرى قاتىستىرىلماق. «قازىر بارلىق تەحنيكا «وراق-2025» ناۋقانىنا كىرىسۋ ءۇشىن 100% دايىندىق ساپىندا تۇر», دەدى م.تاسماعانبەتوۆ.

سونىمەن قاتار بيىل مەملەكەت كۇزگى جيىن-تەرىم ناۋقانى ءۇشىن ديقاندارعا 58,2 مىڭ توننا ديزەلدى وتىندى جەڭىل­دەتىلگەن باعامەن بوساتقان. بۇل بارلىق جەتكىزۋ, لوگيستيكا شىعىندارىن قوسا ەسەپ­تەگەندە ديزەلدى وتىننىڭ ءبىر ءليترى 254 تەڭگەدەن اينالادى دەگەن ءسوز. 300 تەڭ­گەدەن ارتىققا ساتىلىپ جات­قان نارىقتىق باعاعا قاراعاندا بۇل الدەقايدا تومەن. ايتا كەتەتىن جايت, وبلىسقا بولىنگەن بارلىق ديزەلدى وتىننىڭ 21%-ى, ياعني 12,5 مىڭ تونناسى پاۆلوداردىڭ مۇناي وڭدەۋ زاۋىتىنان جەتكىزىلەدى.

مارات تاسماعانبەتوۆتىڭ ايتۋىنا قاراعاندا, كەيبىر شارۋاشىلىقتاردىڭ باسشىلارى وسىناۋ ارزانداۋ ديزەلدى وتىنعا ءالى كۇنگە تاپسىرىس بەرمەگەن. «سونىڭ كەسىرىنەن كەلىپ تۇرعان ديزەلدى وتىندى ءالى كۇنگە تولىق بولە الماي وتىرمىز» دەيدى ول.

ديقاندار مەملەكەتتىڭ قولداۋىنا ريزا

وبلىستاعى وزىق شارۋاشىلىق باس­شى­لارىنىڭ ءبارى مەملەكەتتىڭ بيىلعى قول­داۋىنا ريزاشىلىقتارىن ءبىلدىرىپ جاتىر.

«مەملەكەت وسىنداي قولداۋ جاساپ وتىرسا, ءبىز وراقتى جاقسى اياقتاپ قانا قويماي, ەرەن تابىسقا جەتە الاتىنىمىزدى كورسەتە ءبىلۋىمىز كەرەك. سولتۇستىك قازاقستان بيىل دا رەكوردتتىق كورسەتكىش جاساپ, رەسپۋبليكادا ءبىرىنشى ورىن الۋىمىز قاجەت. ايتپەسە, ۇلان-عايىر قولداۋ كومەگى بوسقا كەتەدى», دەيدى «زەنچەنكو ي ك» كومانديتتىك سەرىكتەستىگىنىڭ باس ديرەكتورى, ەڭبەك ەرى گەننادي زەنچەنكو.

«اسحات اگرو» جشس ديرەكتورى ناعا­شىباي بارلىباەۆتىڭ سوزىنشە, بيىل اۋا رايى دا كوپ جىلدان بەرى ديقاندار ءۇشىن قولايلى بولىپ تۇر.

«جاڭبىرى دا, ىستىعى دا ۋاقتىلى بولدى, وكپە جوق. تەك كۇزگى جيىن-تەرىمدە دە وسىنداي جايلى كۇي بولۋىن تىلەيمىز. بىلتىرعى قارقىندى ساقتاپ, بيىل دا سول كورسەتكىشتى جاساۋعا تىرىسامىز. مەملەكەتتىڭ قولداۋى بيىل ەرەكشە بولدى. شارۋاشىلىقتارىمىز ەسىل, قىزىلجار جانە مامليۋت اۋداندارىنىڭ اۋماعىنا جايىلعان. ءبارى دە 5%-دىق وسىممەن نەسيە الدى. ەندى تەك ۇكىمەتتىڭ قولداۋىن اقتاۋىمىز كەرەك», دەيدى ول.

بۇگىندە وبلىس اۋماعىندا استىق قا­بىل­­دايتىن 45 ەلەۆاتور جۇمىس ىستەي­دى. ولار­دىڭ سىيىمدىلىعى – 3,2 ملن توننا. سونىمەن بىرگە كەيبىر اۋىل شارۋا­شىلىعى قۇرىلىمدارىنىڭ استىق ساقتايتىن قويمالارى بار. ولار 6,9 ملن توننا استىق ساقتاپ, كەپتىرىپ وتىرادى. استىق قۇرعاتقىشتاردىڭ جالپى سانى 342, ولار ساعاتىنا 11,5 مىڭ توننا استىق قۇرعاتا الادى. بيىلعى استىق شىعىمىنىڭ مولدىعى «ازىق-ت ۇلىك» ۇك» اق-قا قارايتىن ەلەۆاتورلارعا سىيماي قالىپ, بىلتىرعىداي شاقىرىمدارعا سوزىلعان استىق تاسۋشى ماشينالار كەزە­گى تۋىنداي ما دەگەن قاۋىپ بار. ويت­كەنى قازىردىڭ وزىندە ەلەۆاتورلار 27,4%-عا تولىپ تۇر. سونىڭ ىشىندە «ازىق-ت ۇلىك» ۇك» اق-قا قارايتىن «حب-2», «7 استىق قويمالارى», «بۋ­لاەۆ استىق», «Asyl Elevator» ەلەۆاتور­لارى سىيىمدىلىعىنىڭ 40%-ىنان ارتى­عىنا تولعان. وسىعان بايلانىستى اۋىل شارۋا­شىلىعى ءمينيسترىنىڭ ورىنباسارى امان­عالي بەرداليننەن وراق ناۋقانى باستال­عانشا «ازىق-ت ۇلىك» ۇك» اق ءوزىنىڭ ەلەۆاتورلارىن جىلدامىراق بوساتۋ كەرەكتىگى تۋرالى تاپسىرما بەرى­لۋىن سۇرادى. سوندا عانا استىقتى جىلدام وت­كىزۋگە بولادى دەستى سەمينارعا قاتى­سۋشىلار.

جەمشوپتىڭ جايى قالاي؟

استىق نەگىزىنەن ادام ءۇشىن بولسا, جەمشوپ مال ءۇشىن جينالادى. ەكەۋىنىڭ دە ماڭىزى بىردەي, جەمشوبىڭ بولماسا, مالدىڭ دا كۇيى بولمايتىنى بەلگىلى. وسى ماسەلەنى ەسكەرىپ, وبلىس باسشى­لىعى اتالعان جيىننىڭ الدىندا «دايىندىق اگرو» جشس بازاسىندا وب­لىستىق «جەمشوپ جيناۋ – مال شارۋا­شىلىعىنىڭ ءتيىمدى نەگىزى» دەگەن تاقىرىپ­تا سەمينار وتكىزدى. مۇندا دا ماماندار تاجى­ريبەلەرىن ءبولىسىپ, الەمدەگى وزىق شا­رۋاشىلىقتاردىڭ ۇلگىلەرىمەن تانىستى.

وبلىس اۋماعىندا ورتا ەسەپپەن 940 مىڭ توننا ءشوپ, 235 مىڭ توننا پىشەن, 278 مىڭ توننا سۇرلەم, 867 مىڭ توننا سابان, 818 مىڭ توننا پىشەندەمە ءۇيىلۋى كەرەك. بيىل وبلىس بويىنشا قىستاتۋعا 287 مىڭداي قارا مال, 411 مىڭ تۇياق قوي-ەشكى, 128 مىڭداي جىلقى قوراعا تۇرادى. (قازىر جۇرگىزىلىپ جاتقان اۋىل شارۋاشىلىعى ساناعى بۇل سانداردى ناقتىلاي تۇسەرى ءسوزسىز). ايتا كەتەتىن جايت, وسىنشا مالدىڭ ىشىندە 110 مىڭ قارا مال, 263 مىڭ قوي-ەشكى, 60,7 مىڭ تۇياق جىلقى جەكەمەنشىك اۋلالاردىكى. بۇگىنگە دەيىن 900 مىڭ تونناداي ءشوپ, 250 مىڭ تونناداي پىشەن­دەمە ۇيىلگەن. بۇل بەلگىلەنگەن جوسپار­دىڭ 90%-ى ماڭىنداعى كورسەتكىش. قازىر شارۋالار ءاربىر ءساتتى كۇندى پايدالانىپ, جەمشوپ ۇيۋمەن اينالىسىپ جاتىر.

وبلىستىڭ «زەنچەنكو ي ك» كس, «اتامەكەن اگرو كورنەەۆكا» جشس, «نەجينكا ەركە» جشس, «ۆوزۆىشەنكا سك» جشس, «قىزىلجار ءسۇت» جشس,  «زەليونىە لۋگا» جشس, «تايىنشا-استىق» جشس-ىندا وزات شارۋاشىلىقتارىندا قازىردىڭ وزىندە ەكى قىسقا جەتەرلىك جەم­شوپ قورى بار. بۇلار – تاۋارلى-ءسۇت ونىم­دەرىن شىعارا­تىن كاسىپورىندارى بار شارۋا­شىلىق­تار. بۇرىن بىرنەشە رەت جازعانى­مىزداي, وبلىس كولەمىندە 110 تاۋارلى-ءسۇت فەرماسى بار, سونىڭ 42-ءسى – وسى زامانعى ءسۇت كەشەندەرى. جىل سايىن وندايدىڭ بىر­نە­شەۋى ىسكە قوسىلىپ جاتادى. ءسۇتتى جاقسى بەرۋ ءۇشىن مۇنداعى مالعا جەمازىق ۋاقتى­لى جانە ساپالى نەگىزدە بەرىلىپ تۇرۋى كەرەك. سوندىقتان شارۋا­شىلىق باسشىلارى جاتپاي-تۇر­ماي جەمشوپ جيناۋدى نازاردان تىس قالدىرمايدى.

وبلىستا جەمازىق وندىرەتىن بىرنە­شە كاسىپورىن بار. ولاردىڭ ىشىندە «Memolux» جشس ءوز ونىمدەرىنىڭ ءبىر بولى­گىن, اتاپ ايتقاندا, بيىل 21,5 مىڭ تونناسىن, «Kazmeal» جشس بيىل 282,9 تونناسىن شەتەلدەرگە ەكسپورتقا دا شىعارىپ ۇلگەردى. ولاردىڭ وندىرگەن جەمازىق ۇنىن نەگىزىنەن قىتاي شارۋالارى الادى. وسىنىڭ ءوزى سولتۇستىكقازاقستاندىق جەمازىق وندىرۋشىلەردىڭ باسەكەلەستىككە توتەپ بەرە الاتىنىن كورسەتىپ تۇر.

وبلىستا جالپى سانى 5 ارناۋلى قۇرا­ماجەم وندىرەتىن كاسىپورىن بار, ولار جىلىنا 568 مىڭ توننا ءونىم شىعا­را­دى. ولاردان باسقا قىزىلجار اۋدانىن­داعى پودگورنوە اۋىلىندا «Salar Farm» فيرماسى جوڭىشقا وڭدەيتىن زاۋىت جوباسىن قولعا الىپ جاتىر. ول ىسكە قوسىلعاندا جىلىنا 60 مىڭ توننا جوڭىشقا وڭدەيتىن بولادى. بيىل وبلىس­تا جوڭىشقا وسىرەتىن ەگىس اۋماعى 1 460 گەكتارعا دەيىن ۇلعايتىلدى.

اۋىل شارۋاشىلىعى – ەل ەكونومي­كاسىنىڭ تىرەگى, حالقىمىزدىڭ ءال-اۋقاتى مەن تۇراقتى نەگىزى ەكەنى ءسوزسىز. وسى جولدا ايانباي ەڭبەك ەتىپ جۇرگەن شارۋالارعا ەل العىسى شەكسىز.

سولتۇستىك قازاقستان وبلىسى