ەرتىس باسسەيندىك ينسپەكتسياسى پاۆلودار وبلىسىنىڭ اقسۋ قالاسىنداعى اۋىلدىق ايماعىندا جانە ەرتىس اۋدانىندا زاڭسىز ورنالاسقان ءۇش سورعى ستانتسياسىن انىقتادى. بۇل تۋرالى ۆەدومستۆونىڭ ءباسپاسوز قىزمەتى ءمالىم ەتتى, دەپ حابارلايدى Egemen.kz.
تەكسەرۋ ناتيجەسى بويىنشا قۇقىق بۇزعان بارلىق ازامات اكىمشىلىك جاۋاپكەرشىلىككە تارتىلدى. ولارعا جالپى سوماسى شامامەن 600 مىڭ تەڭگە كولەمىندە ايىپپۇل سالىندى. سونىمەن قاتار باسسەيندىك ينسپەكتسيا ماماندارى ءوڭىردىڭ شارۋالارى اراسىندا ءتۇسىندىرۋ جۇمىستارىن جۇرگىزىپ جاتىر.
– باسسەيندىك ينسپەكتسيالاردىڭ بارلىعى سۋدى پايدالانۋ زاڭناماسىنىڭ بۇزىلۋىنا جول بەرمەۋ ءۇشىن تۇراقتى تۇردە مونيتورينگ جۇرگىزەدى. سونداي-اق بيىل ماۋسىم ايىندا قابىلدانعان سۋارمالى سۋدى پايدالانۋ ەرەجەلەرى, ارنايى سۋ پايدالانۋ رۇقساتىن الۋ جانە سۋ ۇنەمدەۋ تەحنولوگيالارىنا كوشۋ قاجەتتىلىگى بويىنشا سۋ پايدالانۋشىلارمەن ءتۇسىندىرۋ جۇمىستارى جۇرگىزىلىپ جاتىر, – دەدى ەرتىس باسسەيندىك ينسپەكتسياسىنىڭ باسشىسى مەدەت جادىگەر ۇلى.
زاڭسىز سۋ پايدالانۋ ماسەلەسىمەن كۇرەسۋ ءۇشىن سۋ رەسۋرستارى جانە يرريگاتسيا مينيسترلىگى بىرقاتار شارا قابىلداعانىن ەسكە سالا كەتەيىك. ونىڭ ىشىندە سۋ زاڭناماسىن بۇزعاندارعا جاۋاپكەرشىلىكتى كۇشەيتۋ جانە سۋارمالى سۋدى پايدالانۋ ەرەجەلەرى بار. بۇل ەرەجەلەرگە سايكەس, ءتيىستى كەلىسىمشارتسىز سۋ تۇتىنعانى نەمەسە سۋ جەتكىزۋشىمەن كەلىسپەي ەگىس داقىلدارىنىڭ ءتۇرىن وزگەرتكەنى ءۇشىن ايىپپۇل سالىنادى.
پاۆلودار وبلىسى